بۇ ھۇجۇمدا بەش ھاماس ئەمەلدارى ۋە قاتارلىق بىر بىخەتەرلىك خادىمى ھاياتىدىن ئايرىلدى.
تۈركىيە جۇمھۇر رەئىسى رەجەپ تاييىپ ئەردوغان دۈشەنبە كۈنى قاتاردا زىيارەتتە بولماقتا. ئەردوغان بۇ زىيارەت دائىرىسىدە، ئۆتكەن ھەپتە ئىسرائىلىيەنىڭ دوھاغا قىلغان ھۇجۇمىدىن كېيىن چاقىرىلغان ئەرەب-ئىسلام باشلىقلار يىغىنىغا قاتناشماقتا.
جۇمھۇر رەئىس ئەردوغاننىڭ قاتار زىيارىتىدە، ئۇنىڭغا رەپىقىسى ئەمىنە ئەردوغان، تۈركىيە مىللىي ئىستىخبارات ئىدارىسىنىڭ باشلىقى ئىبراھىم قالىن، ئەردوغاننىڭ تاشقى سىياسەت ۋە بىخەتەرلىك ئىشلىرى باش مەسلىھەتچىسى ئاكىف چاغىتاي قىلىچ، تۈركىيە جۇمھۇرىيىتى جۇمھۇر رەئىسلىك مەھكىمىسى ئۇچۇر – ئالاقە ئىشلىرى ئىدارىسى باشلىقى بۇرھانەتتىن دۇران، ئادالەت ۋە تەرەققىيات پارتىيەسى مۇئاۋىن رەئىسى خالىت يەرەباقان قاتارلىقلار ھەمراھ بولماقتا.
دوھادىكى ئەرەب-ئىسلام باشلىقلار يىغىنى رايوندىكى دۆلەت باشلىقلىرى ۋە يۇقىرى دەرىجىلىك ئەمەلدارلارنى بىر يەرگە جەم قىلماقتا.
يىغىن ئۆتكۈزۈش چاقىرىقى، ئىسرائىلىيەنىڭ ئۆتكەن ھەپتە ھاماس رەھبەرلىرىنى نىشان قىلغان ۋە بەش ھاماس ئەمەلدارى بىلەن قاتارلىق بىر بىخەتەرلىك خادىمىنىڭ جېنىغا زامىن بولغان ھۇجۇمىغا جاۋابەن قاتار تەرىپىدىن ئوتتۇرىغا قويۇلدى.
قاتار باش مىنىستىرى، قوشۇمچە تاشقى ئىشلار مىنىستىرى شەيخ مۇھەممەد بىن ئابدۇررەھمان ئەلسانى يەكشەنبە كۈنى ئۆتكۈزۈلگەن يىغىندا مۇنداق دېدى:
«خەلقئارا جەمئىيەتنىڭ ئەمدى قوش ئۆلچەم قوللىنىشنى توختىتىپ، سادىر قىلغان بارلىق جىنايەتلىرى ئۈچۈن ئىسرائىلىيەنى جازالىشى كېرەك.
دەرۋەقە بۇ ھاكىمىيەت قاتار، لىۋان، ئىراق، ئىران ۋە يەمەننى ئۆز ئىچىگە ئالغان نۇرغۇن ئىسلام دۆلەتلىرىگە ھۇجۇم قىلدى، خالىغىنىنى قىلىۋاتىدۇ. تولىمۇ ئەپسۇسكى، ئامېرىكا قوشما ئىشتاتلىرى ۋە ياۋروپا دۆلەتلىرىمۇ ئىسرائىلىيەنىڭ بۇ ھەرىكەتلىرىنى قوللاۋاتىدۇ.»
قاتار ئامېرىكا ۋە مىسىر بىلەن بىرلىكتە، ئىسرائىلىيەنىڭ 2023-يىلى ئۆكتەبىردىن بۇيان غەززەدە داۋاملاشتۇرۇۋاتقان ۋە تەخمىنەن 65 مىڭ پەلەستىنلىكنىڭ جېنىغا زامىن بولغان ئۇرۇشنى ئاخىرلاشتۇرۇشقا ئائىت سۆھبەتلەردە مۇرەسسەچىلىك رولىنى جارى قىلدۇرۇپ كەلمەكتە.
