مۇئاۋىن جۇمھۇر رەئىس جەۋدەت يىلماز مۇقىمسىزلىققا يۈزلىنىۋاتقان دۇنيادا تۈركىيەنىڭ خەتەرگە تاقابىل تۇرۇش كۈچىگە ئىگە ئاكتىيورغا ئايلىنىشى كېرەكلىكىنى، چۈنكى ھەققانىي بولغان بىلەنمۇ كۈچلۈك بولمىسا، بۇ دۇنيادا باشقىلارنىڭ مېھىر – شەپقىتىگە تايىنىپ ياشىغىلى بولمايدىغانلىقىنى تەكىتلىدى.
تۈركىيە جۇمھۇرىيىتى مۇئاۋىن جۇمھۇر رەئىسى جەۋدەت يىلماز تۈركىيەنىڭ مۇداپىئە سانائىتى مەسىلىسىدە قەتئىي مۇرەسسە قىلمايدىغانلىقىنى ئېيتتى.
تۈركىيە بۈيۈك مىللەت مەجلىسى (پارلامېنتى) دە سۆز قىلغان يىلماز، تۈركىيەنىڭ مۇداپىئە سانائىتىگە ئەھمىيەت بېرىشنى داۋاملاشتۇرىدىغانلىقىنى بىلدۈردى.
يىلماز ناتو ئەزالىرىنىڭ مىللىي ئىشلەپچىقىرىش ئومۇمىي قىممىتىنىڭ يىللىق 5 پىرسەنتىنى مۇداپىئە خىراجىتىگە ئايرىش نىشانىنى بەلگىلىگەنلىكىنى، ياۋروپا ئىتتىپاقىنىڭ «SAFE پىروگراممىسى» نى ئېلان قىلغانلىقىنى ۋە گېئوسىياسىي خەتەرلەر يۇقىرى كۆتۈرۈلۈۋاتقان بۈگۈنكى دۇنيادا تۈركىيەنىڭ خەتەرگە تاقابىل تۇرۇش كۈچىگە ئىگە ئاكتىيور بولۇشقا مەجبۇر ئىكەنلىكىنى تەكىتلەپ مۇنداق دېدى:
«مۇداپىئە سانائىتى مەسىلىسىدە قەتئىي مۇرەسسە قىلىشقا بولمايدۇ.
تۈركىيە ھەر دائىم دىپلوماتىيە ۋە تىنچلىقنى بىرىنچى ئورۇنغا قويۇپ كېلىۋاتقان بىر دۆلەتتۇر. بۇنىڭ كونكرېت مىسالى، غەززەدىن قاراباغقىچە، ئۇكرائىنادىن سومالى، ئەددىس - ئېبېيبەگىچە نۇرغۇن مەسىلىلەردە دىپلوماتىيە بىلەن تىنچلىقنى ئالدىنقى پىلانغا قويۇپ كېلىۋاتقانلىقىدۇر.
شۇنى چوڭقۇر چۈشىنىپ يەتتۇقكى، ھەققانىي بولغىنىڭىز بىلەن كۈچلۈك بولمىسىڭىز، بۇ دۇنيادا باشقىلارنىڭ مېھىر - شەپقىتىگە تايىنىپ ياشىيالمايسىز. غەززەدە بۇنى كۆردۇق. شۇڭا ھەم كۈچلۈك بولىمىز ھەم ھەققانىي بولىمىز. ئىككىسىنى بىر يەرگە جەم قىلىشقا مەجبۇرمىز، تۈركىيە جۇمھۇرىيىتى بولۇش سۈپىتىمىز بىلەن بۇنى چوقۇم ئىشقا ئاشۇرىمىز.»
