يەمەندە سەئۇدى ئەرەبىستان باشچىلىقىدا ھەرىكەت قىلىۋاتقان ئىتتىپاقداش ئارمىيە، يەمەننىڭ جەنۇبىدىكى بۆلگۈنچىلەرنىڭ رەھبىرى ئەيدەرۇس زۇبەيدىنىڭ كېمە بىلەن سومالىيلاندقا بارغانلىقىنى، ئاندىن سومالىنىڭ پايتەختى مۇقدىشۇغا بارىدىغان بىر ئايروپىلانغا چىققانلىقىنى ئاشكارىلىدى.
ئىتتىپاقداش ئارمىيە پەيشەنبە كۈنى سەھەردە ئېلان قىلغان باياناتىدا، «زۇبەيدىنى ئەرەب بىرلەشمە خەلىپىلىكى ئوفىتسېرلىرىنىڭ نازارىتى ئاستىدا» سومالىيلاندتىن مۇقدىشۇغا ئېلىپ بارغان ئايروپىلاننىڭ، ئەبۇ زەبىدىكى بىر ھەربىي ئايرودرومغا قاراپ ئۇچۇشتىن بۇرۇن بىر سائەت كۈتكەنلىكىنى بىلدۈرۈلگەن بولسىمۇ، ئەمما زۇبەيدىنىڭ يەنىلا ئايروپىلاندا بار-يوقلۇقى تىلغا ئېلىنمىدى.
ئىتتىپاقداش ئارمىيەنىڭ بۇ باياناتى، جەنۇبىي ئۆتۈش كېڭىشى (GGK) رەھبىرى زۇبەيدىنىڭ سۆھبەت ئۈچۈن رىيادقا ئۇچالمىغانلىقى ۋە تەقدىرىنىڭ نامەلۇم ئىكەنلىكى ھەققىدىكى خەۋەرلەردىن بىر كۈن كېيىن ئېلان قىلىندى. بۇ ئەھۋال ئۆتكەن ئايدا پارتلىغان ھەربىي جىددىيچىلىكنى كونترول قىلىش تىرىشچانلىقلىرىغا كۆلەڭگە چۈشۈردى.
يەمەننىڭ جەنۇبىدا تېز سۈرئەتتە تەرەققىي قىلىۋاتقان بۇ كىرىزس، نېفىتقا باي پارس قولتۇقىنىڭ ئەڭ كۈچلۈك ئىككى دۆلىتى بولغان سەئۇدى ئەرەبىستان بىلەن ئەرەب بىرلەشمە خەلىپىلىكى ئوتتۇرىسىدا ئىختىلاپ كەلتۈرۈپ چىقىرىپ، ئىران قوللاۋاتقان ھۇسىي ئىسيانچىلىرىغا قارشى ئۇرۇش قىلىۋاتقان، خەلقئارادا ئېتىراپ قىلىنغان يەمەن ھۆكۈمىتى باشچىلىقىدىكى ئىتتىپاقداش ئارمىيەنى پارچىلىنىشقا ئىتتىردى.
سەئۇدى ئەرەبىستان بىلەن ئەرەب بىرلەشمە خەلىپىلىكى ھۇسىي ئىسيانچىلىرى 2014-يىلى يەمەننىڭ پايتەختى سانانى ئىگىلىۋالغاندىن كېيىن، يەمەن ئىشلىرىغا تۇنجى قېتىم ئارىلىشىشقا باشلىغانىدى. ئەرەب بىرلەشمە خەلىپىلىكى كېيىنكى يىلى خەلقئارادا ئېتىراپ قىلىنغان ھۆكۈمەتنى قوللاش ئۈچۈن سەئۇدى ئەرەبىستان قوللاۋاتقان ئىتتىپاقداش ئارمىيەگە قاتناشقان.
جەنۇبىي ئۆتۈش كېڭىشى 2017-يىلى ئەرەب بىرلەشمە خەلىپىلىكىنىڭ قوللىشى بىلەن قۇرۇلغان بولۇپ، ئاخىرىدا يەمەننىڭ جەنۇبى ۋە شەرقلىرىنى كونترول قىلىۋاتقان ھۆكۈمەت ئىتتىپاقىغا قوشۇلغانىدى. جەنۇبىي ئۆتۈش كېڭىشى قىسىملىرى ئۆتكەن ئايدا تۇيۇقسىز كەڭ تېررېتورىيەنى قولغا چۈشۈرۈپ، كۈچ سېلىشتۇرمىسىنى ئۆزگەرتىۋەتتى ۋە سەئۇدى ئەرەبىستان بىلەن ئەرەب بىرلەشمە خەلىپىلىكىنى بىر-بىرىگە قارشى ھالەتكە كەلتۈرۈپ قويدى.
