رامافوسا كېسەك ئالتۇن دۆلەتلىرىنىڭ يەر شارى خاراكتېرلىك گۈللىنىشكە تۆھپە قوشىدىغان بىر تەشكىلات ئىكەنلىكىنى بىلدۈردى.
جەنۇبىي ئافرىقا پىرېزىدېنتى سىرىل رامافوسا ئامېرىكا پىرېزىدېنتى دونالد ترامپنىڭ كېسەك ئالتۇن دۆلەتلىرى بىلەن ھەمكارلاشقان دۆلەتلەرنى قوشۇمچە تاموژنا بېجى قويۇش بىلەن تەھدىت سېلىشىغا جاۋاب قايتۇرۇپ، تىنچلىق يولىدىكى ھەمكارلىق ئىزدەيدىغان دۆلەتلەرنىڭ جازالانماسلىقى كېرەكلىكىنى تەكىتلىدى.
رامافوسا دۈشەنبە كۈنى رىيو دې ژانېيرو شەھىرىدە ئۆتكۈزۈلگەن مۇخبىرلارنى كۈتۈۋېلىش يىغىنىدا مۇنداق دېدى:
«كۈچلۈك ئەللەرنىڭ دېگىنى توغرا دەپ قارىلىدىغان بىر دۇنيا بولماسلىقى كېرەك.
ئىنسانىيەتنىڭ مەنپەئەتىنى ئىلگىرى سۈرۈش ئۈچۈن ھەمكارلىق ئىزدەيدىغان دۆلەتلەرگە قارشى ئۆچ ئېلىش ياكى تەھدىت بولماسلىقى كېرەك.»
بۇ باياناتلار ترامپنىڭ «ئامېرىكاغا قارشى سىياسەتلەرنى يولغا قويۇشقا يۈزلەنگەن» دۆلەتلەردىن ئىمپورت قىلىنغان ماللارغا %10 لىك تاموژنا بېجى قويۇش ۋەدىسىگە جاۋاب سۈپىتىدە ئوتتۇرىغا چىقتى. ترامپ بۇ قەدىمى ئارقىلىق بولۇپمۇ بىرازىلىيە، رۇسىيە، ھىندىستان، خىتاي ۋە جەنۇبىي ئافرىقادىن تەشكىل تاپقان كېسەك ئالتۇن دۆلەتلىرى ئىقتىسادىي گەۋدىسىنى نىشان قىلغانىدى.
«كېسەك ئالتۇن دۆلەتلىرى بىرلەشكەن دۆلەتلەر تەشكىلاتى ياكى 20 دۆلەت گۇرۇھىغا رەقىب ئەمەس»
رامافوسا كېسەك ئالتۇن دۆلەتلىرىنىڭ مەۋجۇت ئاپپاراتلارغا تەھدىت دەپ قارالماسلىقى كېرەكلىكىنى بىلدۈرۈپ، بۇ تەشكىلاتنى تەرەققىيات ۋە ياخشى باشقۇرۇشنى ئىلگىرى سۈرىدىغان يەر شارى خاراكتېرلىك كۈچ مەركەزلىرىدىن بىرى دەپ قاراش كېرەكلىكىنى ئەسكەرتىپ مۇنداق دېدى:
«كېسەك ئالتۇن دۆلەتلىرى بىرلەشكەن دۆلەتلەر تەشكىلاتى ياكى 20 دۆلەت گۇرۇھىغا رەقىب ئەمەس.
تەشكىلاتنىڭ يېقىنقى ئورتاق خىتابنامىسىنى يەر شارى خاراكتېرلىك گۈللىنىشنى نىشان قىلىدىغان <مۇھىم خىتابنامە> دېيىشكە بولىدۇ.»
ئۇ يەنە، كېسەك ئالتۇن دۆلەتلىرى گۇرۇھىغا ئەزا دۆلەتلەرنىڭ ئىسرائىلىيەنىڭ ئىرانغا قارىتىلغان «بىر تەرەپلىمىلىك» ھۇجۇمىنى بىردەك ئەيىبلىگەنلىكىنى ۋە پەلەستىنلىكلەرنىڭ «قاتلىئام ۋە ئىرقىي قىرغىنچىلىق» نى توختىتىش ئۈچۈن غەززەدە دەرھال ئۇرۇش توختىتىش چاقىرىقىنى يەنە بىر قېتىم تەكرارلىدى.
بىرلەشكەن دۆلەتلەر تەشكىلاتى خەۋپسىزلىك كېڭىشىنىڭ قۇرۇلمىسىنى ئىسلاھ قىلىش چاقىرىقى
رامافوسا بولۇپمۇ ئافرىقادىن كەلگەن چاقىرىقلارنىڭ «كۈچىيىۋاتقانلىقىنى» بىلدۈرۈپ، بىرلەشكەن دۆلەتلەر تەشكىلاتىدا، بولۇپمۇ خەۋپسىزلىك كېڭىشىدە ئىسلاھات ئېلىپ بېرىش كېرەكلىكىنى تەكىتلىدى. ئۇ، ئىككىنچى دۇنيا ئۇرۇشىدىن بۇيان چوڭ ئۆزگىرىش بولمىغان يەر شارى خاراكتېرلىك ئىدارە قىلىش سىستېمىسىنىڭ بۈگۈنكى رېئاللىقنى ئەكس ئەتتۈرىدىغان شەكىلدە ئىسلاھ قىلىنىشى كېرەكلىكىنى ئىلگىرى سۈردى.
رامافوسا سودا ساھەسى ھەققىدە توختالغاندا، ترامپ ھۆكۈمىتىنىڭ داۋاملىشىۋاتقان سۆھبەتلەر ئۈچۈن بېكىتكەن ۋاقىت جەدۋىلىنىڭ يېقىنلىشىپ قالغان بولۇشىغا قارىماي، يەنىلا ئۈمىدۋار ئىكەنلىكىنى، ماي ئېيىدا ئاقساراينى زىيارەت قىلغاندىن كېيىن، جەنۇبىي ئافرىقا سودا مىنىستىرلىقىنىڭ ئامېرىكالىق كەسىپداشلىرى بىلەن داۋاملىق ئالاقە قىلىۋاتقانلىقىنى ئەسكەرتىپ مۇنداق دېدى:
«بىز ئوچۇق تەكلىپ سۇندۇق، پىكرىمىزنى ئوتتۇرىغا قويدۇق.
ھەممە مەسىلە ھەققىدە، ھەتتا ئاخىرقى مۆھلەت ھەققىدە سۆھبەت ئۆتكۈزۈشكە بولىدۇ.»
ئامېرىكا بىلەن جەنۇبىي ئافرىقا ئوتتۇرىسىدىكى جىددىيچىلىك
پرېتورىيە بىلەن ۋاشىنگتون ئوتتۇرىسىدىكى جىددىيچىلىك يېقىنقى ئايلاردا كۈچەيدى. ترامپ فېۋرال ئېيىدا جەنۇبىي ئافرىقانىڭ يەر ئىسلاھاتى سىياسىتى، ئىران بىلەن بولغان يېقىن مۇناسىۋەتلىرى ۋە ئىسرائىلىيەگە قارشى خەلقئارا ئەدلىيە سوت مەھكىمىسىگە سۇنغان ئىرقىي قىرغىنچىلىق دەۋاسىنى سەۋەب كۆرسىتىپ، بۇ دۆلەتكە بېرىلىدىغان مالىيە ياردىمىنى قىسقارتىش نىشان قىلىنغان پىرېزىدېنتلىق پەرمانىنى ئېلان قىلدى.
ترامپ يەنە، جەنۇبىي ئافرىقالىق ئاق تەنلىك دېھقانلارنىڭ ھۇجۇم نىشانى قىلىنىپ ئۆلتۈرۈلگەنلىكىنى ئىلگىرى سۈرگەن تالاش-تارتىشلىق باياناتلىرى سەۋەبىدىن تەنقىدكە ئۇچرىدى. ھالبۇكى، بۇ ئەيىبلەشلەر جەنۇبىي ئافرىقا ھۆكۈمىتى تەرىپىدىن رەت قىلىندى.
شۇنداقتىمۇ، رامافوسا ترامپ بىلەن ئاقسارايدىكى ئۇچرىشىشىنى ئۈنۈملۈك دەپ تەرىپلەپ، بۇ ئۇچرىشىشنىڭ ھازىرقى «ئۆزگىرىشچان ۋە مۇرەككەپ مۇھىت» ئاستىدا ئىككى تەرەپلىك مۇناسىۋەتلەرنى سودا يۆنىلىشىدە «قايتىدىن تەڭشەش» تە مۇھىم رول ئوينىغانلىقىنى ئېيتتى.
