كانادا باش مىنىستىرى مارك كارنېي ئامېرىكا قوشما ئىشتاتلىرى پىرېزىدېنتى دونالد ترامپ بىلەن سۆھبەت ئۆتكۈزۈش ئۈچۈن ئامېرىكاغا كەلدى. ترامپنىڭ كاناداغا قارشى سودا ئۇرۇشى ۋە كانادانى ئامېرىكاغا قوشۇۋېلىش تەھدىتى داۋاملىشىۋاتقان بىر مەزگىلدە ئېلىپ بېرىلغان بۇ زىيارەت دىققەت قوزغىماقتا.

بۇ زىيارەت كارنېينىڭ لىبېرالىستلار پارتىيەسىنى ئارقىمۇئارقا تۆتىنچى قېتىم سايلامدا غەلىبە قىلدۇرۇپ بىر ھەپتە كېيىن ئىشقا ئاشۇرۇلماقتا.

كارنېي سەيشەنبە كۈنى ئاقسارايدا ترامپ بىلەن كۆرۈشىدۇ.

28-مارت كۈنى ترامپ كارنېي بىلەن تۇنجى قېتىم تېلېفوندا كۆرۈشكەندىن كېيىن، ئۆزىنىڭ ئاممىۋى ئورتاقلىشىش تور بېتى Truth Social سەھىپىسىدە ئېلان قىلغان  باياناتىدا، كانادانىڭ يېقىنلىشىۋاتقان سايلىمىدىن كېيىنلا كانادا رەھبىرى بىلەن بىر يەرگە جەم بولۇپ، سىياسەت، سودا ۋە باشقا بارلىق ساقلىنىۋاتقان مەسىلىلەر ھەققىدە مۇزاكىرە ئېلىپ بارىدىغانلىقلىرىنى، بۇنىڭ ئامېرىكا قوشما ئىشتاتلىرى ۋە كانادا ئۈچۈن ناھايىتى زور نەتىجىلەرنى قولغا كەلتۈرىشىگە تۈرتكە بولىدىغانلىقىنى بىلدۈرگەن ئىدى.

جىددىيچىلىك ئاستا-ئاستا كۈچەيمەكتە

ترامپ بۇنىڭدىن بۇرۇن كانادادىن ئىمپورت قىلىنىدىغان مەھسۇلاتلارنىڭ كۆپ قىسمىغا %25، كانادانىڭ ئېنېرگىيە مەھسۇلاتلىرىغا %10 تاموژنا بېجى قويغانىدى.  

ئامېرىكا پىرېزىدېنتى ترامپ كانادانىڭ ياغاچ، سۈت، پولات-تۆمۈر ۋە ئاليۇمىن مەھسۇلاتلىرىغا تېخىمۇ كۆپ تاموژنا بېجى قويىدىغانلىقى توغرىسىدا  كاناداغا تەھدىت سېلىش بىلەن بىر ۋاقىتتا، كانادانى «51-ئىشتات» دەپ تىلغا ئېلىپ، ئىككى دۆلەت مۇناسىۋەتلىرىدىكى جىددىيچىلىكنى تېخىمۇ ئەۋج ئالدۇرۇۋەتتى.

كانادا بۇنىڭغا جاۋابەن ئامېرىكا ئاپتوموبىللىرى ۋە زاپچاسلىرىغا %25 نىسبىتىدە تاموژنا باجى قويدى. باش مىنىستىر مارك كارنېي سودا سۆھبەتلىرىنى كانادانىڭ شەرتلىرى ئاساسىدا ئۆتكۈزىدىغانلىقىنى ۋە خەلقئارا ھەمكارلىقنى چوڭقۇرلاشتۇرىدىغانلىقىنى ئەھدە قىلدى.

ئونتارىيو ئۆلكىسىنىڭ قارشى تەدبىر سۈپىتىدە توكتىن قوشۇمچە باج ئېلىشنى توختىتىشى ترامپنىڭ كانادانىڭ مېتال مەھسۇلاتلىرىغا تېخىمۇ يۇقىرى سەۋىيەدە تاموژنا بېجى قويۇشىنى ۋاقتىنچە كېچىكتۈرۈشىگە تۈرتكە بولدى، ئەمما ئامېرىكا بىلەن كانادا ئوتتۇرىسىدىكى سودا جىددىيچىلىكى ئۈزلۈكسىز داۋاملاشماقتا.