ئىران تەرەپتىن قويۇپ بېرىلگەن ئۇچقۇچىسىز ھاۋا ئاپپاراتلىرى پەيشەنبە كۈنى ئەزەربەيجاننىڭ ناخچىۋان رايونىغا ھۇجۇم قىلىپ، ناخچىۋان خەلقئارا ئايرودۇرۇمى ئەتراپىدا ئوت ئاپىتىنى كەلتۈرۈپ چىقاردى. سىن كۆرۈنۈشلىرىدە ئىران چېگراسىغا تەخمىنەن 10 كىلومېتىر كېلىدىغان ئايرودۇرۇم ئەتراپىدىن قويۇق ئىس - تۈتەكلەرنىڭ ئۆرلەۋاتقانلىقى كۆرۈلىدۇ.
ئەزەربەيجان تاشقى ئىشلار مىنىستىرلىقى پەيشەنبە كۈنى چۈشتىن كېيىن ئىران زېمىنلىرىدىن ئېلىپ بېرىلغان ئۇچقۇچىسىز ھاۋا ئاپپاراتى ھۇجۇملىرىنىڭ ناخچىۋان ئاپتونوم جۇمھۇرىيىتى ئايرودۇرۇم تېرمىنالىنى ۋە شەكەرئاباد يېزىسىدىكى بىر مەكتەپ قورۇسى ئەتراپىنى نىشان قىلغانلىقىنى جەزملەشتۈردى.
مىنىستىرلىق تەرىپىدىن ئېلان قىلىنغان باياناتتا مۇنداق دېيىلدى:
«ئىران ئىسلام جۇمھۇرىيىتى زېمىنلىرىدىن ئېلىپ بېرىلغان، ئايرودۇرۇم بىناسىنىڭ زىيانغا ئۇچرىشىغا ۋە ئىككى پۇقرانىڭ يارىلىنىشىغا سەۋەب بولغان بۇ ئۇچقۇچىسىز ھاۋا ئاپپاراتى ھۇجۇملىرىنى قاتتىق ئەيىبلەيمىز.»
باكۇ ھۇجۇمنى رايونلۇق جىددىيچىلىكنى ئەۋج ئالدۇرۇۋەتكەن خەلقئارا قانۇننىڭ دەپسەنە قىلىنىشى دەپ تەرىپلەپ، ئىران تەرەپتىن جىددىي چۈشەندۈرۈش بېرىشى ۋە ئالدىنى ئېلىش تەدبىرلىرىنى قوللىنىشىنى تەلەپ قىلدى.
باياناتتا: «ئىران ئىسلام جۇمھۇرىيىتىدىن مەزكۇر مەسىلىنى قىسقا ۋاقىت ئىچىدە ئايدىڭلاشتۇرۇشىنى، بۇ ھەقتە چۈشەندۈرۈش بېرىشىنى ۋە بۇنىڭدىن كېيىن بۇ خىل ۋەقەلەرنىڭ تەكرارلانماسلىقى ئۈچۈن زۆرۈر ۋە جىددىي تەدبىرلەرنى قوللىنىشىنى تەلەپ قىلىمىز» دېيىلدى.
باكۇ قايتۇرما زەربە بېرىش ھوقۇقىغا ئىگە
ئەزەربەيجان ھۆكۈمىتى بۇ خىل ھۇجۇملار تەكرارلانغان تەقدىردە، مۇناسىپ تەدبىرلەر بىلەن قايتۇرما زەربە بېرىش ھوقۇقىنى ساقلاپ قالىدىغانلىقى ھەققىدە ئاگاھلاندۇرۇش بەردى.
ئىراننىڭ ئەزەربەيجاندا تۇرۇشلۇق باش ئەلچىسى مۇجتەبا دەمىرچىلۇ ئەزەربەيجان تاشقى ئىشلار مىنىستىرلىقىغا چاقىرىلدى. مىنىستىرلىق: «ئىران تەرەپكە قاتتىق نارازىلىق بىلدۈرۈلىدۇ ۋە نوتا تاپشۇرۇلىدۇ» تەرىقىسىدە بايانات ئېلان قىلدى.
