ئىران تاشقى ئىشلار مىنىستىرى ئابباس ئاراقچى ئۇرۇش سەۋەبىدىن ئامېرىكا ئىچىدىكى ئىقتىسادىي بېسىمنىڭ ئېشىپ بېرىۋاتقانلىقىنى تەكىتلەپ، ئاپتوموبىل قەرزىنى قايتۇرالماسلىق نىسبىتىنىڭ 30 يىلدىن بۇيانقى ئەڭ يۇقىرى چەككە يەتكەنلىكىنى ئېيتتى.ئۇ ئامېرىكانىڭ ئىرانغا قاراتقان «ئۆز ئىرادەسى بىلەن قوزغىغان ئۇرۇشى» سەۋەبىدىن بارغانسېرى ئېغىرلىشىۋاتقان ئىقتىسادىي ئاقىۋەتلەرگە دۇچار بولۇۋاتقانلىقىنى ئاگاھلاندۇردى.ئۇ جۈمە كۈنى ئېكس (X) سۇپىسىدا ھەمبەھرلىگەن بىر يازمىسىدا، ئامېرىكالىقلارنىڭ تېھران بىلەن بولغان ئۇرۇشنىڭ ئېشىپ بېرىۋاتقان بەدىلىنى ئۈستىگە ئېلىشقا مەجبۇر بولىدىغانلىقىنى بىلدۈردى.ئۇ ئېكستە مۇنداق يازدى: «ئامېرىكالىقلارغا ئۇلارنىڭ ئىرانغا قاراتقان ئۆز ئىرادەسى بىلەن قوزغىغان ئۇرۇشنىڭ تېز سۈرئەتتە ئېشىۋاتقان چىقىملىرىنى ئۈستىگە ئېلىشى كېرەكلىكى ئېيتىلماقتا. بېنزىن باھاسىنىڭ ئۆرلىشى ۋە پاي چېكى بازىرىدىكى كۆپۈكنى بىر چەتكە قايرىپ قويۇڭ. ھەقىقىي قىيىنچىلىق ئامېرىكانىڭ قەرزى ۋە رەنىلىك قەرز (mortgage) ئۆسۈم نىسبىتى ئۆرلەشكە باشلىغاندا باشلىنىدۇ.»ئۇ ئامېرىكا ئىچىدىكى ئېشىۋاتقان ئىقتىسادىي بېسىملارغا ئىشارەت قىلىپ، ئاپتوموبىل قەرزىنى قايتۇرالماسلىق نىسبىتىنىڭ ئاللىقاچان 30 يىلدىن كۆپرەك ۋاقىتتىن بۇيانقى ئەڭ يۇقىرى سەۋىيەگە يەتكەنلىكىنى ئېيتتى.ئۇ ئاخىرىدا: «بۇلارنىڭ ھەممىسىدىن ساقلانغىلى بولاتتى» دېدى.28-فېۋرال (2026) ئامېرىكا بىلەن ئىسرائىلىيە ئىرانغا ھۇجۇم باشلىغاندىن بۇيان رايون ۋەزىيىتى كەسكىنلەشتى. تېھران ئىسرائىلىيەگە، شۇنداقلا ئامېرىكانىڭ پارس قولتۇقىدىكى ئىتتىپاقداشلىرىغا قارىتا ئۆچ ئېلىش ھەرىكىتىنى قوزغىدى، شۇنىڭ بىلەن بىرگە ھورمۇز بوغۇزىنىڭ تاقىلىشىنى كەلتۈرۈپ چىقاردى.پاكىستاننىڭ ۋاسىتىچىلىق قىلىشى بىلەن 8-ئاپرېل (2026) ئۇرۇش توختىتىش كېلىشىمى كۈچكە ئىگە بولغان بولسىمۇ، ئەمما ئىسلامئابادتىكى سۆھبەتلەر ئۇزۇن مۇددەتلىك كېلىشىم ھاسىل قىلالمىدى.ئامېرىكا پىرېزىدېنتى دونالد ترامپ كېيىنچە ئۇرۇش توختىتىش مۇددىتىنى مۇددەتسىز ئۇزارتتى.
