ئالېكساندىر ۋۇچىچ سېربىيەدىكى بىر تېلېۋىزىيە پىروگراممىسىغا قاتنىشىپ، كۈنتەرتىپتىكى مەسىلىلەر ۋە 25-ئۆكتەبىر ئۆتكۈزۈلىدىغان مۇددەتتىن بۇرۇنقى ئومۇمىي سايلام ھەققىدە توختالدى.
پىرېزىدېنتلىق ۋەزىپىسىدىن 27-سېنتەبىر ئىستېپا بېرىدىغانلىقىنى بىلدۈرگەن ۋۇچىچ، شۇ كۈنى كەچتە خەلققە نۇتۇق سۆزلەپ، ئۆزىنى قوللىغانلارغا مىننەتدارلىق بىلدۈرىدىغانلىقىنى تىلغا ئالدى.
سېربىيە كۆپ پارتىيەلىك تۈزۈمگە ئۆتكەندىن بۇيان ئەڭ ئۇزۇن ۋەزىپە ئۆتىگەن پىرېزىدېنت ئىكەنلىكىنى تىلغا ئالغان ۋۇچىچ: «بۇ دۆلەتنىڭ پۇقرالىرى بولمىسا، مەن بۇنى قولغا كەلتۈرەلمەيتتىم. شۇنى ئېيتالايمەنكى، مەن سېربىيەگە ۋە بۇ دۆلەتنىڭ پۇقرالىرىغا ساداقەت بىلەن، تىرىشىپ، پىداكارلىق بىلەن خىزمەت قىلدىم» دېدى.
ئۇ ئىستېپا بەرگەندىن كېيىن، 25-ئۆكتەبىر ئۆتكۈزۈلىدىغان مۇددەتتىن بۇرۇنقى ئومۇمىي سايلامنىڭ تەشۋىقات پائالىيەتلىرىگە ئادەتتىكى بىر پۇقرا سۈپىتىدە قاتنىشىدىغانلىقىنى ئەسكەرتىپ، مۇنداق دېدى:
«مەن بىر كىچىك يۈك ئاپتوموبىلى سېتىۋالدىم، ئۆزۈمنىڭ ماشىنىسىمۇ بار. ھەممە يەردە قونۇشقا مۇمكىن بولمىغانلىقتىن يەنە بىر كارۋان ئاپتوموبىلىمۇ ئالدىم. مەن ئەڭ چەت يېزىلارغىچە بارىمەن، ئەگەر كېچىچە قېلىشقا توغرا كەلسە، شۇ يەردە قونىمەن. تېخى بارمىغان مىڭلىغان يېزىلار بار، شەھەرلەرنىمۇ ئايلانماقچىمەن.»
ۋۇچىچ سېربىيە تەرەققىيات پارتىيەسىنىڭ (SNS) سايلام تەشۋىقاتى دائىرىسىدە پايتەخت بېلگرادنى ئۆز ئىچىگە ئالغان چوڭ شەھەرلەردە يىغىلىش ئۆتكۈزىدىغانلىقىنى بىلدۈرۈپ، پارتىيەسىنىڭ % 50 تىن ئارتۇق ئاۋازغا ئېرىشىشكە مۇناسىپ ئىكەنلىكىگە ئىشىنىدىغانلىقىنى قەيت قىلدى.
