كولومبىيەنىڭ پۇقراۋى ئاۋىياتسىيە ئىدارىسىنىڭ بىلدۈرۈشىچە، كولومبىيەنىڭ ۋېنېزۇئېلا چېگراسىغا يېقىن بىر رايونىدا يۈز بەرگەن ئايروپىلان قازاسىدا بىر پارلامېنت ئەزاسىنى ئۆز ئىچىگە ئالغان 15 كىشى ھاياتىدىن ئايرىلغان.

كولۇمبىيە دۆلەتلىك «ساتېنا» (Satena) ھاۋا يوللىرى شىركىتى تەرىپىدىن باشقۇرۇلىدىغان ئايروپىلان چارشەنبە كۈنى چۈشۈپ كەتكەن چاغدا، ئۇنىڭدا 13 يولۇچى ۋە ئىككى ئايروپىلان خادىمى بار ئىدى.

ئايروپىلان چېگرا شەھىرى كۇكۇتادىن قوزغالغان بولۇپ، چۈش مەزگىلىدە قونۇشى مۆلچەرلەنگەن يېقىن ئەتراپتىكى ئوكانا يېزىسىغا يېتىپ بېرىشتىن سەل ئىلگىرى كۆزىتىش مۇنارى بىلەن بولغان ئالاقىسى ئۈزۈلۈپ قالغان.

پۇقراۋى ئاۋىياتسىيە ئىدارىسىنىڭ بىر ئەمەلدارى قازادا «ھايات قالغانلارنىڭ يوقلۇقىنى» ئۇقتۇردى.

 تاغلىق رايون بولغان كۇكۇتا رايونى ھاۋا رايىنىڭ تېز ئۆزگىرىپ تۇرىدىغانلىقى بىلەن تونۇلىدۇ. مەزكۇر رايوننىڭ بەزى قىسىملىرى يەنە كولومبىيەنىڭ ئەڭ چوڭ پارتىزان گۇرۇپپىسى بولغان «مىللىي ئازادلىق ئارمىيەسى» (ELN) تەرىپىدىن كونترول قىلىنىدۇ.

دائىرىلەر ئايروپىلان خارابىلىكىنى ئىزدەش ۋە جەسەتلەرنى چىقىرىش ئۈچۈن ھاۋا ئارمىيەسىنىڭ رايونغا ئەۋەتىلگەنلىكىنى بىلدۈردى.

ئايروپىلاندىكى يولۇچىلارنىڭ ئارىسىدا بىر پارلامېنت ئەزاسى بىلەن بىر پارلامېنت ئەزاسى نامزاتىنىڭ بارلىقى مۆلچەرلەنمەكتە. قازاغا ئۇچرىغان ئايروپىلان «Beechcraft 1900» تىپلىق قوش موتورلۇق ئايروپىلان ئىدى.