ئەرەب دۆلەتلىرى پەلەستىننىڭ غەززە رايونىدا ئىككىنچى يىلىغا قەدەم قويغان، ئىسرائىلىيەنىڭ «ئىرقىي قىرغىنچىلىق ئۇرۇشى» دەپ ئاتىلىۋاتقان ھۇجۇملىرىنى دەرھال توختىتىشقا چاقىردى.
كۇۋەيت تەخت ۋارىسى شاھزادىسى شەيخ ساباھ خالىد ئەلھەمەد ئەسساباھ بىرلەشكەن دۆلەتلەر تەشكىلاتى خەۋپسىزلىك كېڭىشىنىڭ ئوتتۇرا شەرق مەسىلىسىگە دائىر ئوچۇق يىغىنىدا پارس قولتۇقى ھەمكارلىق كېڭىشىگە ۋاكالىتەن بايانات ئېلان قىلدى.
شەيخ ساباھ يىغىننىڭ غەززە پاجىئەسىنىڭ ئەڭ قاراڭغۇ دەۋرلىرىنىڭ بىرىدە ئۆتكۈزۈلگەنلىكىنى بىلدۈرۈپ، ۋەيرانچىلىق، قورشاۋ ۋە ئۇرۇش نەتىجىسىدە كۆپىنچىسى ئاياللار ۋە بالىلاردىن تەشكىل تاپقان 64 مىڭدىن ئارتۇق پۇقرانىڭ ئۆلتۈرۈلگەنلىكىنى تىلغا ئېلىپ ئۆتتى.
ئۇ غەززەدىكى ۋەزىيەتنى «ئىرقىي قىرغىنچىلىق ۋە مىللىي تازىلاشنىڭ جانلىق نامايەندىسى، سەل قاراشقا بولمايدىغان دەرىجىدىكى چوڭقۇر جاراھەت» دەپ سۈپەتلەپ، كېڭەشنى تاجاۋۇزچىلىقنى ئاخىرلاشتۇرۇش، ئىنسانپەرۋەرلىك ياردىمىگە ئېرىشىشنى كاپالەتلەندۈرۈش ۋە پۇقرالارنى قوغداش ئۈچۈن بەرگەن ۋەدىلىرىنى كونكرېت قەدەملەر بىلەن ئىسپاتلاپ ھەرىكەتكە ئۆتۈشكە چاقىردى.
مىسىرنىڭ ب د ت دا دائىمىي تۇرۇشلۇق ۋەكىلى ئوسامە ئابدۇلخالىق قاھىرەنىڭ ئىسرائىلىيەنىڭ ئىغۋاگەرچىلىكلىرىگە قارىماي جىددىيچىلىكنى ئۈزلۈكسىز كۈچەيتىۋېتىشتىن ئۆزىنى قاچۇرۇپ كەلگەنلىكىنى بىلدۈرۈپ، ئۇرۇش توختىتىشنىڭ جىددىي ئىشقا ئاشۇرۇلۇشى كېرەكلىكىنى تەكىتلىدى.
ئابدۇلخالىق ئىسرائىلىيەنىڭ ئۇرۇشنى داۋاملاشتۇرۇشتىكى «تەلۋىلىك بىلەن چىڭ تۇرۇۋېلىشى»نى تەنقىد قىلىپ، غەززەدىكى تىراگېدىيەنىڭ ئاخىرلاشتۇرۇلۇشى كېرەكلىكىنى ئوتتۇرىغا قويدى.
پەلەستىننىڭ ب د ت دا تۇرۇشلۇق باش ئەلچىسى رىياد مەنسۇر: «پەلەستىنلىكلەر ئىنساندىن تۆۋەن مەخلۇق ئەمەس. بىزنىڭ ھايات قېلىش، ئەركىنلىك ۋە ئىززەت-ھۆرمەت ھوقۇقىمىز بار. ئىسرائىلىيەنىڭ غەززەدىكى خەلقىمىزگە قارشى سادىر قىلغان ۋەھشىيلىكى ھېچقانداق ئەھۋالدا ئاقلانمايدۇ» دېدى.
مەنسۇر: «ئىرقىي قىرغىنچىلىقمۇ، ئوغرىلىقمۇ، مەجبۇرىي كۆچۈرۈشمۇ، مۇستەملىكىچىلىكمۇ، كېڭەيمىچىلىك قىلىشمۇ، ئىشغالىيەتمۇ، قايسى بولمىسۇن، پەقەت غەززەنى قۇتۇلدۇرۇڭلار. پەلەستىننى قۇتۇلدۇرۇڭلار. تىنچلىقنى قۇتۇلدۇرۇڭلار» دېدى.
ئەرەب ئەللىرى ئىتتىپاقى باش كاتىپى ئەھمەد ئەبۇلغەيت كېڭەشكە خىتاب قىلىپ: «غەززەدە يۈز بېرىۋاتقان ئىشلار ۋەھشىيلىك ۋە رەھىمسىزلىك جەھەتتە مىسلى كۆرۈلمىگەن بىر ئەھۋال. ئەمما نىشان ئېنىق: پەلەستىن جەمئىيىتىنى يوقىتىش ۋە پۈتۈن رايوننى ياشىغىلى بولمايدىغان ھالەتكە كەلتۈرۈپ، خەلقنى كۆچۈشكە مەجبۇرلاش» دەپ ئاگاھلاندۇرۇپ، بۇنداق بىر پىلاننى قوبۇل قىلىشنىڭ خەۋپسىزلىك كېڭىشىنىڭ قانۇنىيلىقىغا زىيان يەتكۈزىدىغانلىقىنى ئەسكەرتىپ ئۆتتى.
«غەززەدە يۈز بەرگەن ۋەقەلەر غەززە بىلەنلا چەكلىنىپ قالمايدۇ» دېگەن ئەبۇلغەيت، ئالاقىدار تەرەپلەرنى جىددىي ۋە كونكرېت ھەرىكەتكە ئۆتۈشكە چاقىردى.
ئۇ يەنە مۇنداق دەپ كۆرسەتتى: «كېڭەشنىڭ توغرا قارار چىقىرىدىغان ۋاقتى كەلدى. ئۇرۇشنى ئەتىگە قالدۇرماستىن بۈگۈن ئاخىرلاشتۇرايلى ۋە غەززەنى قايتا قۇرۇشقا، بالىلىرىغا بالىلىقىنى قايتۇرۇپ بېرىشكە باشلايلى.»
