ئامېرىكا تاراتقۇلىرىدا بىر ئامېرىكالىق ئەمەلدارغا تايىنىپ بېرىلگەن خەۋەرگە ئاساسلانغاندا، ئامېرىكا ئىراننىڭ جەنۇبىدىكى بىر ھەربىي ئەسلىھەنى نىشان قىلىپ يېڭى ھاۋا ھۇجۇملىرىنى ئېلىپ بارغان.
ئەمەلدار، چارشەنبە كۈنى «ABC News» قا بەرگەن باياناتىدا، ھۇجۇملارنىڭ ھورمۇز بوغۇزىدا ئامېرىكا كۈچلىرى ۋە سودا دېڭىز قاتنىشى ئۈچۈن تەھدىت شەكىللەندۈرىدۇ دەپ باھالانغان بىر نۇقتىنى نىشانلىغانلىقىنى ئېيتتى.
ئامېرىكا پىرېزىدېنتى دونالد ترامپ ئىلگىرى ئىرانغا قاراتقان ئۇرۇشنى ئاخىرلاشتۇرۇشقا يۈزلەنگەن مۇزاكىرىلەرنىڭ ئەھۋالى توغرىسىدىمۇ توختىلىپ: «بۇنىڭدىن مەمنۇن ئەمەسمەن، لېكىن مەمنۇن بولىمىز. يا بۇ ئىش بولىدۇ ياكى ئىشنى تاماملاشقا مەجبۇر بولىمىز»، دېگەن ئىدى.
28-فېۋرالدا ئامېرىكا ۋە ئىسرائىلىيەنىڭ ئىرانغا تۇيۇقسىز ھۇجۇملار قىلىشى بىلەن رايون خاراكتېرلىق جىددىيچىلىك يۇقىرى ئۆرلىگەن ئىدى. ئۇنىڭ ئۈستىگە تېھران، ھورمۇز بوغۇزىنى تاقاش بىلەن بىرگە رايوندىكى نىشانلارغا ئۇچقۇچىسىز ھاۋا ئاپپاراتلىرى ۋە باشقۇرۇلىدىغان بومبىلار بىلەن زەربە بېرىش ئارقىلىق جاۋاب قايتۇرغان ئىدى.
كېيىنكى كۈنلەردە پاكىستاننىڭ ۋاسىتىچىلىقىدا 8-ئاپرېلدا ئۇرۇش توختىتىش كۈچكە ئىگە بولغان بولسىمۇ، ئىسلامئابادتىكى سۆھبەتلەر مەڭگۈلۈك بىر كېلىشىم يارىتالمىغان ئىدى.
ترامپ كېيىنچە ئۇرۇش توختىتىشنى مۇددەتسىز ئۇزارتقان بولسىمۇ، ئىستراتېگىيەلىك دېڭىز يولىدىن ئىران پورتلىرىغا بارىدىغان ياكى بۇ پورتلاردىن چىقىدىغان پاراخوتلارغا قاراتقان دېڭىز قامالىنى داۋاملاشتۇردى ۋە پات پات تىنچلىق كېلىشىمىنىڭ يېقىن ئىكەنلىكىنىمۇ ئېيتتى.
