خىتاي دۈشەنبە كۈنى تۈركىيە بىلەن قاتارنىڭ پاكىستان بىلەن ئافغانىستان ئوتتۇرىسىدا ئۇرۇش توختىتىشنى مۇۋەپپەقىيەتلىك ئەمەلگە ئاشۇرۇشتىكى ۋاسىتىچىلىك رولىغا يۇقىرى باھا بەردى.

خىتاي تاشقى ئىشلار مىنىستىرلىقىنىڭ باياناتچىسى گو جيەنكۈن بېيجىڭدا مۇخبىرلارغا: «پاكىستانمۇ، ئافغانىستانمۇ خىتاينىڭ ئەنئەنىۋى دوست دۆلەتلىرى ۋە قوشنىلىرىدۇر، بۇ ئىككى دۆلەت مەڭگۈ بىر-بىرىنىڭ قوشنىسى بولۇپ قالىدۇ» دېدى.

ئۇ تۈركىيە بىلەن قاتارنىڭ ۋاسىتىچىلىكىنى تىلغا ئېلىپ، خىتاينىڭ ئىككى دۆلەت ئوتتۇرىسىدىكى ئۇرۇش توختىتىشنى قارشى ئالىدىغانلىقىنى ۋە مۇناسىۋەتلىك دۆلەتلەرنىڭ بۇ جەھەتتىكى تۆھپىسىنى يۇقىرى باھالايدىغانلىقىنى بىلدۈردى.

قاتار بىلەن تۈركىيەنىڭ ۋاسىتىچىلىكىدە دوھادا ئۆتكۈزۈلگەن سۆھبەتلەر جەريانىدا، ئىسلامئاباد بىلەن كابۇل يەكشەنبە كۈنى دەرھال ئۇرۇش توختىتىش توغرىسىدا پىكىر بىرلىكى ھاسىل قىلدى. بۇ نەتىجە، ئىككى دۆلەت ئوتتۇرىسىدا ئادەم ئۆلۈشىنى كەلتۈرۈپ چىقارغان چېگرا جىددىيچىلىكىدىن كېيىن قولغا كەلتۈرۈلدى.

ئىككى دۆلەت ئوتتۇرىسىدىكى كېيىنكى قەدەملىك تەپسىلىي سۆھبەت 25-ئۆكتەبىر كۈنى ئىستانبۇلدا ئۆتكۈزۈلىدۇ.

باياتچى گو، خىتاينىڭ پاكىستان بىلەن ئافغانىستاننىڭ «ئىختىلاپلارنى دىيالوگ ئارقىلىق ھەل قىلىشىنى، ئۇزاق مۇددەتلىك ئۇرۇش توختىتىشنى ئىشقا ئاشۇرۇپ، ئىككى دۆلەت ۋە رايوننىڭ تىنچلىقى ھەم مۇقىملىقىغا كاپالەتلىك قىلىشىنى چىن دىلىدىن ئۈمىد قىلىدىغانلىقىنى» تەكىتلەپ: «خىتاي ئىككى دۆلەتنىڭ مۇناسىۋىتىنى ياخشىلاش ۋە تەرەققىي قىلدۇرۇش ئۈچۈن ئىجابىي رول ئويناشقا تەييار» دېگەنلەرنى قەيت قىلدى.