رۇسىيە يېزا ئىگىلىك مىنىستىرى ئوكسانا لۇت پايتەخت موسكۋادا ئۆتكۈزۈلگەن «2-نۆۋەتلىك خەلقئارا مال دوختۇرلۇق بىخەتەرلىك مۇنبىرى» يىغىنى جەريانىدا مۇخبىرلارنىڭ سوئاللىرىغا جاۋاب بەردى.

لۇت ئىككى دۆلەتنىڭ بىر-بىرىگە ئوخشىمىغان مەھسۇلاتلارنى سېتىۋاتقانلىقىغا دىققەت تارتىپ: «تۈركىيە بىلەن رۇسىيە يېزا ئىگىلىك ساھەسىدە بىر-بىرىنى تولۇقلايدۇ. بىز تۈركىيەگە ئاساسلىقى ئاشلىق، مايلىق زىرائەت ۋە ياغ مەھسۇلاتلىرىنى ئەۋەتىمىز. تۈركىيەدىن بولسا ئاساسلىقى مېۋە-چېۋە ۋە كۆكتات سېتىۋالىمىز» دېدى.

تۈركىيەلىك شېرىكلىرىنى «رۇسىيەنىڭ مۇقىم شېرىكلىرى» دەپ تەرىپلىگەن لۇت يەنە: «(ئۇكرائىنا بىلەن بولغان ئۇرۇش سەۋەبلىك) نۆۋەتتىكى قىيىن ۋەزىيەتنىڭ خىزمىتىمىزگە، سودىمىزغا ۋە ئەلۋەتتە دوستلۇقىمىزنى داۋاملاشتۇرۇشىمىزغا توسالغۇ بولماسلىقىنى ئۈمىد قىلىمىز» دېدى.