ھاماسنىڭ دىياسپورا ئىشخانىلىرىنىڭ رەئىسى خالىد مەشئەل، يەكشەنبە كۈنى مىسىرنىڭ قاھىرە شەھىرىدە ئۆتكۈزۈلگەن بىر مۇراسىمدا سۆز قىلىپ، پەلەستىن خەلقىگە تاشقىرىدىن ھېچقانداق سىياسىي سىستېمىنى مەجبۇرىي تېڭىشقا بولمايدىغانلىقىنى ئوتتۇرىغا قويدى.
ھاماس يەكشەنبە كۈنى مەشئەلنىڭ مىسىرنىڭ قاھىردە شەھىرىدە ئۆتكۈزۈلگەن «ئەسىر ئالماشتۇرۇش ۋە ئۇرۇش توختىتىش كېلىشىمى دائىرىسىدە قويۇپ بېرىلگەندىن كېيىن سۈرگۈن قىلىنغان پەلەستىنلىك ئەسىرلەرنىڭ شەرىپىگە ئۇيۇشتۇرۇلغان مۇراسىمدا قىلغان سۆزلىرىنىڭ ۋىدېيوسىنى تارقاتتى.
مەشئەل نۇتقىدا: «غەززە پەقەت ئۇنىڭ خەلقىگە تەۋە. نە غەززە، نە غەربىي قىرغاق خەلقى ئۆز زېمىنىنى باشقا جايلارغا تېگىشمەيدۇ» دېدى.
پەلەستىننىڭ پەلەستىندىن باشقا تاللىشى يوق
مەشئەل، ئىسرائىلىيەنىڭ قورشاۋىدىكى غەززە ۋە ئىشغال قىلىنغان غەربىي قىرغاقتىكى پەلەستىنلىكلەرنىڭ ئۆز زېمىنىغا بولغان ساداقىنىڭ كۈچلۈك ئىكەنلىكىنى تەكىتلەپ، «پەلەستىننىڭ پەلەستىندىن باشقا تاللىشى يوق. ئەرەب ۋە ئىسلام دۆلەتلىرىگە بولغان ھۆرمىتىمىز داۋاملاشسىمۇ، ھېچقانداق جاي زېمىنىمىزنىڭ ئورنىنى ئالالمايدۇ» دېدى.
خالىد مەشئەل پەلەستىننىڭ پەقەت ئۇنىڭ خەلقى تەرىپىدىن باشقۇرۇلىدىغانلىقىنى، ئۇنىڭغا ھېچقانداق يات سىياسىي سىستېمىنى تاڭغىلى بولمايدىغانلىقىنى ئالاھىدە تەكىتلىدى.
ئۇ يەنە، پەلەستىننىڭ دۇچ كېلىۋاتقان قىيىنچىلىقلارغا قارشى تۇرۇش ئۈچۈن مىللىي بىرلىكنىڭ زۆرۈرلىكىنى تىلغا ئېلىپ، ئەرەب دۇنياسىنى پەلەستىن خەلقىنى قوللاشقا چاقىردى.
ئۇ غەززەنىڭ چوڭ بىر قىلتاققا دۇچ كېلىۋاتقانلىقىنى، سۈرگۈنگە مەجبۇرلاش ئۈچۈن ئۇلارنى ئاچ قويۇش ئۇرۇنۇشلىرىنىڭ داۋاملىشىۋاتقانلىقىنى ئەسكەرتتى.
ئۇ ئاخىرىدا « غەززەنىڭ كەلگۈسى، ھۆكۈمىتى، قوراللىرى ۋە قارشىلىق كۆرسىتىش كۈچى تەھدىت ئاسىتدا تۇرماقتا» دېگەنلەرنى سۆزلىرىگە ئىلاۋە قىلدى.
