ئامېرىكا تاشقى ئىشلار مىنىستىرلىقى، ئىراققا تىك ئۇچار ئايروپىلان ۋە مۇناسىۋەتلىك ھەربىي ئۈسكۈنىلەرنى ئۆز ئىچىگە ئالغان 800 مىليون دوللارلىق قورال سېتىپ بېرىش قارارىنى تەستىقلىدى. مەزكۇر ياردەم پىلانى «Bell 412EPX» ۋە «Bell 407M» تىپلىق تىك ئۇچار ئايروپىلانلار، ئاپتوماتلار، راكېتا سىستېمىلىرى، لازېرلىق سېنزورلار ۋە سىمسىز ئالاقە ئۈسكۈنىلىرىنى ئۆز ئىچىگە ئالىدۇ. مىنىستىرلىقنىڭ بىلدۈرۈشىچە، بۇ سودا يەنە ئۇچقۇچىلارنى تەربىيەلەش، تېخنىكىلىق قوللاش ۋە ئەشيا ئوبوروتى مۇلازىمىتىنىمۇ ئۆز ئىچىگە ئالىدىغان بولۇپ، ئىراقنىڭ ھاۋادىن قۇرۇقلۇققا زەربە بېرىش، چارلاش ۋە توشۇش ئىقتىدارىنى ئۆستۈرۈشنى نىشان قىلىدىكەن. ئامېرىكا بۇ قەدەم ئارقىلىق ئىراقنىڭ نۆۋەتتىكى ۋە كەلگۈسىدىكى تەھدىتلەرگە تاقابىل تۇرۇش كۈچىنى ئاشۇرۇپ، ئۆزىنىڭ رايوندىكى ئىستراتېگىيەلىك مەنپەئەتلىرىنى قوغداشنى مەقسەت قىلىدىكەن.