تۈركىيە جۇمھۇرىيىتى تاشقى ئىشلار مىنىستىرى خاقان فىدان ئەنقەرەدە ھاماس سىياسىي بىيۇروسىنىڭ ئەزاسى خەلىل ئەلھايا باشچىلىقىدىكى ھاماس ۋەكىللەر ئۆمىكى بىلەن كۆرۈشتى.
مىنىستىرلىق چارشەنبە كۈنى ئېلىپ بېرىلغان ئۇچرىشىشتا، خاقان فىدان بىلەن ھاماس ۋەكىللەر ئۆمىكىنىڭ غەززەدىكى ئەڭ يېڭى تەرەققىياتلارنى مۇزاكىرە قىلغانلىقىنى بىلدۈردى.
مۇزاكىرىلەردە غەززە تىنچلىق پىلانىنىڭ ئىككىنچى باسقۇچىغا ئالاقىدار پىكىر ئالماشتۇرۇلدى.
خاقان فىدان تۈركىيەنىڭ پەلەستىنلىكلەرنىڭ ھوقۇقىنى «ھەر قانداق مۇنبەردە ئەڭ كۈچلۈك شەكىلدە» داۋاملىق قوغدايدىغانلىقىنى تەكىتلەپ، ۋەكىللەر ئۆمىكىگە تۈركىيەنىڭ ئۇرۇشتا ۋەيران قىلىنغان غەززەدە تۇرالغۇ ئېھتىياجىنى قامداش ۋە ئىنسانپەرۋەرلىك ياردەم يەتكۈزۈش جەھەتتىكى تىرىشچانلىقلىرى ھەققىدە ئۇچۇر بەردى.
ھاماس ۋەكىللەر ئۆمىكى بولسا ئوۇرۇش توختىتىش شەرتلىرىنى ئورۇندىغانلىقىنى، ئەمما ئىسرائىلىيەنىڭ غەززەگە ۋە خەلقىگە قارىتىلغان ھۇجۇملىرىنى داۋاملاشتۇرۇۋاتقانلىقىنى ئېيتتى.
مېھمان ۋەكىللەر ئۆمىكى بۇ خىل پوزىتسىيەنىڭ تىنچلىق پىلانىنىڭ ئىككىنچى باسقۇچىغا ئۆتۈشكە توسقۇنلۇق قىلىشنى مەقسەت قىلىدىغانلىقىنى بىلدۈردى.
ۋەكىللەر ئۆمىكى يەنە، غەززەگە كىرىشىگە رۇخسەت قىلىنغان يۈك ئاپتوموبىللىرىنىڭ %60 تىنىڭ سودا ماللىرىنى توشۇيدىغانلىقىنى تىلغا ئېلىپ، رايونغا كىرىۋاتقان ئىنسانپەرۋەرلىك ياردەم مىقدارىنىڭ جىددىي ئېھتىياجلارنى قامداشتىن تېخىچە ئىنتايىن يىراق ئىكەنلىكىنى تەكىتلىدى.
ھاماس ۋەكىللىرى ئالاھىدە تۈردە ئاساسىي ئېھتىياج بۇيۇملىرى، دورا-دەرمەك، پاناھلىنىش ماتېرىياللىرى ۋە يېقىلغۇ مەسىلىسىدىكى قىسچىلىقلار تەرەپكە دىققەت تارتتى.
يىغىندا يەنە پەلەستىنلىك گۇرۇپپىلار ئارىسىدا داۋاملىشىۋاتقان يارىشىش مۇساپىسىدىكى تەرەققىياتلار ۋە ئىشغال ئاستىدىكى غەربىي قىرغاقنىڭ ۋەزىيىتى مۇزاكىرە قىلىندى.
سۆھبەت جەريانىدا ئىسرائىلىيەنىڭ ئىشغالىيەت ئاستىدىكى غەربىي قىرغاقتا سادىر قىلىۋاتقان قىلمىشلىرى «قوبۇل قىلغىلى بولمايدىغان ئەھۋال» دەپ سۈپەتلەندى.
