رۇسىيە پەيشەنبە كۈنى <ئانتونوف ئان-24> تىپلىق يولۇچىلار ئايروپىلانىنىڭ، دۆلەتنىڭ يىراق شەرقىگە جايلاشقان ئامۇر ئوبلاستىدا ئۇچۇش جەريانىدا راداردىن غايىب بولغانلىقىنى ئۇقتۇردى.

ئامۇر ئوبلاستىنىڭ ۋالىيسى ۋاسىلىي ئورلوۋ تېلېگرامدىكى ئادرېسىدا ئېلان قىلغان باياناتىدا، جىددىي ئەھۋاللارغا تاقابىل تۇرۇش ئورگانلىرىنىڭ ئۇچۇرىنى نەقىل كەلتۈرۈپ، ئايروپىلاننىڭ ئوبلاستنىڭ مەمۇرىي مەركىزى بىلاگوۋېشچېنسكتىن تىندا شەھىرىگە قاراپ كېتىۋاتقاندا راداردىن يوقاپ كەتكەنلىكىنى بىلدۈردى.

ئورلوۋ يوقاپ كەتكەن ئايروپىلاننى ئىزدەش خىزمىتىنىڭ داۋاملىشىۋاتقانلىقىنى تەكىتلەپ: «دەسلەپكى مەلۇماتلارغا قارىغاندا، ئايروپىلاندا بەش نەپەر بالا بولۇپ، جەمئىي 43 يولۇچى ۋە ئالتە كىشىلىك ئۇچۇش مۇلازىمىتى خادىمى بار ئىكەن» دېدى.

جىددىي ئەھۋاللار مىنىستىرلىقىمۇ ئىزدەش خىزمىتىنى دەلىللەپ، ئايروپىلاننىڭ راداردىن غايىب بولغانلىقىنى ۋە تىندادىكى يەرلىك ئايرودۇرۇمغا بىر نەچچە كىلومېتىر ئارىلىق قالغاندا سىگناللارغا ئىنكاس قايتۇرمىغانلىقىنى ئېلان قىلدى.

مىنىستىرلىق باياناتىدا: «ئايروپىلان خاباروۋسكى-بىلاگوۋېشچېنسكى-تىندا لىنىيەسىدە قاتناۋاتقان ئىدى. دەسلەپكى ئۇچۇرلارغا ئاساسلانغاندا، ئايروپىلاندا تەخمىنەن 40 ئادەم بار ئىكەن» دېگەن ئىبارىلەرگە ئورۇن بېرىلدى. باياناتتا يەنە، ۋەقەگە مۇناسىۋەتلىك تەپسىلىي ئەھۋالنىڭ ئېنىقلىنىۋاتقانلىقى قەيت قىلىندى.