ئىران دۆلەتنىڭ جەنۇبىدىكى مىناب شەھىرىگە جايلاشقان بىر باشلانغۇچ مەكتەپكە 28-فېۋرال كۈنى قىلىنغان باشقۇرۇلىدىغان بومبا ھۇجۇمىنى «كەچۈرگۈسىز» ئۇرۇش جىنايىتى دەپ سۈپەتلىدى ۋە مەسئۇللارنىڭ جاۋابكارلىققا تارتىلىشىنى تەلەپ قىلدى.

تاشقى ئىشلار مىنىستىرلىقى باياناتچىسى ئىسمائىل بەقايى چارشەنبە كۈنى ئېلان قىلغان باياناتىدا، ئىران دائىرىلىرى 168 ئوقۇغۇچىنىڭ جېنىغا زامىن بولغانلىقىنى ئىلگىرى سۈرگەن ھۇجۇمنىڭ جازاسىز قالماسلىقى كېرەكلىكىنى ئەسكەرتتى.

بەقايى ئاممىۋى ئورتاقلىشىش تور بېتى X سەھىپىسىدە ئېلان قىلغان باياناتىدا، 28-فېۋرال كۈنى مىناب شەھىرىدە ئېلىپ بېرىلغان «ئامېرىكانىڭ توماخاۋك (Tomahawk) تىپلىق قوش باشقۇرۇلىدىغان بومبا» ھۇجۇمىنىڭ «168 نەپەر ئىرانلىق كىچىك پەرىشتىنى قەتل قىلغانلىقىنى» ئېيتىپ، بۇنىڭ «جازاسىز قالماسلىقىغا تېگىشلىك كەچۈرگۈسىز، ۋەھشىيلىككە تولغان ئۇرۇش جىنايىتى» ئىكەنلىكىنى تەكىتلىدى.

ئىران دۆلەتلىك تېلېۋىزىيەسى بۇنىڭدىن ئىلگىرى ھۇجۇمنىڭ ئىراننىڭ جەنۇبىدىكى ھۆرمۇزگان ئۆلكىسىگە قاراشلىق مىناب شەھىرىدىكى بىر قىزلار باشلانغۇچ مەكتىپىنى نىشان قىلغانلىقىنى خەۋەر قىلغان ئىدى. خەۋەرگە ئاساسلانغاندا، ھۇجۇمدا ئوقۇغۇچىلار ۋە ئوقۇتقۇچىلارنىمۇ ئۆز ئىچىگە ئالغان 170 تىن ئارتۇق كىشى ھاياتىدىن ئايرىلغان.

ئامېرىكا پىرېزىدېنتى دونالد ترامپ ئىلگىرى ھۇجۇمنىڭ پەردە ئارقىسىدا ئىراننىڭ بولۇشى مۇمكىنلىكىنى ئىلگىرى سۈرۈپ: «كۆرگەنلىرىمگە ئاساسلانغاندا، بۇنى ئىران قىلدى» دېگەن ئىدى.

ھۇجۇمنىڭ ئامېرىكا ئارمىيەسى تەرىپىدىن كەڭ كۆلەمدە قوللىنىلىدىغان «توماخاۋك» تىپلىق باشقۇرۇلىدىغان بومبىلىرى بىلەن ئېلىپ بېرىلغانلىقىغا ئائىت خەۋەرلەر ئوتتۇرىغا چىققاندىن كېيىن، ترامپ ھېچقانداق پاكىت كۆرسەتمەيلا ئىراننىڭ بەزى «توماخاۋك» تىپلىق باشقۇرۇلىدىغان بومبىلىرىغا ئىگە ئىكەنلىكىنىمۇ ئىلگىرى سۈردى. بۇ دەۋانىڭ كېيىنچە خاتا ئىكەنلىكى ئىسپاتلاندى.

ئامېرىكا تاراتقۇلىرىدا چارشەنبە كۈنى چىققان خەۋەرلەردە، داۋاملىشىۋاتقان بىر ھەربىي تەكشۈرۈشنىڭ دەسلەپكى نەتىجىلىرىنى مەنبە كۆرسىتىپ، ھۇجۇمنىڭ ئامېرىكا ئارمىيەسى تەرىپىدىن ئېلىپ بېرىلغان بولۇشى مۇمكىنلىكى قەيت قىلىندى.

ھۇجۇمغا مۇناسىۋەتلىك تەكشۈرۈشلەر داۋاملاشماقتا.