ئۇكرائىنا ئەمەلدارلىرى، سەيشەنبە كۈنى، رۇسىيەنىڭ راكېتا ۋە ئۇچقۇ ھۇجۇملىرىدا مەملىكەت مىقياسىدا توققۇز كىشىنىڭ ئۆلگەنلىكىنى ۋە ئونلارچە كىشىنىڭ يارىلانغانلىقىنى بىلدۈردى؛ مەزكۇر ھۇجۇملار پىرېزىدېنت ۋولۇدىمىر زېلېنىسكىينىڭ موسكۋانىڭ «يېڭى ۋە كەڭ كۆلەملىك بىر ھۇجۇم»نىڭ تەييارلىقىنى قىلىۋاتقانلىقى ھەققىدىكى ئاگاھلاندۇرۇشىدىن بىر قانچە كۈن كېيىن يۈز بەردى.
موسكۋا، 2022-يىلى باشلىغان ھۇجۇمىدىن بۇيان دېگۈدەك ھەر كۈنى ئۇكرائىنانى بومباردىمان قىلىۋاتقان بولۇپ، بۇ ئەھۋال دائىم كىيېۋنىڭ قايتۇرما ھۇجۇمغا ئۆتۈشىنى كەلتۈرۈپ چىقارماقتا؛ ئىككىنچى دۇنيا ئۇرۇشىدىن بۇيان ياۋروپادا يۈز بەرگەن بۇ ئەڭ قانلىق توقۇنۇشنى ئاخىرلاشتۇرۇشقا قارىتىلغان سۆھبەتلەر بولسا تۇيۇق يولغا كىرىپ قالدى.
مۇخبىرلار ئۇكرائىنا پايتەختى كىيېۋدا بەزى پارتلاش ئاۋازلىرىنى ئاڭلىغان بولسا؛ يەرلىك ئەمەلدارلار رۇسىيەنىڭ باللىستىك راكېتالار بىلەن ھۇجۇم قىلغانلىقىنى، بۇنىڭ بەزى رايونلاردا ئوت ئاپىتى ۋە توك توختاپ قېلىش ئەھۋاللىرىنى كەلتۈرۈپ چىقارغانلىقىنى بىلدۈردى.
شەھەر باشلىقى ۋىتالى كلىچكو، «دۈشمەننىڭ كوللېكتىپ ھۇجۇمىدا» تۆت كىشىنىڭ ئۆلگەنلىكىنى ۋە ئىككىسى بالا بولۇپ كەم دېگەندە 58 كىشىنىڭ يارىلانغانلىقىنى بىلدۈردى.
كلىچكو بۇنىڭدىن ئىلگىرى: «شەھەردە پارتلاشلار يۈز بېرىۋاتىدۇ. ھاۋا مۇداپىئە قىسىملىرى خىزمەت قىلىۋاتىدۇ! پاناھلىنىش ئورۇنلىرىدا تۇرۇڭلار!» دەپ ئاگاھلاندۇرۇش بەرگەن ئىدى.
فىرانسىيە خەۋەر ئاگېنتلىقى مۇخبىرلىرىنىڭ كۆزىتىشىچە، شەھەر مەركىزىدىن ئۆرلەۋاتقان چوڭ بىر تۈتۈن بۇلۇتى بىلەن بىللە، شەھەر ئاھالىلىرى سومكىلىرىنى ئېلىپ، يوتقان-كۆرپىلەرگە ئورىنىپ پاناھلىنىش ئورۇنلىرىغا قاراپ يۈگۈرۈشكەن.
كىيېۋ شەھەرلىك ھەربىي مەمۇرىيەتنىڭ باشلىقى تىمۇر تكاتشېنكو: «دۈشمەن باللىستىك راكېتالار بىلەن بومباردىمان قىلىۋاتىدۇ»، دېدى.
ئۇكرائىنانىڭ باشقا جايلىرىدىمۇ ھەم راكېتا، ھەم ئۇچقۇلار ئىشلىتىلگەن ئەجەللىك ھۇجۇملارنىڭ يۈز بەرگەنلىكى مەلۇم قىلىندى.
دنىپرو ۋالىيسى ئولېكساندر گانژا شەھەردىكى رۇسىيە ھۇجۇمى نەتىجىسىدە بەش كىشىنىڭ ھاياتىدىن ئايرىلغانلىقىنى، ئۈچى ئېغىر بولۇپ جەمئىي 25 كىشىنىڭ يارىلانغانلىقىنى مەلۇم قىلدى.
خاركىۋ شەھەر باشلىقى ئىگور تېرېخوۋنىڭ سۆزىگە قارىغاندا، شەھەردىكى ھۇجۇمدا بىرى بالا بولۇپ جەمئىي ئون كىشى يارىلاندى.
ئۇكرائىنا ھاۋا ئارمىيەسى راكېتا تەھدىتلىرى ھەققىدە ئاگاھلاندۇرۇش ئېلان قىلدى، كىيېۋ مەسئۇللىرى بولسا ئۇكرائىنا ھاۋا تەۋەلىكىدە ئۇچقۇچىسىز ھاۋا ئاپپاراتلىرىنىڭ بارلىقى توغرىسىدا ئاگاھلاندۇردى.
ھۇجۇملار جەريانىدا، پولشا ھاۋا ئارمىيەسى «X» سۇپىسىدا، پولشا ھاۋا تەۋەلىكىنى قوغداش ئۈچۈن ئايروپىلانلارنى ھەرىكەتكە كەلتۈرگەنلىكىنى ئېلان قىلدى.
«ھاياتىڭلارنى قوغداڭلار»
يەنە بىر تەرەپتىن رايون ۋالىيسى ئالېكساندر خىنشىتېيننىڭ ئېيتىشىچە، ئۇكرائىنانىڭ بىر ئۇچقۇچىسىز ھاۋا ئاپپاراتى ھۇجۇمى نەتىجىسىدە، رۇسىيەنىڭ ئۇكرائىنا چېگراسىغا يېقىن كۇرسكى رايونىدا بىر كىشى ھاياتىدىن ئايرىلغان.
ئۇكرائىناغا قارىتىلغان ھۇجۇملار، زېلېنىسكىينىڭ جۈمە كۈنى: «رۇسىيەنىڭ يېڭى، كەڭ كۆلەملىك بىر ھۇجۇمغا تەييارلىنىۋاتقانلىقى توغرىسىدا ئىستىخبارات ئۇچۇرلىرىمىز بار» دېگەن ۋە كىشىلەرنى «ھاياتىڭلارنى قوغداڭلار» دەپ چاقىرىق قىلغاندىن كېيىن يۈز بەردى.
زېلېنىسكىي بۇ دائىرىدە: «ئۆتۈنۈپ قالاي، ھاۋا سىگناللىرىغا دىققەت قىلىڭلار، ھاياتىڭلارنى قوغداڭلار. ئاپپاراتلىرىمىز ئۈنۈملۈك ئىشلەۋاتىدۇ ۋە يېتەرلىك؛ ھاۋا ئارمىيەسى ۋە ئاسمىنىمىزنىڭ باشقا قوغدىغۇچىلىرى ھەر ۋاقىت 24 سائەت ۋەزىپە ئۆتىمەكتە» دېگەنىدى.
ئۇكرائىنا پىرېزىدېنتى ئىتتىپاقداشلىرىدىن رۇسىيەنىڭ باللىستىك راكېتالىرىنى توسۇپ قالالايدىغان «پاترىئوت» (ۋەتەنپەرۋەر) ناملىق ھاۋا مۇداپىئە سىستېمىلىرى بىلەن تەمىنلەشكە رۇخسەت قىلىشلىرىنى ۋە بۇنىڭ مەبلىغىنى كاپالەتلەندۈرۈشلىرىنى يەنە بىر قېتىم تەكىتلىدى.
ئۆتكەن ھەپتە زېلېنىسكىي ئامېرىكا پىرېزىدېنتى دونالد ترامپقا ۋە ئامېرىكا پارلامېنتىغا يازغان خېتىدىمۇ رۇسىيەنىڭ شىددەتلىك ھاۋا ھۇجۇملىرىغا قارشى «پاترىئوت» سىستېمىلىرىنى ئىشلىتىشنى تەلەپ قىلغان ئىدى.
ئۇكرائىنامۇ رۇسىيەنىڭ كۈندىلىك بومباردىمانلىرىدىن ئىنتىقام ئېلىش ھەرىكەتلىرى دائىرىسىدە ئىشغال ئاستىدىكى رايونلارغا ۋە رۇسىيەگە قارىتا ھۇجۇملىرىنى كۈچەيتتى.
