دۆلەت تاراتقۇلىرىنىڭ چارشەنبە كۈنى خەۋەر قىلىشىچە، خىتاي بىلەن كولومبىيە رەھبەرلىرى بېيجىڭدا ئۇچراشقاندىن كېيىن، «بىر بەلباغ بىر يول» قۇرۇلۇشى ئورتاق ھەمكارلىق پىلانى ئىمزالىغان.
يېقىنقى يىللاردا كۈچىيىۋاتقان سودا، بېيجىڭنىڭ لاتىن ئامېرىكاسى ۋە كارىب دېڭىزى رايونلىرىدىكى تەسىرىنى كېڭەيتىشىگە ياردەم بەردى. بۇ رايون، ئامېرىكا قوشما ئىشتاتلىرى ئۈچۈن ئىستراتېگىيەلىك ئەھمىيەتكە ئىگە. خىتاي، كولومبىيەنىڭ ئامېرىكا قوشما ئىشتاتلىرىدىن قالسا ئىككىنچى چوڭ سودا ھەمراھى بولۇپ، يېقىندا كولومبىيەنىڭ ئەڭ چوڭ ئىمپورت مەنبەسىگە ئايلىنىپ ئامېرىكا قوشما ئىشتاتلىرىنىڭ ئالدىغا ئۆتۈپ كەتتى.
شىنخۇا ئاگېنتلىقىنىڭ خەۋىرىگە ئاساسلانغاندا، خىتاي دۆلەت رەئىسى شى جىنپىڭ كولومبىيە پىرېزىدېنتى گۇستاۋو پېتروغا، خىتاينىڭ كولومبىيەدىن تېخىمۇ كۆپ ئەلا سۈپەتلىك مەھسۇلات ئىمپورت قىلىشقا، خىتاي شىركەتلىرىنىڭ كولومبىيەدە مەبلەغ سېلىشىنى ۋە تىجارەت قىلىشىنى قوللاشقا ھەمدە ئۇل ئەسلىھە قۇرۇلۇشىغا قاتنىشىشقا تەييار ئىكەنلىكىنى بىلدۈرگەن.
9.2 مىليارد دوللارلىق قەرز
كولومبىيە تاشقى ئىشلار مىنىستىرلىقى چارشەنبە كۈنى بايانات ئېلان قىلىپ، خىتاي بىلەن تۈزۈلگەن مەزكۇر كېلىشىمنى «تارىخىي» دەپ ئاتىدى. مىنىستىرلىق X ئىجتىمائىي ئالاقە سۇپىسىدا ئېلان قىلغان باياناتىدا: «كولومبىيە بىلەن خىتاي بۈگۈن <بىر بەلباغ بىر يول> قۇرۇلۇشى دائىرىسىدە ھەمكارلىق پىلانى ئىمزالىدى» دېگەن ئىبارىلەرگە ئورۇن بەردى ۋە بۇنىڭ «ھەر ئىككى دۆلەت ئۈچۈن مەبلەغ سېلىش، تېخنىكىلىق ھەمكارلىق ۋە سىجىل تەرەققىيات ساھەسىدە يېڭى پۇرسەتلەرنى يارىتىدىغان تارىخىي بىر قەدەم» ئىكەنلىكىنى تەكىتلىدى.
بۇ كېلىشىم بېيجىڭدا لاتىن ئامېرىكاسى رەھبەرلىرىنىڭ ئۇچرىشىشى جەريانىدا تۈزۈلدى. بۇ ئۇچرىشىشتا شى جىنپىڭ يەنە «تەرەققىيات» ئۈچۈن 9.2 مىليارد دوللار قەرز بېرىشكە ۋەدە قىلدى.
پېترو X ئىجتىمائىي ئالاقە سۇپىسىدا ئېلان قىلغان باياناتىدا: «تاشقى مۇناسىۋەت تارىخىمىز ئۆزگەرمەكتە. بۇنىڭدىن كېيىن كولومبىيە پۈتكۈل دۇنيا بىلەن باراۋەرلىك ۋە ئەركىنلىك ئاساسىدا ئالاقە ئورنىتىدۇ» دېدى.
پېترو دۈشەنبە كۈنى ئېلان قىلغان باياناتىدا، كولومبىيەنىڭ شى جىنپىڭ تەرىپىدىن 2013-يىلى ئوتتۇرىغا قويۇلغان، قەدىمكى يىپەك يولىنى قايتىدىن جانلاندۇرۇش ھەمدە خىتاينىڭ دۇنيا بىلەن بولغان سودا ۋە ئۇل ئەسلىھە ئالاقىلىرىنى كۈچەيتىشنى مەقسەت قىلغان «بىر بەلباغ بىر يول» تەشەببۇسىغا قاتنىشىدىغانلىقىنى جاكارلىدى.
بۇ پىروگراممىغا 150 دىن ئارتۇق دۆلەت قاتناشقان بولۇپ، ئۇلارنىڭ ئارىسىدا 20 دىن ئارتۇق لاتىن ئامېرىكاسى دۆلىتىمۇ بار. لېكىن، فېۋرال ئېيىدا پاناما بۇ كېلىشىمدىن چېكىنىپ چىققانلىقىنى ئېلان قىلدى. خىتاي بۇ قارارنى ئامېرىكا قوشما ئىشتاتلىرى بېسىمىنىڭ نەتىجىسى دەپ قارىدى.
2022-يىلى ئاۋغۇستتا ۋەزىپىگە ئولتۇرغان پېترو، 2023-يىلى ئۆكتەبىردە پىرېزىدېنت سۈپىتىدە خىتايدا تۇنجى قېتىم زىيارەتتە بولۇپ، 1980-يىلى ئورنىتىلغان ئىككى تەرەپلىك مۇناسىۋەتنى ئىستراتېگىيەلىك شېرىكچىلىك دەرىجىسىگە كۆتۈرگەنىدى.
