تۈركىيە ئاۋىئاتسىيە ۋە ئالەم قاتنىشى سانائىتى (TUSAŞ) ھىندونېزىيە دۆلەت مۇداپىئە سانائىتى شىركەتلىرى PT Dirgantara Indonesia ۋە PT Republik Aero Dirgantara بىلەن 48 دانە «KAAN»  ئۇرۇش ئايروپىلانىنى ئېكسپورت قىلىش كېلىشىمى ئىمزالىدى.

بۇ كېلىشىم تۈركىيەنىڭ ئىستانبۇل شەھىرىدە ئۆتكۈزۈلگەن خەلقئارا دۆلەت مۇداپىئە سانائىتى كۆرگەزمىسى (IDEF) جەريانىدا تۈزۈلدى. ئىشلەپچىقىرىش، ئىنژېنېرلىق ۋە تېخنىكا يۆتكەش ساھەلىرىدىكى ھەمكارلىقنى ئۆز ئىچىگە ئالغان بۇ كېلىشىم بويىچە، ئايروپىلانلارنىڭ 120 ئاي ئىچىدە تاپشۇرۇلۇشى پىلانلانماقتا. ئايروپىلان ماتورلىرى تۈركىيەدە ئىشلەپچىقىرىلىدۇ.

دۆلەت مۇداپىئە سانائىتى ئىدارىسى باشلىقى ھالۇق گۆرگۈن بۇ كېلىشىمنىڭ ئىيۇن ئېيىدا ئىمزالانغان ھۆكۈمەتلەر ئارا رامكا كېلىشىمىنىڭ ئارقىدىنلا تۈزۈلگەنلىكىنى بىلدۈرۈپ، بۇ سودىنىڭ ئىككى دۆلەت ئوتتۇرىسىدىكى دۆلەت مۇداپىئە مۇناسىۋىتىدە «تارىخىي بىر پۇرسەت» ئىكەنلىكىنى ئېيتتى.

گۆرگۈن: «بۇ پۇرسەتتىن بىرلىكتە بەھرىمان بولغانلىقىمىزدىن تولىمۇ مىننەتدارمەن. ھەم ھاياجانلاندۇق، ھەم پەخىرلەندۇق. بۇ ھەمكارلىق ئارقىلىق ھىندونېزىيەدە يەرلىك سانائەت ئۇل ئەسلىھەسى بەرپا قىلىشنى قوللاشنى ۋە ئىككى دۆلەت ئوتتۇرىسىدا ھەم ئىشلەپچىقىرىش، ھەم ئىنژېنېرلىق ساھەلىرىدىكى ھەمكارلىقنى كۈچەيتىشنى نىشان قىلىمىز» دېدى.

گۆرگۈن يەنە«KAAN»  نى سېتىۋېلىش ئۈچۈن باشقا دۆلەتلەر بىلەن سۆھبەت ئېلىپ بېرىلىۋاتامدۇ-يوق دېگەن سوئالغا جاۋاب بېرىپ: «نۇرغۇن دۆلەت بار. تەپسىلاتىنى ۋاقتى كەلگەندە ئورتاقلىشىمىز» دېدى.

مۇناسىۋەتلىك ئۇچۇرلارTRT Global - Prototype to power-broker: How Türkiye’s indigenous fighter jet KAAN earned global trust

تۈركىيەنىڭ تۇنجى يەرلىك ئىشلەپچىقىرىشى بولغان «KAAN» ئۇرۇش ئايروپىلانى تۇنجى ئۇچۇشىنى 2024-يىلىنىڭ بېشىدا تاماملىدى. ياسىلىۋاتقان ئۈچ ئەسلى تىپنىڭ قالغان ئىككىسىنىڭ 2026-يىلى 4-ئايدا قايتا ئۇچۇشى كۈتۈلمەكتە. تۈركۈملەپ ئىشلەپچىقىرىشنىڭ بىرىنچى باسقۇچى پىلانلاندى.

TUSAŞ  نىڭ باش دېرىكتورى مەھمەت دەمىرئوغلۇ «KAAN» نىڭ تۈركىيەنى يېڭى ئەۋلاد ئۇرۇش ئايروپىلانى ياسىيالايدىغان ئاز ساندىكى دۆلەتلەر قاتارىغا كىرگۈزگەنلىكىنى بىلدۈردى.

دەمىرئوغلۇ: «بۇ ئايروپىلاننى ئىشلەپچىقىرىدىغان تۆت دۆلەت بار. يەنە بۇنى ئىشلەپچىقىرىشقا تىرىشىۋاتقان گۇرۇپپىلارمۇ مەۋجۇت» دېدى ۋە 2018-يىلى پارىژ ئاۋىئاتسىيە كۆرگەزمىسىدە ئېلان قىلىنغان بىر قىسىم تۈرلەرنى ئۆز ئىچىگە ئالغان بۇ تىرىشچانلىقلارنىڭ تۇنجى ئۇچۇشىنى 2035-2040-يىللىرى ئارىسىدىلا ئەمەلگە ئاشۇرۇشىنىڭ كۈتۈلىدىغانلىقىنى تەكىتلىدى.

ئۇ يەنە: «بۇ بىزنىڭ قانچىلىك تېز ھەرىكەت قىلىۋاتقانلىقىمىزنى، بۇ ئىشقا قانچىلىك ئىشىنىدىغانلىقىمىزنى ۋە نېمىلەرنى قىلالايدىغانلىقىمىزنى كۆرسىتىپ بېرىدۇ» دېدى.

دەمىرئوغلۇ يەنە، ماي ئېيىدا ئىمزالانغان بىر ئەسلەتمىدىن كېيىن، تۈركىيەنىڭ «Hürjet» رېئاكتىپ مەشىق ئايروپىلانى ئۈچۈن ئىسپانىيە بىلەن بۇ يىل ئىچىدە بىر تەمىنلەش كېلىشىمى تۈزۈلۈشىنىڭ كۈتۈلىدىغانلىقىنى ئېيتتى.

ئۇ يەنە: «ھىندونېزىيەنىڭ زور يوشۇرۇن كۈچى بار. پارىس قولتۇقى دۆلەتلىرىدىمۇ مۇھىم يوشۇرۇن كۈچ بارلىقىغا ئىشىنىمىز» دېگەننى سۆزلىرىگە ئىلاۋە قىلدى.