خىتاي مېتېئورولوگىيە مۇتەخەسسىسلىرى تېخىمۇ ئېغىر ھاۋا رايى شارائىتىنىڭ كېلىدىغانلىقى ھەققىدە ئاگاھلاندۇردى.
خىتاي دۆلەت تاراتقۇلىرىنىڭ سەيشەنبە كۈنى خەۋەر قىلىشىچە، خىتاينىڭ شىمالىي غەربىدىكى شەنشى ئۆلكىسىدە شىددەتلىك يامغۇرنىڭ كەڭ كۆلەملىك سەل ئاپىتى ۋە تاغ گۇمىرىلىپ چۈشۈش خەۋپىنى ئاشۇرۇشىدىن كېيىن، سەل خەۋپى بار رايونلاردىن 115 مىڭدىن ئارتۇق كىشى مەجبۇرىي كۆچۈرۈلگەن.
خىتاي مەركىزىي تېلېۋىزىيە ئىستانسىسى (CCTV) ۋە يەرلىك دائىرىلەر شىددەتلىك يامغۇرنىڭ شەنشىنىڭ كۆپ قىسمىغا ئېغىر تەسىر كۆرسىتىشى بىلەن 49 مىڭ 925 ئائىلىدىن 115 مىڭ 756 كىشىنىڭ باشقا يەرلەرگە مەجبۇرىي يۆتكەلگەنلىكىنى ئاشكارىلىدى.
ئەڭ كۈچلۈك يامغۇر لوئونان، توڭگۇان ۋە بەيخې ناھىيەلىرىدە يۈز بەردى. لوئوناندىكى شىپو ئىستانسىسىغا 136.4 مىللىمېتىر يامغۇر ياغدى.
سەل خەۋپى ئاگاھلاندۇرۇشلىرى داۋاملاشماقتا
28 دەريا ۋە 40 ھىدرولوگىيە ئىستانسىسىدا ئونلارچە ئەڭ يۇقىرى سەۋىيەدىكى تاشقىن ئارخىپقا كىرگۈزۈلدى. خەنجياڭ، ۋېيخې، دانجياڭ ۋە يىلو دەريالىرى تېشىپ سەل ئاپەتلىرىنى كەلتۈرۈپ چىقاردى.
شەنشى ئۆلكىلىك مېتېئورولوگىيە كۆزىتىش ئىدارىسى شىددەتلىك يامغۇر ۋە ناچار ھاۋا رايى شارائىتى ئۈچۈن ئەپلىسىن رەڭلىك ئاگاھلاندۇرۇشنى يېڭىلاپ، چارشەنبە كۈنىگىچە يەنە بىر قېتىملىق كۈچلۈك يامغۇر، گۈلدۈرماما بىلەن ئارلاش يامغۇر ۋە كۈچلۈك بوران دولقۇنىنىڭ كېلىدىغانلىقى ھەققىدە ئاگاھلاندۇردى.
جىددىي ھالەتلەرگە تاقابىل تۇرۇش ئىدارىسى مەسئۇللىرى يەرلىك ھۆكۈمەتلەرنى يۇقىرى خەتەرلىك رايونلاردىن كۆچۈرۈش خىزمەتلىرىنى داۋاملاشتۇرۇشقا چاقىرىق قىلىش بىلەن بىرگە، تۇيۇقسىز بېسىپ كېلىدىغان سەل، شەھەرلەردىكى سۇ بېسىش، تاغ گۇمىرىلىپ چۈشۈش ۋە لاي ئېقىش ۋەقەلىرىگە قارىتا ئاگاھلاندۇرۇش ئېلان قىلدى.
ئۆلكىلىك ھۆكۈمەت يەنە، سەيشەنبە كۈنى سەلنىڭ ئالدىنى ئېلىش يىغىنى ئۆتكۈزۈپ، قېيىن ھاۋا رايى شارائىتىنىڭ داۋاملىشىشى سەۋەبىدىن تېخىمۇ كۈچلۈك تەدبىرلەرنى ئېلىشقا چاقىردى.
