ئامېرىكادىكى خەلقئارالىق تاراتقۇ شىركىتى «بلۇمبېرگ» كرېمىلنىڭ ئۇكرائىناغا قارشى «تاكتىكىلىق يادرو قورالى» ئىشلىتىشى مۇمكىنلىكىنى ئىلگىرى سۈردى.
«بلۇمبېرگ» نىڭ كرېمىلغا يېقىن ئۈچ مەنبەگە تايىنىپ خەۋەر قىلىشىچە، موسكۋا شىمالىي ئاتلانتىك ئەھدى تەشكىلاتى — ناتو ئەزالىرىنىڭ كىيېۋنى قورال ۋە ئىستىخبارات ئۇچۇرلىرى بىلەن تەمىنلىشى سەۋەبىدىن، ئۇكرائىنانىڭ ھۇجۇملىرىنى «ناتو ئەزاسى دۆلەتلەرنىڭ ھۇجۇمى» دەپ قارىماقتا.
خەۋەردە مۇنداق دېيىلدى: «كرېمىلغا يېقىن مەنبەلەرنىڭ بىلدۈرۈشىچە، كۈچىيىۋاتقان ھۇجۇم ۋە قايتۇرما ھۇجۇم دەۋرىيلىكى، بارغانسېرى كۆپ رۇسىيە ئەمەلدارلىرىنى پىرېزىدېنت ۋىلادىمىر پۇتىننىڭ ئاخىرقى چارە سۈپىتىدە ئۇكرائىنادا تاكتىكىلىق يادرو قورالى ئىشلىتىشنى تاللىشى مۇمكىن دېگەن خۇلاسىگە كەلتۈرمەكتە».
مەنبەلەر نۆۋەتتىكى توقۇنۇش باسقۇچىنىڭ ھەربىي جىددىيلىشىشنىڭ ئەڭ يۇقىرى پەللىسى ئەمەسلىكىنى بىلدۈردى. ئۇلار رۇسىيەنىڭ تىنچلىق كېلىشىمى سۆھبەتلىرىنىڭ تۇرمۇزلىنىپ قالغانلىقىنى تونۇپ يەتكەندىن كېيىن، ئۇكرائىناغا قارىتىلغان ھۇجۇملىرىنى كۈچەيتىشكە تەييارلىنىۋاتقانلىقىنى ئىلگىرى سۈردى.
مەزكۇر مەنبەلەرنىڭ ئىگىلىگەن ئۇچۇرلىرىغا قارىغاندا، موسكۋا كىيېۋ ۋە ئۇكرائىنانىڭ باشقا شەھەرلىرىدىكى ئۇل ئەسلىھە نىشانلىرىغا قارىتىلغان كۈچلۈك يادروسىز باللىستىك باشقۇرۇلىدىغان بومبا ھۇجۇملىرىنى كۆپەيتىشنى ئويلاشماقتا ئىكەن.
خەۋەردە يەنە: «ئامېرىكانىڭ ئۇرۇشنى ئاخىرلاشتۇرۇش تىرىشچانلىقى نەتىجە بەرمىدى. پىرېزىدېنت دونالد ترامپنىڭ ئىران بىلەن بولغان توقۇنۇشقا مەركەزلىشىشى سەۋەبىدىن سۆھبەتلەر تورمۇزلىنىپ قالدى» دەپ باھا بېرىلدى.
رۇسىيە بىلەن ئۇكرائىنا يېقىنقى ئايلاردا بىر-بىرىنىڭ زېمىنىغا قارىتىلغان ھاۋا ھۇجۇملىرىنى كۈچەيتكەن.
ئۇكرائىنا رۇسىيەدە كەڭ كۆلەملىك يېقىلغۇ كەمچىللىكىنى پەيدا قىلغان نېفىت ئايرىش زاۋۇتلىرى ۋە چوڭ ئېلېكتىرونلۇق سودا شىركەتلىرىنىڭ ئامبارلىرىنى زەربە ئوبيېكتى قىلغان. بۇ ھۇجۇملارنىڭ رۇسىيەنىڭ ئەشيا ئوبوروتى تورىغا مىلياردلارچە دوللارلىق زىيان يەتكۈزگەنلىكى بىلدۈرۈلدى.
