مىسىر تاشقى ئىشلار مىنىستىرى بەدىر ئابدۇلئاتى يەكشەنبە كۈنى قاھىرەنىڭ پاكىستان بىلەن بولغان ھەر قايسى ساھەلەردىكى ھەمكارلىقنى كۈچەيتىش مەقسىتىدە، 2026-يىلى ئۈچۈن ئورتاق بىر يول خەرىتىسى تەييارلاشنى خالايدىغانلىقىنى ئېيتتى.
مىسىر تاشقى ئىشلار مىنىستىرلىقىنىڭ باياناتىدا، ئابدۇلئاتىنىڭ رەسمىي زىيارىتى جەريانىدا مىسىر پىرېزىدېنتى ئابدۇلفەتتاھ ئەس-سىسىنىڭ يازما مەكتۇپىنى پاكىستانلىق مەنسەپدىشى ئىسھاق دارغا يەتكۈزگەنلىكى ۋە مەكتۇپنىڭ ئىككى تەرەپ مۇناسىۋەتلىرىنى چوڭقۇرلاشتۇرۇشقا مەركەزلەشكەنلىكى بىلدۈرۈلدى.
ئابدۇلئاتى يەنە، ب د ت خەۋپسىزلىك كېڭىشىنىڭ غەززەگە ئالاقىدار 2803-نومۇرلۇق قارارىنىڭ ئىجرا قىلىنىشى ۋە ئامېرىكا پىرېزىدېنتى دونالد ترامپ تەييارلىغان ھەمدە 10-ئۆكتەبىردە پەلەستىن رايونىدا كۈچكە ئىگە بولغان ئۇرۇش توختىتىش پىلانىنىڭ ئىككىنچى باسقۇچىغا ئۆتۈشنىڭ زۆرۈرلۈكىنى تەكىتلىدى.
مىسىرلىق مىنىستىر، قاراردا كۆرسىتىلگىنىدەك ئۇرۇش توختىتىشنى داۋاملاشتۇرۇش ئۈچۈن خەلقئارالىق بىر مۇقىملىق ساقلاش قىسمىنىڭ تولۇق ئىقتىدارى بىلەن ۋەزىپە ئۆتىشى كېرەكلىكىنى بىلدۈردى.
ئابدۇلئاتى نويابىردا ئۆتكۈزۈلۈشى مۆلچەرلەنگەن، ئەمما تېخىچە ئەمەلگە ئاشمىغان غەززە ئۈچۈن دەسلەپكى ئەسلىگە كەلتۈرۈش، قايتا قۇرۇش ۋە تەرەققىيات تېمىلىق بىر خەلقئارالىق يىغىننىڭ تەييارلىق خىزمەتلىرىنى كۆزدىن كەچۈردى.
تۈركىيە، مىسىر ۋە قاتارنىڭ مۇرەسسەچىلىكى ھەمدە ئامېرىكانىڭ قوللىشى بىلەن ھاسىل قىلىنغان ئۇرۇش توختىتىش كېلىشىمى، ئىسرائىلىيەنىڭ 2023-يىلى ئۆكتەبىردىن بۇيان داۋاملاشتۇرۇپ كەلگەن ۋە كۆپىنچىسى ئاياللار ۋە بالىلار بولۇپ 70 مىڭدىن ئارتۇق كىشىنىڭ ئۆلۈمىگە، 170 مىڭدىن ئارتۇق كىشىنىڭ يارىلىنىشىغا سەۋەب بولغان ھۇجۇملىرىنى توختاتتى.
ئۇرۇش توختىتىش كېلىشىمىنىڭ بىرىنچى باسقۇچى، پەلەستىنلىك تۇتقۇنلار بەدىلىگە ئىسرائىلىيەلىك گۆرۈگە ئېلىنغانلارنىڭ قويۇپ بېرىلىشىنى ئۆز ئىچىگە ئالىدۇ. پىلان يەنە غەززەنىڭ قايتا قۇرۇلۇشىنى ۋە ھاماس ئورۇن ئالمىغان يېڭى بىر باشقۇرۇش مېخانىزمىنىمۇ ئۆز ئىچىگە ئالىدۇ.
