تۈركىيە جۇمھۇرىيىتى تاشقى ئىشلار مىنىستىرى خاقان فىدان ئۆزىنىڭ ئىجتىمائىي تاراتقۇ ھېسابىدا بايانات ئېلان قىلىپ، ئامېرىكا قوشما ئىشتاتلىرى بىلەن ئىران ئوتتۇرىسىدىكى ئۇرۇشقا خاتىمە بېرىش مەقسىتىدە ھاسىل قىلىنغان كېلىشىمنى مەمنۇنلۇق بىلەن قارشى ئالىدىغانلىقىنى تەكىتلىدى.
مىنىستىر خاقان فىدان باياناتىدا: «مەزكۇر كېلىشىم، رايوندا مەڭگۈلۈك تىنچلىق ۋە مۇقىملىقنى ئورنىتىش يولىدىكى مۇھىم بىر باسقۇچ ھېسابلىنىدۇ. تولۇقلىما سۆھبەتلەرنىڭمۇ بەرپاچى پوزىتسىيە بىلەن داۋاملىشىشىنى ئۈمىد قىلىمىز. بۇ مۇھىم قەدەمنى تاشلىغان تەرەپلەرنى، ۋاسىتىچىلىك رولىنى ئۈستىگە ئالغان پاكىستاننى، شۇنداقلا قاتارنى ئاساس قىلغان ھالدا بۇ جەريانغا تۆھپە قوشقان بارلىق دۆلەتلەرنى تەبرىكلەيمىز. ھاسىل قىلىنغان كېلىشىمنىڭ بۇزغۇنچىلىققا ئۇچرىشىغا قارىتىلغان ئۇرۇنۇشلارنىڭ ئالدىنى ئېلىش ھەمدە رايون خاراكتېرلىك تىنچلىق ۋە بىخەتەرلىكنى قوغداش نۇقتىسىدىن، ئالاقىدار بارلىق دۆلەتلەرنىڭ ئەقىل-پاراسەت ۋە مەسئۇلىيەتچانلىق بىلەن پوزىتسىيە تۇتۇشى زور ئەھمىيەتكە ئىگە. تۈركىيە بولۇش سۈپىتىمىز بىلەن، ھۆرمەتلىك جۇمھۇر رەئىسىمىزنىڭ رەھبەرلىكىدە، بۇ جەريانغا باشتىن-ئاخىر زور قوللاش ۋە ئەجىر سىڭدۈردۇق. رايونىمىزدا تىنچلىق، خاتىرجەملىك ۋە مۇقىملىقنىڭ ئورنىتىلىشىغا كۆرسىتىۋاتقان قوللىشىمىز ئۈزلۈكسىز داۋاملىشىدۇ.» دېگەن ئىبارىلەرگە ئورۇن بەردى.
