ئىسرائىلىيە مۇداپىئە مىنىستىرلىقى، 2023-يىلى ئۆكتەبىردىن بۇيان ھاۋا ۋە دېڭىز يولى ئارقىلىق 120 مىڭ توننىدىن ئارتۇق قورال، ئۈسكۈنە ۋە قوغداش ماتېرىياللىرىنىڭ ئىسرائىلىيەگە تاپشۇرۇلغانلىقىنى بىلدۈردى.
ئىسرائىلىيە مۇداپىئە مىنىستىرلىقى، غەززەدىكى ئىرقىي قىرغىنچىلىق باشلانغاندىن بۇيان، غەربتىكى دۆلەتلەردىن ئىسرائىلىيەگە بېرىلگەن ھەربىي ياردەم دائىرىسىدە قۇرۇلغان ھاۋا لىنىيەسىدىن، 1000-ئايروپىلاننىڭ دۆلەتكە قونغانلىقىنى ئېلان قىلدى.
بۇ سان بىلەن بىرگە 2023-يىلى 8-ئۆكتەبىردىن بۇيان ئىسرائىلىيەگە تاپشۇرۇلغان ھەربىي يۈك 120 مىڭ توننىدىن ئاشتى.
مەزكۇر بايانات چارشەنبە كۈنى ئېلان قىلىندى.
باياناتتا، ئامېرىكانىڭ غەززەدە ئېلىپ بېرىۋاتقان ئۇرۇشتا ئىسرائىلىيەگە ياردەم بېرىشنى داۋاملاشتۇرۇۋاتقانلىقى ۋە بەزى غەرب ھۆكۈمەتلىرىنىڭ ئىسرائىلىيەنىڭ ھەرىكەتلىرىنى تەنقىد قىلىپ، قورال ئېكسپورت قىلىش مەسىلىسىدە چەكلىمىلەرنى قويغانلىقى تەكىتلەندى.
ئىسپانىيە سېنتەبىر ئېيىدا ئىسرائىلىيەگە قارىتىلغان تولۇق قورال ئېمبارگوسىنى مەزمۇن قىلغان بىر پادىشاھلىق قارارنامىسىنى ئېلان قىلغان ئىدى. ئۆتكەن يىلى بولسا ئەنگلىيە، گېرمانىيە ۋە كانادا ئىسرائىلىيەگە قىلىنىدىغان قورال يەتكۈزۈش ئىشلىرىغا چەكلىمىلەرنى قويغان ئىدى.
ئىسرائىلىيە مۇداپىئە مىنىستىرلىقىنىڭ باياناتىدا: «ئۇرۇش پارتلىغاندىن كېيىنلا باشلانغان كەڭ كۆلەملىك ھەربىي ئۈسكۈنە ۋە قورال يۆتكەش ھاۋا ھەربىي ھەرىكىتىنىڭ 1000-ئايروپىلانى ئىسرائىلىيەگە قوندى» دېيىلدى ۋە بۇ ھەربىي ھەرىكەت ئىسرائىلىيە تارىخىدا «مىسلى كۆرۈلمىگەن» دەپ تەسۋىرلەندى.
مىنىستىرلىق، كۆپ مىقداردا ھەربىي ئۈسكۈنە ئېلىپ ماڭغان بۇ ئايروپىلاننىڭ مۇداپىئە مىنىستىرلىقى باش مۇدىرى گېنېرال-لېيتېنانت ئامىر بارام تەرىپىدىن قارشى ئېلىنغانلىقىنى بىلدۈردى.
باياناتتا: «بۈگۈنگىچە 1000 ئايروپىلان ۋە تەخمىنەن 150 دېڭىز قاتناش ۋاستىسى ئارقىلىق ئىسرائىلىيەگە 120 مىڭ توننىدىن ئارتۇق ھەربىي ئۈسكۈنە، ئوق-دورا، قورال سىستېمىلىرى ۋە قوغداش ماتېرىياللىرى توشۇلدى» دېگەن ئىبارىگە ئورۇن بېرىلدى.
باياناتتا توشۇلغان يۈكلەرنىڭ مەنبەسى ھەققىدە تەپسىلات بېرىلمىدى. ھالبۇكى، بۇ ھەرىكەتنىڭ مۇداپىئە مىنىستىرلىقى تەمىنلەش باشقارمىسى قارىمىقىدىكى خەلقئارا مۇداپىئە توشۇش بىرلىكى ئارقىلىق، مىنىستىرلىقنىڭ ئامېرىكا ۋە بېرلىن ۋەكىللىكلىرى، ئارمىيەنىڭ پىلانلاش ۋە كۈچ ئورنىتىش باشقارمىسى بىلەن ئىسرائىلىيە ھاۋا ئارمىيەسى تەرىپىدىن ئورتاق باشقۇرۇلغانلىقى بىلدۈرۈلدى.
ۋاشىنگتوننى مەركەز قىلغان «مەسئۇلىيەتچان دۆلەتچىلىك ئۈچۈن كۋىنسى ئىنستىتۇتى» (Quincy Institute for Responsible Statecraft) نىڭ ئۆكتەبىر ئېيىدا ئېلان قىلغان بىر دوكلاتى، ئامېرىكانىڭ غەززەدە ئىرقىي قىرغىنچىلىق باشلانغاندىن بۇيان ئىسرائىلىيەگە كەم دېگەندە 21.7 مىليارد دوللارلىق ھەربىي ياردەم تەمىنلىگەنلىكىنى يازدى.
دوكلاتقا ئاساسلانغاندا، ئامېرىكا 2023-يىلى 7-ئۆكتەبىردىن كېيىن، سابىق پىرېزىدېنت جو بايدىن مەزگىلىدە 17.9 مىليارد دوللار، ھازىرقى پرېزىدېنت دونالد ترامپ مەزگىلىدە بولسا 3.8 مىليارد دوللار ھەربىي ياردەم تەمىنلىگەن. بۇ ياردەملەرنىڭ بىر قىسمى تاپشۇرۇلغان بولۇپ، قالغىنى كېلەر يىللاردا ئىسرائىلىيەگە يەتكۈزۈلىدۇ.
دوكلات، ئامېرىكا ياردىمى بولماستىن ئىسرائىلىيەنىڭ غەززەدىكى ئىرقىي قىرغىنچىلىقىنى داۋاملاشتۇرالمايدىغانلىقىنى بىلدۈردى.
ئىسرائىلىيە ئارمىيەسىنىڭ 2023-يىلى ئۆكتەبىردىن بۇيان غەززەدە كۆپىنچىسى ئاياللار ۋە كىچىك بالىلار بولۇپ تەخمىنەن 70 مىڭ كىشىنى ئۆلتۈرگەنلىكى، 170 مىڭدىن ئارتۇق كىشىنى يارىلاندۇرغانلىقى ۋە رايوننىڭ چوڭ بىر قىسمىنى ۋەيران قىلغانلىقىنى بىلدۈرۈلمەكتە.
