قايتىدىن پارتلىغان تايلاند – كامبودژىيە چېگرا توقۇنۇشلىرى چارشەنبە كۈنى 11-كۈنىگە قەدەم قويدى. 7-دېكابىر قايتا ئەۋج ئالغان بۇ توقۇنۇشلار، ھازىرغىچە ھەر ئىككى تەرەپتىن كەم دېگەندە 52 كىشىنىڭ جېنىغا زامىن بولدى.

«خمېر تايمىس» (Khmer Times) گېزىتىنىڭ خەۋىرىگە ئاساسلانغاندا، كامبودژىيە مۇداپىئە مىنىستىرلىقى چارشەنبە كۈنى بايانات ئېلان قىلىپ، تايلاند ئارمىيەسىنىڭ چېگرا رايونىغا زەمبىرەك ۋە ئۇچقۇچىسىز ھاۋا ئاپپاراتى ئارقىلىق ھۇجۇم قىلغانلىقىنى بىلدۈرگەن.

مىنىستىرلىق يەنە، كامبودژىيە كۈچلىرىنىڭ تايلاند ئىستىھكاملىرىغا «BM-21» تىپلىق راكېتالار بىلەن قايتۇرما زەربە بەرگەنلىكىنىمۇ دەلىللىدى.

ئاممىۋى تاراتقۇ «Thai PBS»نىڭ خەۋىرىگە قارىغاندا، بۇ ۋەقەلەر تايلاند ئەسكەرلىرىنىڭ شىددەتلىك ئېتىشىشلاردىن كېيىن، «چوڭ ئان ما» رايونىنى قولغا كىرگۈزۈشىنىڭ ئارقىسىدىنلا يۈز بەرگەن.

ئۇرۇش توختىتىش تەلەپلىرى

تايلاند تەرەپ سەيشەنبە كۈنى، 700 مىڭدىن ئارتۇق ئادەمنىڭ يۇرت-ماكانسىز قېلىشىغا سەۋەب بولغان بۇ قانلىق توقۇنۇشلارنى ئاخىرلاشتۇرۇش ئۈچۈن، ئالدى بىلەن كامبودژىيە تەرەپنىڭ ئۇرۇش توختىتىش ئېلان قىلىشى كېرەكلىكىنى ئوتتۇرىغا قويدى.

تايلاند تاشقى ئىشلار مىنىستىرلىقى باياناتچىسى مارانتى نالىتا ئاندامو، ھەر قانداق بىر ئۇرۇش توختىتىشنىڭ ئىشەنچلىك بولۇشى ۋە مەلۇم شەرتلەرنى ھازىرلىشى كېرەكلىكىنى بىلدۈرۈپ، كامبودژىيەنى توقۇنۇشنى ئاخىرلاشتۇرۇش ئۈچۈن «چېگرا لىنىيەسىدىكى مىنا تازىلاش خىزمەتلىرىدە سەمىمىي ھەمكارلىشىش»قا چاقىردى.

تايلاند ئەمەلدارلىرىنىڭ مەلۇماتىغا قارىغاندا، ھازىرغىچە 19 نەپەر تايلاند ئەسكىرى ۋە 16 نەپەر پۇقرا ھاياتىدىن ئايرىلغان. كامبودژىيە ئىچكى ئىشلار مىنىستىرلىقى بولسا، 17 نەپەر كامبودژىيەلىك پۇقرانىڭ ئۆلگەنلىكىنى ۋە 77 كىشىنىڭ يارىلانغانلىقىنى خەۋەر قىلدى.

تىنچلىق كېلىشىمى توختاپ قالدى

ئامېرىكا قوشما ئىشتاتلىرى پىرېزىدېنتى دونالد ترامپنىڭ جۈمە كۈنى تايلاند ۋە كامبودژىيە رەھبەرلىرىنىڭ قايتا باشلانغان توقۇنۇشلارنى توختىتىش بويىچە كېلىشىم ھاسىل قىلغانلىقىنى تىلغا ئالغان بولسىمۇ، توقۇنۇشلار يەنىلا داۋاملاشماقتا.

ئىككى دۆلەت ئۆكتەبىر ئېيىدا كۇئالالامپۇردا، ترامپ ۋە مالايشىيا باش مىنىستىرى ئەنۋەر ئىبراھىمنىڭ گۇۋاھلىقىدا بىر تىنچلىق كېلىشىمى ئىمزالىغان ئىدى؛ بىراق چېگرادىكى بىر ئۆلكىدە يۈز بەرگەن مىنا پارتلاش ۋەقەسىدە تايلاند ئەسكەرلىرىنىڭ ئېغىر يارىلىنىشى تۈپەيلىدىن، بۇ كېلىشىم كېيىنچە توختىتىپ قويۇلدى.

تايلاند دائىرىلىرى يەنە، يېقىنقى بەش ئاي ئىچىدە يۈز بەرگەن ۋەقەلەر سەۋەبىدىن تەخمىنەن 18 نەپەر كامبودژىيە ئەسكىرىنىڭ تايلاند تەرىپىدىن تۇتۇپ تۇرۇلۇۋاتقانلىقىنى ئاشكارىلىدى.

تايلاند بىلەن كامبودژىيە ئوتتۇرىسىدىكى ئۇزۇن يىللىق چېگرا تالاش-تارتىشى پات-پات قوراللىق توقۇنۇشقا ئايلىنىپ تۇرىدىغان بولۇپ، ئىيۇل ئېيىدىكى توقۇنۇشلاردا كەم دېگەندە 48 كىشى ھاياتىدىن ئايرىلغان ئىدى.