ئىسرائىلىيەلىك يۇقىرى دەرىجىلىك بىر ئەمەلدار ئىسرائىلىيە بىلەن ھاماسنىڭ غەززەدە بىر-ئىككى ھەپتە ئىچىدە ئۇرۇش توختىتىش ۋە ئەسىر ئالماشتۇرۇش كېلىشىمى ھاسىل قىلالايدىغانلىقىنى، ئەمما بۇنداق بىر كېلىشىمنىڭ بىر كۈن ئىچىدە خۇلاسىلىنىشىنىڭ كۈتۈلمەيدىغانلىقىنى ئېلان قىلدى.
ئەمەلدار ئىسرائىلىيە باش مىنىستىرى بېنيامىن نېتانياھۇنىڭ ۋاشىنگتون زىيارىتى جەريانىدا بۇ ھەقتە چارشەنبە كۈنى بايانات بېرىپ، ئەگەر تەرەپلەر تەكلىپ قىلىنغان 60 كۈنلۈك ئۇرۇش توختىتىشنى قوبۇل قىلسا، ئىسرائىلىيەنىڭ بۇ مۇددەتتىن پايدىلىنىپ پەلەستىن قارشىلىق كۆرسىتىش ھەرىكىتىنىڭ قورالسىزلىنىشىنى تەلەپ قىلىدىغان مەڭگۈلۈك ئۇرۇش توختىتىش تەكلىپىنى سۇنىدىغانلىقىنى ئېيتتى.
ئىسمىنى ئاشكارىلاشنى خالىمىغان ئەمەلدار، ئەگەر ھاماس بۇ تەكلىپنى رەت قىلسا، قىرغىنچىلىقنى «داۋاملاشتۇرىدىغانلىقىنى» ئېيتتى.
بۇ باياناتلار ئامېرىكانىڭ قورشاۋ ئاستىدىكى غەززەدە ئۇرۇش توختىتىش كېلىشىمىنى قوبۇل قىلىشى ئۈچۈن ئىسرائىلىيە باش مىنىستىرى بېنيامىن نېتانياھۇغا بېسىم ئىشلىتىۋاتقان بىر پەيتتە ئېلان قىلىندى.
ئىسرائىلىيە ئاساسلىق ئۆكتىچىلەر رەھبىرى يائىر لاپىد بولسا، باش مىنىستىر بېنيامىن نېتانياھۇنىڭ غەززەنىڭ جەنۇبىدىكى «موراگ كارىدورى» دەپ ئاتالغان مەسىلىنى ئوتتۇرىغا قويۇپ، ئۇرۇش توختىتىش كېلىشىمىگە ئېرىشىشنىڭ ئالدىدا توسالغۇ سۈپىتىدە كۆرسىتىشىنى قاتتىق تەنقىد قىلدى.
ئۆكتىچىلەر رەھبىرى يائىر لاپىد ئىسرائىلىيە دۆلەتلىك رادىئو-تېلېۋىزىيە ئىستانسىسى «كان» نىڭ زىيارىتىنى قوبۇل قىلىپ، «نېتانياھۇ كېلىشىمنىڭ ئالدىغا توسالغۇلارنى ياراتماقتا» دېگەن سۆزلەرنى ئىشلەتتى.
ئۇ يەنە: «ھازىر تۇيۇقسىزلا موراگ كارىدورى بىزنىڭ مەۋجۇتلۇقىمىزنىڭ يېڭى ئۇل تېشى بوپقالدىمۇ؟» دەپ سورىدى.
ئىسرائىلىيەنىڭ قىرغىنچىلىقى
ئىسرائىلىيە 2023-يىلى 7-ئۆكتەبىردىن بۇيان قورشاۋ ئاستىدىكى غەززەدە كۆپىنچىسى ئاياللار ۋە كىچىك بالىلار بولۇپ، 57 مىڭ 500 دىن ئارتۇق پەلەستىنلىكنى ئۆلتۈردى.
پەلەستىننىڭ رەسمىي خەۋەر ئاگېنتلىقى «ۋافا» نىڭ خەۋىرىگە قارىغاندا، ۋەيران بولغان ئۆيلەرنىڭ خارابىلىرى ئاستىدا تەخمىنەن 11 مىڭ پەلەستىنلىكنىڭ جەسىتى بارلىقىدىن ئەندىشە قىلىنماقتا.
مۇتەخەسسىسلەر بولسا غەززەدىكى ھەقىقىي قازا قىلغانلار سانىنىڭ پەلەستىن دائىرىلىرى ئېلان قىلغاندىن كۆپ يۇقىرى ئىكەنلىكىنى، بۇ ساننىڭ 200 مىڭ ئەتراپىدا بولۇشى مۇمكىنلىكىنى مۆلچەرلىمەكتە.
ئىرقىي قىرغىنچىلىق جەريانىدا ئىسرائىلىيە رايوننىڭ كۆپ قىسمىنى ۋەيران قىلىپ، پۈتكۈل دېگۈدەك نوپۇسنى يۇرت-ماكانلىرىدىن ئايرىدى.
ئۇنىڭ ئۈستىگە، جىددىي ئېھتىياجلىق بولغان ئىنسانپەرۋەرلىك ياردەم بۇيۇملىرىنىڭ كىرىشىنى توسۇپ، پەقەتلا ب د ت نىڭ ياردەم خىزمىتىنى شاللىۋېتىش مەقسىتىدە قۇرۇلغان، ئامېرىكا قوللىغان ۋە «ئۆلۈم توزىقى» دەپ تەنقىد قىلىنغان تالاش-تارتىشلىق ياردەم گۇرۇپپىسىنىڭ كىرىشىگىلا يول قويدى.
