ئىسرائىلىيە ئارمىيەسى ئۆتكەن ھەپتە غەززەنىڭ جەنۇبىدىكى رەفاھ تونېللىرىدا قاپسىلىپ قالغان ھاماس ئەزالىرىدىن 40 كىشىنى ئۆلتۈرگەنلىكىنى ئىلگىرى سۈردى.

ئىسرائىلىيە ئارمىيەسى يەكشەنبە كېچىسى ئېلان قىلغان باياناتىدا، رەفاھنىڭ شەرقىدىكى تونېللارنىڭ ئىچىدە تۇرۇۋاتقان قوراللىق ھاماس ئەزالىرىنى بىر تەرەپ قىلىش مەقسىتىدە، تونېللارنى ۋەيران قىلىش تىرىشچانلىقلىرىنى داۋاملاشتۇرۇۋاتقانلىقىنى بىلدۈردى.

باياناتتا: «ئۆتكەن ھەپتە تونېللارنىڭ ئىچىدە 40 تىن ئارتۇق قوراللىق ئۇنسۇر بىر تەرەپ قىلىندى» دېيىلدى.

 ئىسرائىلىيە ئارمىيەسى ئىلگىرىمۇ رەفاھتا باشقا ھاماس جەڭچىلىرىنى ئۆلتۈرگەنلىكىنى ۋە قولغا ئالغانلىقىنى ئىلگىرى سۈرگەنىدى.

ھاماس تەرەپ ئىسرائىلىيە ئارمىيەسىنىڭ بۇ دەۋاسىغا قارىتا دەرھال ئىنكاس قايتۇرمىدى.

ئىسرائىلىيە تاراتقۇلىرىدا ئېلان قىلىنغان خەۋەرلەرگە قارىغاندا، رەفاھتىكى يەر ئاستى تونېللىرىنىڭ ئىچىدە تەخمىنەن 200 ھاماس ئەزاسى قاپسىلىپ قالغان. تېل ئاۋىۋ ھاماس بىلەن مۇرەسسەچىلەرنىڭ، بۇ جەڭچىلەرنىڭ تەشكىلاتنىڭ كونتروللۇقىدىكى رايونلارغا بىخەتەر ھالدا ئۆتۈشى توغرىسىدىكى تىلىپىگە تېخىچە جاۋاب بەرمىدى.

رەفاھ شەھىرى غەززە تەۋەسىدە ئىسرائىلىيە ئارمىيەسى ھېلىھەم ئىشغال ئاستىدا تۇتۇۋاتقان بىر رايون بولغان «سېرىق رايون» غا جايلاشقان.

غەززەدە 10-ئۆكتەبىر كۈنى، مىسىر، قاتار ۋە تۈركىيە مۇرەسسەچىلىك قىلغان، ئامېرىكا قوللىغان ئۇرۇش توختىتىش كېلىشىمى ئىسرائىلىيە بىلەن ھاماس ئوتتۇرىسىدا كۈچكە ئىگە بولدى.

ئۇرۇش توختىتىش كېلىشىمىنىڭ بىرىنچى باسقۇچى پەلەستىنلىك مەھبۇسلارنىڭ بەدىلىگە ئىسرائىلىيەلىك تۇتقۇنلارنىڭ قويۇپ بېرىلىشىنى مەزمۇن قىلىدۇ. پىلان يەنە غەززەنىڭ قايتا قۇرۇلۇشىنى ۋە ھاماس ئىچىدە بولمىغان يېڭى بىر باشقۇرۇش مېخانىزمىنىڭ قۇرۇلۇشىنى نىشان قىلىدۇ.

ئىسرائىلىيە 2023-يىلى ئۆكتەبىردىن بۇيان غەززەدە ئېلىپ بارغان ھۇجۇملىرىدا كۆپىنچىسى ئاياللار ۋە بالىلاردىن تەشكىل تاپقان 70 مىڭدىن ئارتۇق كىشىنى ئۆلتۈردى، تەخمىنەن 171 مىڭ كىشىنى يارىلاندۇردى.