«داۋن» (Dawn) گېزىتىنىڭ خەۋەر قىلىشىچە، پاكىستان ئارمىيەسىنىڭ ئاممىۋى مۇناسىۋەتلەر ئىدارىسى (ISPR) مۇۋەپپەقىيەتلىك ھالدا سىناق قىلىنغان «ھاۋادىن ھاۋاغا» ئېتىلىدىغان باشقۇرۇلىدىغان بومبا ھەققىدە بايانات ئېلان قىلغان.

باياناتتا، تۇنجى ياسالغان ھاۋادىن ھاۋاغا ئېتىلىدىغان «فەئاز» ناملىق باشقۇرۇلىدىغان بومبىنىڭ «مۇۋەپپەقىيەتلىك سىناق قىلىنغانلىقى» بايان قىلىنىپ، بۇنىڭ دۆلەتنىڭ مۇداپىئە ئىقتىدارىنى تەرەققىي قىلدۇرۇشتىكى مۇھىم بىر «بۇرۇلۇش نۇقتىسى» ئىكەنلىكى قەيت قىلىندى.

باشقۇرۇلىدىغان بومبىنىڭ ئاخىرقى باسقۇچلۇق نىشانلاش سىستېمىسى بىلەن تەمىنلەنگەنلىكى ۋە تېخىمۇ يىراق مۇساپىدىكى نىشانلارغا يېتىپ بارالايدىغانلىقى ئەسكەرتىلگەن باياناتتا: «فەئاز پاكىستان ھاۋا ئارمىيەسىنىڭ ھەربىي ھەرىكەتتىكى ئەۋرىشىملىكىنى كۆرۈنەرلىك دەرىجىدە ئاشۇرىدۇ ۋە دۆلەتنىڭ مۇداپىئە قۇدرىتىگە تۆھپە قوشىدۇ» دېيىلدى.

باياناتتا يەنە، پاكىستان پىرېزىدېنتى ئاسىف ئەلى زەردارى، باش مىنىستىر شاھباز شەرىف، ئارمىيە باش ئىشتاب باشلىقى ئاسىم مۇنىر ۋە بىر قىسىم ئارمىيە قوماندانلىرىنىڭ سىناقنىڭ ئۇتۇقلۇق بولغانلىقى مۇناسىۋىتى بىلەن پەن- تەتقىقاتچىلارنى ۋە ئىنژېنېرلارنى تەبرىكلىگەنلىكى بىلدۈرۈلدى.

پاكىستان ئارمىيەسى 14-ئۆكتەبىردىمۇ (2026) «2-پەتھى» ناملىق باللىستىك باشقۇرۇلىدىغان بومبىنىڭ مۇساپىسى ئۇزارتىلغان نۇسخىسىنى مۇۋەپپەقىيەتلىك سىناق قىلغانلىقىنى ئېلان قىلغان ئىدى.