تۈركىيە تاشقى ئىشلار مىنىستىرى خاقان فىدان ئاسىيا-تىنچ ئوكيان رايونىدىكى زىيارىتى دائىرىسىدە ھىندونېزىيەگە يېتىپ باردى.

خاقان فىدان پايتەخت جاكارتادا ھىندونېزىيە تاشقى ئىشلار مىنىستىرى سۇگىيونو تەرىپىدىن قىزغىن قارشى ئېلىندى.

فىدان يۇقىرى دەرىجىلىك ھۆكۈمەت ئەمەلدارلىرى بىلەن ئۆتكۈزىدىغان سۆھبەتلىرىدە، تۈركىيە – ھىندونېزىيە ئوتتۇرىسىدىكى ئىككى تەرەپلىك ھەمكارلىقنى كېڭەيتىش، سودا ۋە مۇداپىئە مۇناسىۋەتلىرىنى كۈچەيتىش، شۇنداقلا رايون خاراكتېرلىك ۋە خەلقئارالىق خەۋپسىزلىك مەسىلىلىرى قاتارلىق تېمىلاردا ئۆزئارا پىكىر ئالماشتۇرىدۇ.

 تارىخىي رىشتىلەرنى چوڭقۇرلاشتۇرۇش

تۈركىيە ھىندونېزىيەنىڭ مۇستەقىللىقىنى ئېتىراپ قىلغان تۇنجى دۆلەتلەرنىڭ بىرى.

ئىككى دۆلەت ئوتتۇرىسىدا 1950-يىلى دىپلوماتىك مۇناسىۋەتلەر ئورنىتىلغان بولۇپ، تۈركىيەنىڭ جاكارتادا تۇرۇشلۇق ئەلچىخانىسى 1957-يىلى ئېچىلغان.

تۈركىيە بىلەن ھىندونېزىيە ئوتتۇرىسىدىكى ئالىي ئىستراتېگىيەلىك ھەمكارلىق كېڭىشى 2022-يىلى تۈركىيە جۇمھۇرىيىتى جۇمھۇر رەئىسى رەجەپ تاييىپ ئەردوغاننىڭ 20 دۆلەت گۇرۇھى (G20) باشلىقلار يىغىنى مۇناسىۋىتى بىلەن بالىدا ئېلىپ بارغان زىيارىتى جەريانىدا قۇرۇلغان ئىدى.