سۈرىيە پىرېزىدېنتى ئەھمەد شارا (شەرئ) بىلەن ئۇكرائىنا پىرېزىدېنتى ۋولودىمىر زېلېنىسكىي نيۇيوركتىكى 80-نۆۋەتلىك ب د ت ئومۇمىي كېڭىشى يىغىنى جەريانىدا سۆھبەت ئۆتكۈزۈپ، سۈرىيە - ئۇكرائىنا دىپلوماتىك مۇناسىۋىتىنى ئەسلىگە كەلتۈردى.
سۈرىيە تاشقى ئىشلار مىنىستىرلىقى چارشەنبە كۈنى قىسقىلا بايانات ئېلان قىلىپ، ئىككى رەھبەرنىڭ ئۇچرىشىشىغا سۈرىيە تاشقى ئىشلار مىنىستىرى ئەسەد ھەسەن شەيبانى ۋە ئۇنىڭ ھەمراھلىقىدىكى بىر ئۆمەكنىڭ قاتناشقانلىقىنى بىلدۈردى.
زېلېنىسكىي ئۇكرائىنا بىلەن سۈرىيەنىڭ دىپلوماتىك مۇناسىۋەتنى ئەسلىگە كەلتۈرۈش توغرىسىدىكى باياناتنى ئىمزالىغانلىقىنى ئېيتتى ھەمدە X سۇپىسىدا: «بۇ مۇھىم قەدەمنى مەمنۇنىيەت بىلەن قارشى ئالىمىز ۋە سۈرىيە خەلقىنى مۇقىملىق يولىدا قوللاشقا تەييارمىز» دېگەنلەرنى قەيت قىلدى.
ئۇ ئۇچۇرىدا يەنە: «سۈرىيە پىرېزىدېنتى ئەھمەد شارا بىلەن ئۆتكۈزگەن سۆھبىتىمىزدە، ھەمكارلىقنى راۋاجلاندۇرۇش ئۈچۈن ئىستىقباللىق ساھەلەر، ھەر ئىككى دۆلەت دۇچ كېلىۋاتقان بىخەتەرلىك تەھدىتلىرى ۋە بۇلارغا تاقابىل تۇرۇشنىڭ مۇھىملىقى قاتارلىق مەسىلىلەرنى تەپسىلىي مۇزاكىرە قىلدۇق» دېگەن ئىبارىلەرگە ئورۇن بەردى.
زېلېنىسكىي ئىككى دۆلەتنىڭ مۇناسىۋىتىنى ئۆزئارا ھۆرمەت ۋە ئىشەنچ ئاساسىدا بەرپا قىلىش توغرىسىدا بىرلىككە كەلگەنلىكىنى سۆزلىرىگە ئىلاۋە قىلدى.
ئۇكرائىنا 2022-يىلى سۈرىيەنىڭ ئۇكرائىنانىڭ شەرقىدىكى رۇسىيەنى قوللايدىغان بۆلگۈنچى دونېتسكى ۋە لۇگانسكى جۇمھۇرىيەتلىرىنى ئېتىراپ قىلىشىدىن كېيىن، سۈرىيە بىلەن بولغان مۇناسىۋىتىنى ئۈزۈپ تاشلىغان ئىدى.
پىرېزىدېنت شارا بىرلەشكەن دۆلەتلەر تەشكىلاتىنىڭ ئەڭ يۇقىرى دەرىجىلىك مۇنبىرىدىن يىللاردىن بۇيان يىراق تۇرۇپ كەلگەن سۈرىيەگە ۋاكالىتەن يىللىق ب د ت يىغىنىغا قاتنىشىش ئۈچۈن يەكشەنبە كۈنى بىر قانچە مىنىستىر بىلەن بىرگە نيۇيوركقا كەلدى.
شارا چارشەنبە كۈنى ئومۇمىي كېڭەشتىكى تۇنجى نۇتقىدا خەلقئارالىق ئېمبارگولارنىڭ ئەمەلدىن قالدۇرۇلۇشىنى تەلەپ قىلدى.
شارا - ترامپ ئۇچرىشىشى
سۈرىيە دۆلەت خەۋەر ئاگېنتلىقى— سانا شارانىڭ نيۇيوركتىكى بىرلەشكەن دۆلەتلەر تەشكىلاتى ئومۇمىي كېڭىشى يىغىنى جەريانىدا ئامېرىكا پىرېزىدېنتى دونالد ترامپ بىلەن كۆرۈشكەنلىكىنى خەۋەر قىلدى.
سانا خەۋەر ئاگېنتلىقى شارانىڭ ترامپ بىلەن قول ئېلىشىپ كۆرۈشكەنلىكىنى بىلدۈرۈپ، يېنىدا بىرىنچى خانىم مېلانىيا ترامپمۇ بولغان بىر پارچە سۈرەتنى ئېلان قىلغاندىن باشقا ئۇچرىشىش ھەققىدىكى تەپسىلاتلارنى ئاشكارىلىمىدى.
بۇ، ئىككى رەھبەرنىڭ ماي ئېيىدا سەئۇدى ئەرەبىستاننىڭ پايتەختى رىيادتا ئۆتكۈزۈلگەن ئۇچرىشىشىدىن كېيىنكى ئىككىنچى قېتىملىق ئۇچرىشىشى بولۇپ ھېسابلىنىدۇ.
