دائىرىلەرنىڭ ئۇقتۇرۇشىچە، چارشەنبە كۈنى ھىندىستاننىڭ نوپۇسى ئەڭ زىچ ئۆلكىسى بولغان ئۇتتار پرادېشنىڭ نۇرغۇن رايونلىرىدا يامغۇر ۋە مۆلدۈر ئارىلاشقان كۈچلۈك بوران چىقىپ، 89 كىشى قازا قىلغان.
ھىندىستاننىڭ شىمالىغا جايلاشقان بۇ ئۆلكىدە، مارتتىن ئىيۇنغىچە بولغان مەزگىلدە مۇسسۇن يامغۇرلىرى ئېلىپ كېلىدىغان سالقىن ھاۋادىن بۇرۇن، بۇ خىل بوران-چاپقۇنلار دائىم يۈز بېرىپ تۇرىدۇ.
تېلېۋىزىيە كۆرۈنۈشلىرىدىن مەلۇم بولۇشىچە، كۈچلۈك بوراننىڭ تەسىرىدە دەرەخلەر يىلتىزىدىن قومۇرۇلغان، ئېلان تاختىلىرى ئۆرۈلۈپ كەتكەن ھەمدە ئۇلارنىڭ بەزىلىرى ئاپتوموبىللارنىڭ ئۈستىگە چۈشكەن. شۇنداقلا، چاڭ-توزان ۋە ئۇچۇپ يۈرگەن ئەخلەت-پارچىلار ئارىسىدا يول بويىدىكى پەلەمپەيلەردە قويۇلغان ياغاچ ئۆي جاھازىلىرىنىڭمۇ ئۇچۇپ يۈرگەنلىكىنى كۆرگىلى بولىدۇ.
ئىسمىنى ئاشكارىلاشنى خالىمىغان بىر ئەمەلدار تاراتقۇلارغا: «بوران، چاقماق ۋە يامغۇر قاتارلىق پەۋقۇلئاددە ھاۋارايى تۈپەيلىدىن كەم دېگەندە 89 كىشى ھاياتىدىن ئايرىلدى» دېدى.
ھۆكۈمەتنىڭ ئاپەتتىن قۇتقۇزۇش ئىشلىرىغا مەسئۇل بىر ئەمەلدارى رېيتېر ئاگېنتلىقىغا بەرگەن باياناتىدا، بەزى كىشىلەرنىڭ دەرەخ ۋە ئۆي تاملىرىنىڭ بېسىۋېلىشى سەۋەبىدىن قازا قىلغانلىقىنى تىلغا ئالدى، ئەمما قۇتقۇزۇش خىزمىتىگە ئائىت تەپسىلاتلارنى تەمىنلىمىدى.
يەرلىك ساقچى دائىرىلىرى پەيشەنبە كۈنى X سۇپىسىدا بايانات ئېلان قىلىپ: «مەمۇرىي ئەمەلدارلاردىن تەشكىللەنگەن خىزمەت گۇرۇپپىلىرى ئاپەتكە ئۇچرىغان رايونلارنى ئۈزلۈكسىز كۆزىتىۋاتىدۇ» دېدى.
يەنە بىر تەرەپتىن، پايتەخت يېڭى دېھلىنىڭ بەزى رايونلىرىدىمۇ قاتتىق يامغۇر يېغىپ، ئىندىرا گەندى خەلقئارا ئايرودۇرۇمىدىكى ئايروپىلان قاتنىشىنى توسالغۇغا ئۇچراتتى.
