ئالبانېس خىتاي بىلەن ئامېرىكا ئوتتۇرىسىدىكى رىقابەتنىڭ رايوننى شەكىللەندۈرىدىغان ئەڭ مۇھىم ئامىل ئىكەنلىكىنى تەكىتلىدى.

ئاۋىستىرالىيە باش مىنىستىرى ئانتونى ئالبانېس خىتاي ۋە ئامېرىكىغا قارىتىپ «ھىندى-تىنچ ئوكيان رايونى، دەرىجىدىن تاشقىرى چوڭ دۆلەتلەرنىڭ شاھمات ئۇرۇقىنى يۆتكەيدىغان بىر شاھمات تاختىسى ئەمەس» دېگەن ئۇچۇرنى بەردى.

ABC نىڭ خەۋەر قىلىشىچە، ئالبانېس ئامېرىكا قوشما شتاتلىرىنىڭ نيۇ-يورك شەھىرىدە ئۆتكۈزۈلگەن ئاتلانتىك كېڭىشىنىڭ كەچلىك زىياپىتىدە ئاۋىستىرالىينىڭ تاشقى سىياسىتى ھەققىدە توختىلىپ سۆز قىلغان.

ئاۋىستىرالىيەنىڭ يېڭى مۇناسىۋەتلەر ئورنىتىش، دۆلەتلەر ئوتتۇرىسىدىكى ئالاقىنى تەڭشەيدىغان قائىدىلەرنى قوغداش ۋە «كۈچلۈك ھەقلىق» دېگەن كۆز قاراشنى رەت قىلىش ئارقىلىق يېڭى دۇنيا تەرتىپىنىڭ شەكىللىنىشىگە تۆھپە قوشۇشى كېرەكلىكىنى ئېيتقان ئالبانېس، خىتاي بىلەن ئامېرىكا ئوتتۇرىسىدىكى رىقابەتنىڭ رايوننى شەكىللەندۈرىدىغان ئەڭ مۇھىم ئامىل ئىكەنلىكىنى تەكىتلىدى.

ئالبانېس بۇ توغرىلىق خىتاي بىلەن ئامېرىكاغا سىگنال بېرىپ، «ھىندى-تىنچ ئوكيان رايونى، دەرىجىدىن تاشقىرى چوڭ دۆلەتلەرنىڭ شاھمات ئۇرۇقىنى يۆتكەيدىغان شاھمات تاختىسى ئەمەس» دېگەن ئىبارىنى ئىشلەتتى.

ۋاشىنگتون بىلەن بېيجىڭنىڭ مۇناسىۋەتلىرىنى قانداق باشقۇرۇشىنىڭ ئىنتايىن مۇھىم ئىكەنلىكىگە ئىشارەت قىلغان ئالبانېس: «ئەمما بۇ بىزنىڭ رايونغا بولغان كۆز قارىشىمىزنىڭ بىردىنبىر لوپا ئەينىكى بولالمايدۇ. رايوندىكى دۆلەتلەر پەقەتلا تاماشىبىن ئەمەس. ئۇلار رايوننىڭ كەلگۈسىنى شەكىللەندۈرىدۇ ۋە ئۆزلىرىنىڭ سېنارىيەسىنى (يۆنىلىشىنى) يازىدۇ» دېدى.