تۈركىيە تاشقى ئىشلار مىنىستىرى خاقان فىدان بۈگۈن ئىشقا ئاشۇرۇلىدىغان ئالاھىدە ئايروپىلان سەپىرى ئارقىلىق خەلقئارا سۇمۇد فىلوتىدىكى تۈركىيە پۇقرالىرى ۋە ئۈچۈنچى دۆلەتدىن كەلگەن قاتناشقۇچىلارنى تۈركىيەگە ئېلىپ كېلىشنىڭ پىلانلىنىۋاتقانلىقىنى بىلدۈردى.
فىدان ئاممىۋى ئورتاقلىشىش تور بېتى NSosyal سەھىپىسدە، خەلقئارا سۇمۇد فىلوتىدىكى تۈركىيە پۇقرالىرى ۋە ئۈچۈنچى دۆلەتلەرنىڭ قاتناشقۇچىلىرىنى تۈركىيەگە ئېلىپ كېلىش توغرىسىدا ئۇچۇر ھەمبەھىرلىدى.
خەلقئارا سۇمۇد فىلوتىغا قىلىنغان قانۇنسىز مۇداخىلە نەتىجىسىدە تۇتقۇن قىلىنغان تۈركىيە پۇقرالىرىنىڭ بىخەتەرلىكىنى ۋە تۈركىيەگە سالامەت قايتىپ كېلىشىنى كاپالەتكە ئىگە قىلىش ئۈچۈن، مۇناسىۋەتلىك بارلىق ئاپپاراتلار بىلەن بىرلىكتە خىزمەت ئىشلىنىۋاتقانلىقىنى ئەسكەرتكەن فىدان: «بۈگۈن ئىشقا ئاشۇرۇلىدىغان ئالاھىدە ئايروپىلان سەپەرلىرى ئارقىلىق پۇقرالىرىمىزنى ۋە ئۈچۈنچى دۆلەتلەردىن كەلگەن قاتناشقۇچىلارنى تۈركىيەگە ئېلىپ كېلىشنى پىلانلاۋاتىمىز» دېدى.
فىدان تۈركىيە پۇقرالىرىنىڭ ھوقۇقىنى قوغداشنى ۋە غەززەدىكى پۇقرالارغا قارىتا ئىنسانىي مەسئۇلىيەتلىرىنى ئادا قىلىشنى داۋاملاشتۇرىدىغانلىقىنى؛ پەلەستىن خەلقىنى قەتئىيلىك بىلەن داۋاملىق قوللايدىغانلىقىنى تەكىتلىدى.
ئىسرائىلىيە ئارمىيەسىنىڭ خەلقئارا سۇمۇد فىلوتىغا قىلغان ھۇجۇملىرى
ئىسرائىلىيەنىڭ غەززە رايونىغا قاراتقان قورشاۋىنى بۇزۇپ تاشلاش ۋە زۆرۈر بولغان ئىنسانپەرۋەرلىك ياردەملىرىنى يەتكۈزۈشنى مەقسەت قىلغان «خەلقئارا سۇمۇد فىلوتى 2026 باھار ۋەزىپىسى»، 29-ئاپرېل كېچىسى گىرىت ئارىلى ساھىللىرىدا، گىرېتسىيە دېڭىز تەۋەلىكىدىن بىرنەچچە دېڭىز مىلى يىراقلىقتا ئىسرائىلىيە ئارمىيەسىنىڭ قانۇنسىز مۇداخىلىسىگە دۇچ كەلگەن ئىدى.
غەززەگە 600 دېڭىز مىلى يىراقلىقتىكى خەلقئارا دېڭىز تەۋەلىكىدە قىلىنغان ھۇجۇمدا، ئىسرائىلىيە ئارمىيەسى 177 نەپەر پائالىيەتچىنى تۇتقۇن قىلغان ۋە ئۇلارغا ۋەھشىيانە مۇئامىلە قىلغان ئىدى.
ئىسرائىلىيە ئارمىيەسى 44 دۆلەتتىن 428 نەپەر پائالىيەتچى ئورۇن ئالغان، جەمئىي 50 پاراخوتتىن تەشكىل تاپقان فىلوتقا، 18-ماي كۈنى غەززەگە قاراپ خەلقئارا دېڭىز تەۋەلىكىدە كېتىۋاتقاندا يەنە بىر قېتىم ھۇجۇم قىلدى ۋە پائالىيەتچىلەرنى قانۇنسىز ھالدا تۇتقۇن قىلدى. فىلوتتا 78 نەپەر تۈركىيەلىك قاتناشقۇچىمۇ بار ئىدى.
ئىسرائىلىيە ئارمىيەسى 2025-يىلى ئاۋغۇست ئېيىدىمۇ 44 تىن ئارتۇق دۆلەتتىن 500 نەپەر پائالىيەتچى ئولتۇرغان 40 تىن ئارتۇق پاراخوت بىلەن غەززەگە قاراپ كېتىۋاتقان خەلقئارا سۇمۇد فىلوتىغىمۇ مۇشۇنىڭغا ئوخشاش ھۇجۇم قىلغان ئىدى.
