رۇسىيە دۆلەت مۇداپىئە مىنىستىرلىقى پەيشەنبە كۈنى قىلغان باياناتىدا، ئۇكرائىناغا تەۋە 1214 ئۇچقۇچىسىز ئايروپىلاننىڭ كېچىچە رۇسىيەنىڭ 20 رايونىنى نىشان قىلغانلىقىنى بىلدۈردى.
بۇ سان، رۇسىيەنىڭ ئىلگىرى خاتىرىلىگەن ئەڭ چوڭ ھۇجۇمى بولغان ۋە 20-سېنتەبىردە ئۇكرائىنا 1110 ئۇچقۇچىسىز ئايروپىلان ئىشلەتكەن ھۇجۇمدىنمۇ ئېشىپ كەتتى.
مىنىستىرلىقتىن ئېلان قىلىنغان باياناتتا: «كېچىچە ھاۋا مۇداپىئەسى ۋەزىپىسىنى ئىجرا قىلىۋاتقان قىسىملار، ئۇكرائىناغا تەۋە 1214 مۇقىم قاناتلىق ئۇچقۇچىسىز ئايروپىلاننى بايقاپ ۋەيران قىلدى» دېيىلدى.
موسكۋا شەھەر باشلىقى سېرگېي سوبيانىن كېچىچە پايتەخت رايونىنى 613 ئۇچقۇچىسىز ئايروپىلاننىڭ نىشان قىلغانلىقىنى بىلدۈردى.
سوبيانىن رۇسىيە ئىجتىمائىي تاراتقۇ سۇپىسى مەكس (Max) ئارقىلىق ئېلان قىلغان باياناتىدا: «بۇلارنىڭ كۆپ قىسمى دۆلەت مۇداپىئە مىنىستىرلىقىغا قاراشلىق ھاۋا مۇداپىئە سىستېمىلىرى تەرىپىدىن شەھەرگە تېخى يېقىنلاشماستىنلا ئۇجۇقتۇرۇلدى» دېگەن سۆزلەرنى ئىشلەتتى.
سوبيانىن شۇ چاغدا موسكۋاغا يېقىنلاشقان 231 ئۇچقۇچىسىز ئايروپىلاننىڭ ۋەيران قىلىنغانلىقىنى قەيت قىلدى.
رۇسىيە ئاممىۋى ئاۋىياتسىيە ئىدارىسى روساۋىياتسىيا «ئۇچۇش بىخەتەرلىكىگە كاپالەتلىك قىلىش» مەقسىتىدە موسكۋادىكى ۋنۇكوۋو، دومودېدوۋو ۋە جۇكوۋسكىي ئايرودۇرۇملىرىدا قونۇش ۋە ئۇچۇشلارغا ۋاقىتلىق چەكلىمە قويۇلغانلىقىنى ئۇقتۇردى. بۇ چەكلىمىلەر كېيىنچە بىكار قىلىندى.
ھاۋا قاتناش كونترول مۇلازىمەتلىرىدىكى بىر مەنبە، TASS خەۋەر ئاگېنتلىقىغا بەرگەن مەلۇماتىدا، ۋنۇكوۋو ئايرودۇرۇمىدىكى چەكلىمىلەر سەۋەبىدىن ئىستانبۇلدىن موسكۋاغا ئۇچقان ئىككى ئايروپىلاننىڭ ھاۋادا كەينىگە يېنىپ ئىستانبۇلغا قونغانلىقىنى بىلدۈردى.
خەۋەردە، رۇسىيەنىڭ باشقا 18 شەھىرىدىكى ئايرودۇرۇملاردىمۇ قونۇش ۋە ئۇچۇشلارغا چەكلىمە قويۇلغانلىقى بىلدۈرۈلدى.
داۋاملىشىۋاتقان توقۇنۇشلار سەۋەبىدىن مۇستەقىل مەنبەلەر تەرىپىدىن جەزملەشتۈرۈلمىگەن بۇ دەۋالارغا ئالاقىدار ئۇكرائىنا تەرەپتىن تېخىچە بىرەر بايانات ئېلان قىلىنمىدى.
