جۇمھۇر رەئىس رەجەپ تاييىپ ئەردوغان ئەزا دۆلەتلەر ئوتتۇرىسىدىكى ئىقتىسادىي مۇناسىۋەتلەرنى كۈچەيتىشنى مەقسەت قىلغان مۇھىم رايونلۇق مۇنبەر بولغان ئىقتىسادىي ھەمكارلىق تەشكىلاتى (EİT) نىڭ 17-نۆۋەتلىك باشلىقلار يىغىنىغا قاتنىشىش ئۈچۈن ئەزەربەيجانغا يېتىپ باردى.
باشلىقلار يىغىنى قاراباغنىڭ خانكەندى شەھىرىدە ئۆتكۈزۈلمەكتە.
جۇمھۇر رەئىس ئەردوغان جۈمە كۈنى ئالدى بىلەن فۇزۇلىغا قونغاندىن كېيىن، باشلىقلار يىغىنى ئۆتكۈزۈلىدىغان شەھەرگە قاراپ يول ئالدى.
جۇمھۇر رەئىس ئەردوغانغا تاشقى ئىشلار مىنىستىرى خاقان فىدان، سودا مىنىستىرى ئۆمەر بولات، قاتناش ۋە ئۇل ئەسلىھە مىنىستىرى ئابدۇلقادىر ئۇرالئوغلۇ ۋە ئائىلە ۋە ئىجتىمائىي مۇلازىمەت مىنىستىرى ماھىنۇر ئۆزدەمىر گۆكتاش قاتارلىق يۇقىرى دەرىجىلىك تۈرك ئەمەلدارلىرى ھەمراھ بولماقتا.
10 ئەزا دۆلەتتىن تەشكىل تاپقان ئىقتىسادىي ھەمكارلىق تەشكىلاتى رەھبەرلىرى سودا، ئېنېرگىيە، قاتناش ۋە باشقا مۇھىم ساھەلەردىكى ھەمكارلىقنى كۈچەيتىش مەسىلىلىرىنى مۇزاكىرە قىلىدىغان بۇ يىغىندا، جۇمھۇر رەئىس ئەردوغاننىڭمۇ نۇتۇق سۆزلىشى مۆلچەرلەنمەكتە.
ئىستراتېگىيەلىك سۇپا
1985-يىلى تۈركىيە، ئىران ۋە پاكىستان تەرىپىدىن قۇرۇلغان ئىقتىسادىي ھەمكارلىق تەشكىلاتى سوۋېت ئىتتىپاقى پارچىلانغاندىن كېيىن، ئوتتۇرا ئاسىيا ۋە جەنۇبىي كاۋكاز دۆلەتلىرىنىڭ قاتنىشىشى بىلەن تېخىمۇ كەڭ دائىرىلىك بىر رايونلۇق تەشكىلاتقا ئايلاندى.
بۇ باشلىقلار يىغىنلىرى ئىقتىسادىي بىر گەۋدىلىشىشنى ئىلگىرى سۈرۈش، رايونلار ئارا ئۆزئارا تۇتىشىشنى كۈچەيتىش ۋە سىياسىي دىيالوگ سۇپىسى رولىنى ئوينىماقتا.
بۇ يىللىق يىغىن، بولۇپمۇ ئەزەربەيجان ئۆتكەن يىلى قاراباغنى تولۇق كونترول قىلغاندىن كېيىن، جەنۇبىي كاۋكازغا بولغان جۇغراپىيەلىك-سىياسىي قىزىقىش ئېشىۋاتقان بىر پەيتىدە ئېچىلماقتا.
تۈركىيە ئەزەربەيجاننىڭ يېقىن ئىتتىپاقدىشى بولۇش سۈپىتى بىلەن، باكۇنىڭ توقۇنۇشتىن كېيىنكى قۇرۇلۇش تىرىشچانلىقلىرىنى ۋە ئاسىيا بىلەن ياۋروپانى تۇتاشتۇرىدىغان «ئوتتۇرا كارىدور» تۈرىنى ئۆز ئىچىگە ئالغان قاتناش كارىدورلىرىنى كېڭەيتىش خىزمەتلىرىنى قوللاپ كەلمەكتە.
جۇمھۇر رەئىس ئەردوغاننىڭ بۇ يىغىنغا قاتنىشىشى ئەنقەرەنىڭ رايونلۇق ھەمكارلىققا بولغان ساداقىتىنى ۋە ئەزەربەيجان بىلەن بولغان چوڭقۇرلىشىۋاتقان ئىستراتېگىيەلىك شېرىكلىك مۇناسىۋىتىنى يەنە بىر قېتىم گەۋدىلەندۈرۈپ بېرىدۇ.
