ئاۋسترالىيەنىڭ تاسمىنىيە ئىشتاتىدا، تەبىئەت سەيلىسى قىلىش جەريانىدا يوقاپ كەتكەن بېلگىيەلىك ساياھەتچى سېلىن كرېمېرغا تەۋە يانفون، ئارىدىن ئىككى يىل ئۆتكەندىن كېيىن پەيلاسوپ شارقىراتمىسى (Philosopher Falls) يېقىنىدا تېپىلدى. بۇ ئىلگىرىلەشكە ئەگىشىپ، تاسمىنىيە ساقچىلىرى كرېمېرنىڭ ئائىلىسى ۋە دوستلىرى تەرىپىدىن تەشكىللەنگەن خۇسۇسىي ئىزدەش خىزمەتلىرىگە رەسمىي ھالدا قاتناشقانلىقىنى ئېلان قىلدى.
ساقچىلار، تېلېفوننىڭ ئىلگىرى ئىزدەش ئېلىپ بېرىلغان بىر رايوندا تېپىلغانلىقىنى ۋە ئۈسكۈنىنىڭ ئەدلىيەلىك تەكشۈرۈشكە ئېلىنغانلىقىنى بىلدۈردى. ئەمەلدارلار، بۇ بايقاشنىڭ كرېمېرنىڭ يوقىلىشىغا مۇناسىۋەتلىك تەكشۈرۈشتە ھەل قىلغۇچ ئەھمىيەتكە ئىگە ئىكەنلىكىنى تەكىتلدى.
كرېمېرنىڭ ئائىلىسى ۋە يېقىن دوستلىرى، ھەپتە ئاخىرىدا رايوندا يېڭى بىر ئىزدەش خىزمىتى باشلىغان ئىدى. بېلگىيەدىن كەلگەن تۆت دوستىمۇ قاتناشقان ئىزدەش خىزمىتىنىڭ بەش كۈن داۋاملىشىشى پىلانلانماقتا.
تاسمىنىيە ساقچىسى ئىدارىسدىن راۋېتچىك ئاندېۋ ھانسون، تېلېفوننىڭ تېپىلغان ئورنى ۋە ئېرىشىلگەن رەقەملىك سانلىق مەلۇماتلارنىڭ، كرېمېرنىڭ قۇياش پېتىشقا يېقىن سائەتلەردە تېخىمۇ قىسقا بىر يولدىن ئاپتوموبىلىغا يېتىپ بېرىش ئۈچۈن سەيلە يولىدىن ئايرىلغان بولۇشى مۇمكىنلىكىنى كۆرسىتىدىغانلىقىنى ئېيتتى. ھانسون كرېمېرنىڭ تېلېفونىنى چۈشۈرۈپ قويغاندىن كېيىن يولىغا ئۇنىڭسىز داۋاملاشتۇرغان بولۇشى مۇمكىنلىكىنى، زىچ ۋە ئويمان-دۆڭلۈك يەر شەكلىدە يۆنىلىشىنى يوقىتىپ قويغانلىقىنىڭ مۆلچەرلىنىۋاتقانلىقىنى ئىپادىلىدى.
سېلىن كرېمېر ئەڭ ئاخىرقى قېتىم 2023-يىلى 17-ئىيۇندا كۆرۈلگەن ئىدى. دوستلىرى ئۇنىڭدىن خەۋەر ئالالمىغاندىن كېيىن توققۇز كۈن ئۆتۈپ يوقاپ كەتكەنلىكى توغرىسىدا مەلۇمات بەرگەن ئىدى. ساقچىلار، كرېمېرنىڭ ئاپتوموبىلىنىڭ يوقىلىپ كېتىپ بىر قانچە كۈندىن كېيىن سەيلە يولىغا يېقىن بىر نۇقتىدا تېپىلغانلىقىنى، ئەمما ئېلىپ بېرىلغان نۇرغۇن قېتىملىق ئىزدەشلەرگە قارىماي ئۇنىڭغا ئائىت باشقا بىر ئىز تاپالمىغانلىقىنى ئېلان قىلغان ئىدى.
ئەمەلدارلار، كرېمېرنىڭ يوقاپ كېتىشىدىن كېيىن رايوندا تەسىرى كۈچلۈك بولغان قاتتىق قىش شارائىتىنىڭ، ئۇزۇن مەزگىل ھايات قېلىشنى ئاساسەن مۇمكىنسىز ھالغا كەلتۈرۈپ قويغانلىقىنىمۇ تەكىتلىگەن ئىدى.
ئىزدەش خىزمەتلىرى ۋە ئەدلىيەلىك تەكشۈرۈش داۋاملاشماقتا.
