ئىران تاشقى ئىشلار مىنىستىرى ئابباس ئاراقچى، ئامېرىكا بىلەن ھازىرچە ھېچقانداق مۇزاكىرە ئېلىپ بارمىغانلىقىنى بىلدۈرۈپ، ۋاشىنگتون ھۆكۈمىتى كېلىشىم تېكىستىگە خىلاپلىق قىلغان مەسىلىلەرنى تۈزەتمىگۈچە مۇزاكىرىلەرنىڭ قايتىدىن باشلانمايدىغانلىقىنى ئېيتتى.
ئاراقچى ئىران دۆلەتلىك تېلېۋىزىيەسىگە بايانات بېرىپ، ئامېرىكا بىلەن بولغان ئالاقىلەر ۋە ھۆرمۈز بوغۇزى مەسىلىسى ئۈستىدە توختالدى.
تەرەپلەر ئوتتۇرىسىدا ۋاسىتىچىلار ئارقىلىق ئۇچۇر ئالماشتۇرۇشنىڭ داۋاملىشىۋاتقانلىقىنى بىلدۈرگەن ئاراقچى: «ھازىرچە ئامېرىكا بىلەن ھېچقانداق مۇزاكىرە ئېلىپ بارمىدۇق. ۋاسىتىچىلار ئارقىلىق ئۇچۇر ئالماشتۇرۇش قىلىنىۋاتىدۇ، ئەمما بۇنىڭ ئاتىلىشى مۇزاكىرە ئەمەس» دېدى.
ۋاسىتىچىلارنىڭ قايتىدىن ئۆزئارا چۈشىنىش ئاساسىنى يارىتىپ چىقىشى ئۈچۈن خىزمەتلىرىنى داۋاملاشتۇرۇۋاتقانلىقىنى بىلدۈرگەن ئاراقچى، مۇزاكىرىلەرنىڭ تەكرار باشلىنىشى ئۈچۈن ئامېرىكىنىڭ كېلىشىم تېكىستىگە خىلاپلىق قىلغانلىقىغا مۇناسىۋەتلىك مەجبۇرىيەتلىرىنى ئورۇنلىشى كېرەكلىكىنى ئېيتتى.
ئابباس ئاراقچى: «كېلىشىمگە خىلاپلىق قىلش قىلمىشى ئاخىرلاشمىغىچە ۋە ئامېرىكا، كېلىشىم تېكىستىگە خىلاپلىق قىلغان مەسىلىلەرنى تۈزەتمىگۈچە مۇزاكىرىلەرنىڭ قايتىدىن باشلىنىشى مۇمكىن ئەمەس» دېگەن سۆزلەرنى ئىشلەتتى.
ئىران ھۆرمۈز بوغۇزىنىڭ ئېچىلىشى ئۈچۈن ئوتتۇرىغا قويغان شەرتلىرىنى ۋاسىتىچىلار ئارقىلىق ئامېرىكا تەرىپىگە يەتكۈزدى.
ئاراقچى ھۆرمۈز بوغۇزى مەسىلىسىدە ئومان بىلەن ئېلىپ بېرىلىۋاتقان مۇزاكىرىلەر ھەققىدىمۇ توختىلىپ، ئومان بىلەن كېلىشىم ھاسىل قىلىنىشىنىڭ ھۆرمۈز بوغۇزىنىڭ قايتىدىن ئېچىلىدىغانلىقىنى بىلدۈرمەيدىغانلىقىنى قايتىدىن تەكرارلىدى.
ئاراقچى: «ئومان بىلەن ئېلىپ بارغان مۇزاكىرىلىرىمىز، ھۆرمۈز بوغۇزىنىڭ ئېچىلىدىغانلىقىنى بىلدۈرمەيدۇ. بۇنىڭ ئىشقا ئاشۇرىلىشى ئۈچۈن باشقا شەرتلەرنىڭمۇ ئورۇندىلىشى كېرەك. بۇ شەرتلەر، ۋاسىتىچىلار ئارقىلىق ئامېرىكا تەرىپىگە يەتكۈزۈلدى» دېدى.
