تۈركىيە جۇمھۇر رەئىسى رەجەپ تاييىپ ئەردوغان ئامېرىكا پىرېزىدېنتى دونالد ترامپ بىلەن مۇزاكىرە ئۆتكۈزۈش ئۈچۈن ۋاشىنگتونغا يېتىپ باردى.
ترامپ پەيشەنبە كۈنى ئاق سارايدا ئەردوغاننى كۈتۈۋالىدۇ، ئىككى تەرەپ ئۆزئارا مۇناسىۋەت ۋە رايون خاراكتېرلىك مەسىلىلەرنى مۇزاكىرە قىلىدۇ.
ئىككى رەھبەرنىڭ سودا، مەبلەغ سېلىش ۋە دۆلەت مۇداپىئە سانائىتى قاتارلىق مەسىلىلەرنى مۇزاكىرە قىلىشى مۆلچەرلەنمەكتە.
ئەردوغان ئىلگىرىكى بىر باياناتىدا: «پىرېزىدېنت ترامپ بىلەن ئۆتكۈزۈلىدىغان ئۇچرىشىشىمىزنىڭ، ئورتاق يەرشارىۋى تىنچلىق نىشانىمىز دائىرىسىدە رايونىمىزدىكى ئۇرۇش ۋە توقۇنۇشلارنى توختىتىشقا تۆھپە قوشىدىغانلىقىغا، دۆلەتلىرىمىز ئوتتۇرىسىدىكى ھەمكارلىقنى تېخىمۇ كۈچەيتىدىغانلىقىغا ئىشىنىمەن» دېگەنىدى.
ئەردوغان بۇ يىللىق ب د ت ئومۇمىي كېڭىشى يىغىنىغا قاتنىشىش ئۈچۈن بارغان نيۇيورك شەھىرىدە، سەيشەنبە كۈنى ترامپ ۋە ئۇنىڭ رەپىقىسى مېلانىيا ترامپ تەرىپىدىن دۆلەت باشلىقلىرى ۋە ئۇلارنىڭ رەپىقىلىرىنىڭ ھۆرمىتىگە ئۆتكۈزۈلگەن بىر زىياپەتكە قاتناشتى.
ئەردوغان يەنە سەيشەنبە كۈنى ترامپ بىلەن بىرلىكتە ئومۇمىي كېڭەش يىغىنى جەريانىدا ئۆتكۈزۈلگەن غەززە مەسىلىسى توغرىسىدىكى كۆپ تەرەپلىك يىغىنغا قاتناشتى.
مەزكۇر يېپىق يىغىن ھەققىدە ھېچقانداق ئۇچۇر بېرىلمىدى، ئەمما ئەردوغان يىغىندىن كېيىن سۆھبەتنىڭ «ئىنتايىن ئۈنۈملۈك ۋە ئىجابىي» بولغانلىقىنى بىلدۈرۈپ، مەمنۇنلۇقىنى ئىپادىلىدى.
ئەردوغان نيۇيوركتىكى تۈرك دىپلوماتىيە مەركىزى بولغان «تۈرك ئۆيى» ئالدىدا مۇخبىرلارغا: «بىز ئىنتايىن ئۈنۈملۈك ۋە گۈزەل بىر يىغىننى تاماملىدۇق. نەتىجىسى خەيرلىك بولسۇن» دېدى.
ئەردوغان ۋاشىنگتوندا تۇرغان مەزگىلىدە، ئامېرىكا پىرېزىدېنتىنىڭ رەسمىي مېھمانخانىسى بولغان «بلېيىر ئۆيى» دە تۇرىدۇ.
