پەلەستىن ژۇرنالىستلار بىرلەشمىسى ئىسرائىلىيەنىڭ 2025-يىلى سەككىزى ئايال بولۇپ جەمئىي 42 پەلەستىنلىك ژۇرنالىستنى قولغا ئالغانلىقىنى ۋە پەلەستىنلىك ژۇرنالىستلارنى سىستېمىلىق ھۇجۇم نىشانى قىلىشنى داۋاملاشتۇرۇۋاتقانلىقىنى جاكارلىدى.
پەلەستىن ژۇرنالىستلار بىرلەشمىسىنىڭ دوكلاتىدا مۇنداق دېيىلدى:
«ھۆججەتلەشتۈرۈش ۋە تەتقىق قىلىش نەتىجىسىگە قارىغاندا، بىرلەشمىنىڭ ئەركىنلىكلەر كومىتېتى 2025-يىلى ئىچىدە ئەر-ئايال بولۇپ جەمئىي 42 پەلەستىنلىك ژۇرنالىستنىڭ قولغا ئېلىنغانلىقىنى ئېنىقلاپ چىققان. بۇ قولغا ئېلىشلار ئىشغالىيەت ئاستىدىكى ئىيوردان دەرياسىنىڭ غەربىي قىرغىقى، قۇددۇس ۋە ئىشغال ئاستىدىكى باشقا تېرروتېرىيەلەردە، شۇنداقلا ھەربىي تەكشۈرۈش پونكىتلىرىدا، چېگرا ئېغىزلىرىدا، نەق مەيدان خىزمىتى جەريانىدا ۋە ئۆيلەرگە باستۇرۇپ كىرىش جەريانىدا يۈز بەرگەن.»
دوكلاتتا قەيت قىلىنىشىچە، 2023 - ۋە 2024-يىللىرىغا سېلىشتۇرغاندا قولغا ئېلىش ۋەقەلىرىنىڭ ئازىيىشى، ئىسرائىلىيەنىڭ دىققەت نىشانىنى «سان جەھەتتىن نىشانلاشتىن سۈپەت جەھەتتىن نىشانلاش» قا ئۆزگەرتكەنلىكىنى كۆرسىتدىكەن.
بۇ نىشان تەسىر كۈچى ئەڭ زور ژۇرنالىستلارنى نىشان قىلىش، ئوخشاش بىر ژۇرنالىستنى قايتا-قايتا قولغا ئېلىش، ھېچقانداق ئەيىبلەش ياكى سوتلاش بولماي تۇرۇپ مەمۇرىي جەھەتتىن تۇتۇپ تۇرۇش دائىرىسىنى كېڭەيتىش ۋە تەقىب قىلىش ۋاستىسى سۈپىتىدە جىسمانىي ھەم پىسخىكىلىق زوراۋانلىق قىلىش قاتارلىق ئەھۋاللارنى ئۆز ئىچىگە ئالىدىكەن.
پەلەستىن ژۇرنالىستلار بىرلەشمىسى يەنە كومىتېتنىڭ، ژۇرنالىستلارنىڭ ھەربىي جەھەتتىن باستۇرۇپ كىرىش ۋە قانۇنسىز كۆچمەنلەرنىڭ ھۇجۇملىرىنى خەۋەر قىلىش ئۈچۈن ۋەزىپە ئۆتەش جەريانىدا قولغا ئېلىنغانلىقىغا دائىر ۋەقەلەرنىمۇ ھۆججەتكە ئالغانلىقىنى بىلدۈردى. دوكلاتتا مۇنداق دېيىلدى:
«بۇ ئەھۋال قولغا ئېلىشنىڭ، شاھىتلارنى يوقىتىش ۋە ھەقىقەتنىڭ ئاشكارىلىنىشىنى توسۇش ئۈچۈن جىددىي بىر ۋاسىتە سۈپىتىدە قوللىنىلىۋاتقانلىقىنى دەلىللىمەكتە.»
جىنسىيەت ئاساسىدىكى زوراۋانلىق
2025-يىلى يەنە ئىسرائىلىيەنىڭ پەلەستىنلىك ئايال ژۇرنالىستلارنى قولغا ئېلىش، سوراق قىلىش ۋە سۈرگۈن قىلىش قىلمىشلىرى كۆپىيىپ كەتتى، بەزى ژۇرنالىستلار بولسا قايتا قولغا ئېلىندى.
دوكلاتتا كومىتېتنىڭ، بۇ دەپسەندىچىلىكلەرنىڭ ئىسرائىلىيە دائىرىلىرى تەرىپىدىن قىيناشقا دۇچار بولغان چەت ئەللىك ئايال ژۇرنالىستلارنىڭ ھۆججەتكە ئېلىنغان ئىپادىلىرى بىلەن ئوخشاشلىققا ئىگە ئىكەنلىكىنى ئېنىقلاپ چىققانلىقى تەكىتلىنىپ مۇنداق دېيىلدى:
«كومىتېت بۇ دەپسەندىچىلىكلەرنىڭ تۈرمىلەردە ئېغىر خورلاشقا دۇچار بولغان چەت ئەللىك ئايال ژۇرنالىستلارنىڭ ھۆججەتكە ئېلىنغان ئىپادىلىرى بىلەن بىر نۇقتىدا جەم بولىدىغانلىقىنى كۆرسىتىدىغانلىقىنى، بۇ جىنايەتلەرنىڭ خەلقئارا جىنايەتلەر سەۋىيەسىگە يېتىدىغان ئېغىر دەپسەندىچىلىك كاتېگورىيەسىگە كىرىدىغانلىقىنى ئوتتۇرغا قويدى.»
پەلەستىن ژۇرنالىستلار بىرلەشمىسى خەلقئارا جەمئىيەتنى، كىشىلىك ھوقۇق تەشكىلاتلىرىنى، بىرلەشكەن دۆلەتلەر تەشكىلاتىنى ۋە پىكىر ئەركىنلىكى مەخسۇس تەكشۈرگۈچىلىرىنى قانۇنىي ھەم ئەخلاقىي مەسئۇلىيەتلىرىنى ئادا قىلىشقا، دەرھال ھەرىكەتكە ئۆتۈشكە ۋە ئىسرائىلىيە رەھبەرلىرىنىڭ پەلەستىنلىك ژۇرنالىستلارغا قاراتقان جىنايەتلىرىگە قارىتا ھېساب بېرىشىنى تەلەپ قىلىشقا چاقىردى.
دوكلاتتا يەنە مۇنداق دېيىلدى:
«ئەركىنلىك كومىتېتى پەلەستىن ژۇرنالىستلىرىنىڭ بارلىق بېسىم ۋە قولغا ئېلىش سىياسەتلىرىگە قارىماي، ئۆزلىرىنىڭ كەسپىي ۋە مىللىي رولىنى داۋاملىق جارى قىلدۇرىدىغانلىقىنى، ژۇرنالىستلارنى نىشانلاشنىڭ ھەقىقەتنى يوشۇرۇش ياكى جىنايەتلەرنى ئاقلاشتا مۇۋەپپەقىيەت قازىنالمايدىغانلىقىنى يەنە بىر قېتىم تەكىتلىدى.»
