ئىرقىي قىرغىنچى نېتانياھۇ ئىسرائىلىيەنىڭ ئىرانغا قارشى ئېلىپ بېرىۋاتقان ئۇرۇشىنى «پۈتۈن كۈچى» بىلەن داۋاملاشتۇرىدىغانلىقىنى ئېيتتى ۋە ئامېرىكا بىلەن بىرلىكتە بىر ھەپتىدىن بېرى داۋاملىشىۋاتقان ھۇجۇملاردىن كېيىن، تېھران ئۈستىدە پۈتۈنلەي دېگۈدەك ھاۋا كونتروللۇقىنى قولغا كەلتۈرگەنلىكىنى ئىلگىرى سۈردى.
نېتانياھۇ يەكشەنبە كۈنى تېلېۋىزوردا ئېلان قىلغان باياناتىدا: «ئىران ھاكىمىيىتىنى يوقىتىش ۋە نۇرغۇن باشقا نىشانلارغا يېتىش ئۈچۈن سىستېمىلىق پىلانىمىز بار» دېدى. ئۇ يەنە: «ۋەتەنداشلار، سىلەر ماڭا، ھۆكۈمەتكە ۋە قەھرىمان ئەسكەرلىرىمىزگە ئۇرۇشنى تاكى غەلىبە قىلغۇچە داۋاملاشتۇرۇشىمىزنى ئېيتىۋاتىسىلەر، بۇنىڭ ئۈچۈن رەھمەت ئېيتىمەن. سىلەرگە شۇنىڭغا كاپالەتلىك قىلالايمەنكى، بىز پۈتۈن كۈچىمىز بىلەن داۋاملاشتۇرىمىز» دېگەن سۆزلەرنى قىلدى.
قاتىل نېتانياھۇ ئىسرائىلىيەلىك ۋە ئامېرىكالىق ئۇچقۇچىلار ئېلىپ بارغان بومباردىمان ھەرىكىتى سايىسىدە ئىراننىڭ پايتەختى ئۈستىدە «پۈتۈنلەي دېگۈدەك ھاۋا بوشلۇقى كونتروللۇقىنى قولغا كەلتۈرگەنلىكىنى» ئېيتتى.
ئوتتۇرا شەرقنىڭ قىياپىتى ئۆزگەردى
ئىران خەلقىگىمۇ خىتاب قىلغان نېتانياھۇ، «ھەقىقەت پەيتى» نىڭ يېقىنلاشقانلىقىنى ئېيتتى. ئۇ: «ئىسرائىلىيە، 7-ئۆكتەبىر ۋەقەلىرىدىن كېيىن ۋەدە بەرگىنىمىزدەك ئوتتۇرا شەرقنىڭ قىياپىتىنى ئۆزگەرتتى ۋە شۇنىڭ بىلەن بىر ۋاقىتتا ئۆزىنىمۇ ئۆزگەرتتى» دېدى. نېتانياھۇ ئىسرائىلىيەنىڭ دۈشمەنلىرىنى يوقىتىش ئۈچۈن خەتەرلىك قارارلارنى چىقارغانلىقىنىمۇ دەۋا قىلدى.
28-فېۋرالدىن بېرى ئىسرائىلىيە ۋە ئامېرىكا ئىرانغا قارىتا ھۇجۇملارنى تەشكىللىمەكتە. بۇ ھۇجۇملاردا ئىراننىڭ ئالىي رەھبىرى ئەلى ھامانىي بىلەن بىرلىكتە بەزى خەۋپسىزلىك ئەمەلدارلىرىنى ئۆز ئىچىگە ئالغان يۈزلىگەن كىشى ھاياتىدىن ئايرىلدى. تېھران بولسا بۇنىڭغا جاۋابەن ئىسرائىلىيەگە قارىتا نۇرغۇن باشقۇرۇلىدىغان بومبا ۋە ئۇچقۇچىسىز ئايروپىلان ھۇجۇملىرىنى باشلىدى. ئۆچ ئېلىش سۈپىتىدە ئىران يەنە پارس قولتۇقى دۆلەتلىرى ۋە ئىيوردانىيەدىكى ئامېرىكا بازىلىرىنىمۇ نىشانلىدى.
