ئۇكرائىنانىڭ رۇسىيەدىكى نېپىت ئايرىش زاۋۇتلىرىغا قاراتقان ھۇجۇملىرى سەۋەبىدىن يېقىلغۇ تەمىناتىدا ئاقساشلار كۆرۈلمەكتە.
رۇسىيەنىڭ ئورېنبۇرگ رايونىدىكى ئورسك نېپىت ئايرىش زاۋۇتىنىڭ ئۇچقۇچىسىز ھاۋا ئاپپاراتى ھۇجۇمى سەۋەبىدىن پۈتۈنلەي ئىشتىن توختاپ قالغانلىقى، رېمونت قىلىش خىزمەتلىرىنىڭ 6 ئايغىچە داۋاملىشىشى مۇمكىنلىكى بىلدۈرۈلدى.
ئورېنبۇرگ ئۆلكە ھاكىمى يېۋگېنىي سولنتسېۋ ئېلان قىلغان يازما باياناتىدا، 11-ئاۋغۇستتا ئورسك نېپىت ئايرىش زاۋۇتىغا قارىتا ئېلىپ بېرىلغان ئۇچقۇچىسىز ھاۋا ئاپپاراتى ھۇجۇمى ئۈستىدە توختالدى.
ھۇجۇمدا نېپىت ئايرىش زاۋۇتىنىڭ ھالقىلىق ئۇل-ئەسلىھەسىنىڭ زىيانغا ئۇچرىغانلىقىنى ۋە مەزكۇر بۆلۈملەرنىڭ رېمونت قىلىنىشىنىڭ مۇمكىن ئەمەسلىكىنى بىلدۈرگەن سولنتسېۋ: «مۇئەسسەسە پۈتۈنلەي ئىشتىن توختىدى. ئەڭ يامان سېنارىيەگە تەييارلىق قىلىۋاتىمىز. سىرتتىن كەلتۈرۈلىدىغان يېقىلغۇغا تايىنىشقا مەجبۇر بولىمىز» دېگەن سۆزلەرنى ئىشلەتتى.
مۇئەسسىسەدىكى ئەسلىھەلەرنىڭ چەت ئەلدىن ئىمپورت قىلىنغانلىقىنى ئەسكەرتكەن سولنتسېۋ، ئېمبارگولار سەۋەبىدىن رېمونت قىلىش مۇددەتلىرىنىڭ 6 ئايغىچە ئۇزىراپ كېتىشى مۇمكىنلىكىنى ئېيتتى.
سولنتسېۋ رايوندا يېقىلغۇ تەمىناتىنىڭ قايتىدىن ئورۇنلاشتۇرۇلغانلىقىنى بىلدۈرۈپ، ئورېنبۇرگدىكى 287 يېقىلغۇ ئېلىش ئىستانسىسىنىڭ %80 نىڭ پائالىيەتتە ئىكەنلىكىنى، يېقىلغۇ تەمىناتىدا ۋەزىپە ئۆتەۋاتقان ئاپتوموبىللارغا ئالدىن ئۆتۈشتەك ئالاھىدە مۇلازىمەت قىلىنىۋاتقانلىكىنى ئېيتتى.
ئورسكقا جايلاشقان نېپىت ئايرىش زاۋۇتى 11-ئاۋغۇستتا ئۇچقۇچىسىز ھاۋا ئاپپاراتى ھۇجۇمىغا ئۇچراپ، مۇئەسسىسەدە ئوت ئاپىتى يۈز بەرگەن ئىدى. ھۇجۇمدا يارىلانغانلارنىڭ يوقلۇقى بىلدۈرۈلگەن ئىدى.
ئۇكرائىنانىڭ رۇسىيەدىكى نېپىت ئايرىش زاۋۇتلىرىغا قاراتقان ھۇجۇملىرى سەۋەبىدىن يېقىلغۇ تەمىناتىدا مەسىلىلەر كۆرۈلگەن، بېنزىن ۋە دىزېل ئېكسپورتى توختىتىپ تۇرۇلغان ئىدى.
