بېريۇسسېلدىكى بىر دىپلوماتىك مەنبەدىن دۈشەنبە كۈنى ئىگىلەنگەن ئۇچۇرغا ئاساسلانغاندا، ياۋروپا ئىتتىپاقى رۇسىيەگە قارشى ئوتتۇرىغا قويغان 20-نۆۋەتلىك جازا لايىھەسى دائىرىسىدە، رۇسىيە نېفىت تىرانسپورتىنى توسۇش ئۈچۈن ئامېرىكا قوشما ئىشتاتلىرى ۋە باشقا تەرەققىي تاپقان 7 دۆلەت گۇرۇھى (G7) غا ئەزا دۆلەتلىرىدىن تەلەپ قىلغان ماس قەدەملىك قوللاشقا ئېرىشەلمىگەن.
رۇسىيەنىڭ «تاس» (TASS) خەۋەر ئاگېنتلىقىنىڭ زىيارىتىنى قوبۇل قىلغان مەزكۇر مەنبەنىڭ سۆزىگە قارىغاندا، بېريۇسسېل دائىرىلىرى رۇسىيە نېفىت تىرانسپورتى ۋە ئۇنى ئاسراش ساھەلىرىگە قارىتىلغان چەكلىمىلەرنى كېڭەيتىش پىلانىنى ۋاشىنگتونغا ۋە باشقا يەتتە دۆلەت گۇرۇھى دۆلەتلىرىنىڭ پايتەختلىرىگە سۇنغان.
مەزكۇر دىپلوماتىك مەنبە مەسىلە ھەققىدە توختىلىپ مۇنداق دېدى: «ياۋروپا ئىتتىپاقى ئامېرىكا ۋە يەتتە دۆلەت گۇرۇھى دۆلەتلىرىگە ياۋروپا شىركەتلىرىنىڭ رۇسىيە نېفىتىنى توشۇشىنى، شۇنداقلا رۇسىيە نېفىتى توشۇۋاتقان نېفىت پاراخوتلىرىنىڭ قايسى دۆلەتنىڭ بايرىقىنى ئېسىپ يۈرۈشىدىن قەتئىينەزەر، ئۇلارغا رېمونت قىلىش، ئەشيا بىلەن تەمىنلەش، پۇل-مۇئامىلە ۋە سۇغۇرتا مۇلازىمىتى بىلەن تەمىنلەشنى پۈتۈنلەي چەكلەش تەكلىپىنى بەردى. ياۋروپا كومىتېتى شېرىكلىرىنىمۇ ئۆز شىركەتلىرىگە ئوخشاش چەكلىمىلەرنى يۈرگۈزۈشكە چاقىردى، ئەمما ئامېرىكا قوشما ئىشتاتلىرى بۇ تەكلىپنى رەت قىلدى.»
مەنبە يەنە، ۋاشىنگتوننىڭ كەلگۈسىدە ئۆز شارائىتىغا ئاساسەن مۇستەقىل تەدبىر قوللىنىش ئېھتىماللىقىنىڭ بارلىقىنى، باشقا يەتتە دۆلەت گۇرۇھى شېرىكلىرىنىڭ بولسا جازالاش تەدبىرلىرىگە قاتنىشىشقا مايىللىقىنى بىلدۈرگەن بولسىمۇ، لېكىن ئېنىق ۋەدە بېرىشتىن ئۆزىنى قاچۇرغانلىقىنى تىلغا ئالدى.
2022-يىلى فېۋرالدا باشلانغان رۇسىيە-ئۇكرائىنا ئۇرۇشىدىن بۇيان، رۇسىيە ئىران، سۈرىيە ۋە شىمالىي كورېيەنى ئارقىدا قالدۇرۇپ، دۇنيادىكى ئەڭ كۆپ جازاغا ئۇچرىغان دۆلەتكە ئايلاندى.
جازالاش تەدبىرلىرىنى كۆزىتىدىغان سانلىق مەلۇمات ئامبارلىرىنىڭ مەلۇماتىغا ئاساسلانغاندا، نۆۋەتتە موسكۋاغا قارشى شەخسلەر، ئورگانلار، پاراخوتلار ۋە ئايروپىلانلارنى نىشان قىلغان 16 مىڭ 500 دىن ئارتۇق چەكلىمە تەدبىرى يۈرگۈزۈلمەكتە.
