بېيرۇت دائىرىلىرى، سۆھبەتلەر كېچىكتۈرۈلگەن ۋە جەنۇبتا قايتا قۇرۇش خىزمەتلىرى داۋاملىشىۋاتقان بىر مەزگىلدە، ئىسرائىلىيە كۈچلىرىنىڭ لىۋان زېمىنىدىن چېكىنىپ چىقىشى كېرەكلىكىنى تەكىتلىدى.
لىۋان پىرېزىدېنتى جوسېف ئاۋن شەنبە كۈنى ئىسرائىلىيە بىلەن نۆۋەتتە «ھېچقانداق يېڭى بىر سۆھبەت يوقلۇقىنى» بىلدۈرۈپ، بېيرۇتنىڭ ئىسرائىلىيەنىڭ چېكىنىشى، ئەسىرلەر بىلەن يۇرت-ماكانلىرىدىن ئايرىلغانلارنىڭ قايتىپ كېلىشى ۋە ئىسرائىلىيە ھۇجۇملىرىدا ۋەيران بولغان رايونلارنىڭ قايتىدىن قۇرۇلۇشى توغرىسىدىكى تەلەپلىرىنى تەكرارلىدى.
ئاۋن ئارمىيە باش ئىشتاب باشلىقى رودولف ھايكال ۋە خەۋپسىزلىك ئورگانلىرىنىڭ باشلىقلىرى بىلەن بىرلىكتە جەنۇبتىكى ناباتىيە شەھىرىدە ئېلىپ بارغان زىيارىتى جەريانىدا مۇخبىرلارغا: «ھازىرچە ئىسرائىلىيە بىلەن يېڭى بىر سۆھبەت يوق» دېدى.
بىر ئامېرىكالىق ئەمەلدار جۈمە كۈنى «Axios» خەۋەرلەر تورىغا بەرگەن باياناتىدا، كېلەر ھەپتە رىمدا ئۆتكۈزۈلۈشى پىلانلانغان كېيىنكى نۆۋەتلىك ئىسرائىلىيە-لىۋان سۆھبەتلىرىنىڭ كېچىكتۈرۈلگەنلىكىنى ئېيتقان ئىدى. بۇنىڭ ئورنىغا ئىسرائىلىيە ۋە لىۋان باش ئەلچىلىرىنىڭ ۋاشىنگتوندا ئامېرىكا تاشقى ئىشلار مىنىستىرلىقىدا ئۇچرىشىپ ۋەزىيەت تەرەققىياتىنى ۋە ئىيۇن ئېيىدا ھاسىل قىلىنغان رامكا كېلىشىمىنىڭ ئىجرا قىلىنىشىنى مۇھاكىمە قىلىشى مۆلچەرلەنمەكتە.
بېيرۇت تۈپ تەلەپلىرىنى تەكرارلىدى
دۆلەتلىك خەۋەر ئاگېنتلىقى NNA نىڭ خەۋىرىگە ئاساسلانغاندا، ئاۋن لىۋاننىڭ مەيدانىنىڭ ئۆزگەرمىگەنلىكىنى بىلدۈرۈپ: «چېكىنىپ چىقىش، ئەسىرلەر ۋە يۇرت-ماكانىدىن ئايرىلغانلارنىڭ قايتىپ كېلىشى شۇنداقلا قايتا قۇرۇش ئىشلىرى بىز ئىشقا ئاشۇرۇشقا ۋەدە بەرگەن مىللىي پىرىنسىپلارىمىزدۇر» دېدى.
لىۋان بىلەن ئىسرائىلىيە ئوتتۇرىسىدىكى بىۋاسىتە سۆھبەتلەر ئامېرىكانىڭ يېتەكچىلىكىدە 14-ئاپرېلدا ۋاشىنگتوندا ئۆتكۈزۈلگەن يىغىن بىلەن باشلانغان ئىدى.
ئالدىنقى قېتىملىق سۆھبەتلەردە ئۇرۇش توختىتىش كېلىشىمى، ئىسرائىلىيەنىڭ چېكىنىشى، چېگرا مەسىلىلىرى، ئەسىرلەر ۋە يوقاپ كەتكەن كىشىلەر مۇزاكىرە قىلىنغان ئىدى.
لىۋان بىلەن ئىسرائىلىيە 26-ئىيۇندا ۋاشىنگتوندا ئامېرىكانىڭ ۋاسىتىچىلىقىدا بىر رامكا كېلىشىمى ئىمزالىغان بولۇپ، مەزكۇر كېلىشىم، ئىسرائىلىيەنىڭ لىۋان زېمىنىدىن پەيدىنپەي چېكىنىپ چىقىشىنى ۋە ئىسرائىلىيە كۈچلىرى ئىشغال قىلغان رايونلارغا لىۋان ئارمىيەسىنىڭ ئورۇنلاشتۇرۇلۇشىنى مەقسەت قىلىدۇ.
«Axios» تورى باياناتىنى نەقىل قىلغان ئامېرىكالىق ئەمەلدارنىڭ ئېيتىشىچە، كېيىنكى قېتىملىق رەسمىي سۆھبەتنىڭ ئۆكتەبىر ئېيىدا رىمدا ئۆتكۈزۈلۈشى مۆلچەرلەنمەكتە.
