جۇمھۇر رەئىس ئەردوغان باش مىنىستىر ئوربان بىلەن تېلېفونلاشتى.

يېقىنقى يىللاردىن بۇيان تۈركىيە بىلەن ۋېنگىرىيە ئوتتۇرىسىدىكى ئىككى تەرەپلىك مۇناسىۋەتلەر سىياسىي، ئىقتىسادىي ۋە مەدەنىيەت ساھەلىرىدە كۈنسېرى كۈچەيمەكتە، بۇنىڭغا ئەگىشىپ ئىككى دۆلەت ئوتتۇرىسىدىكى ھەمكارلىقنىڭ دائىرىسى ئىزچىل تۈردە بارغانسېرى كېڭەيمەكتە.

تۈركىيە جۇمھۇرىيىتى جۇمھۇر رەئىسى رەجەپ تاييىپ ئەردوغان ۋېنگىرىيە باش مىنىستىرى ۋىكتور ئوربان بىلەن تېلېفوندا سۆھبەتلەشتى.

ئىككى رەھبەرنىڭ تېلېفون سۆھبىتىدە، ئىككى تەرەپلىك مۇناسىۋەتلەر، شۇنداقلا رايونلۇق ۋە يەر شارى خاراكتېرلىك ئۆزگىرىشلەر مۇزاكىرە قىلىندى.

تۈركىيە جۇمھۇرىيىتى جۇمھۇر رەئىسلىك مەھكىمىسى ئۇچۇر – ئالاقە ئىشلىرى ئىدارىسى تەرىپىدىن ئېلان قىلىنغان باياناتتا ئەسكەرتىلىشىچە، شەنبە كۈنى ئۆتكۈزۈلگەن تېلېفون سۆھبىتىدە،  جۇمھۇر رەئىس ئەردوغان تۈركىيەنىڭ ۋېنگىرىيە بىلەن بارلىق ساھەلەردە مۇناسىۋەتلەرنى تېخىمۇ كۈچەيتىش ئىرادىسىنىڭ قەتئىيلىكىنى تەكىتلىگەن. شۇنداقلا ئىستراتېگىيەلىك ئالىي ھەمكارلىق كېڭىشى ۋە ئورتاق مەسلىھەت مېخانىزمىنىڭ يېقىنلىشىۋاتقان يىغىنلىرىنىڭ ئىككى دۆلەت ئوتتۇرىسىدىكى ھەمكارلىقنى تېخىمۇ چوڭقۇرلاشتۇرىدىغانلىقىنى بىلدۈرگەن.

ئەردوغان تېلېفون سۆھبىتى جەريانىدا باش مىنىستىر ئورباننىڭ تۇغۇلغان كۈنىنى تەبرىكلىگەن.

تۈركىيە بىلەن ۋېنگىرىيە 2013-يىلى ئىستراتېگىيەلىك ئالىي ھەمكارلىق كېڭىشىنىڭ ئىشقا كىرىشتۈرۈلۈشى بىلەن دىپلوماتىك مۇناسىۋەتلىرىنى ئىستراتېگىيەلىك شېرىكلىك سەۋىيەسىگە يەتكۈزدى.

يېقىنقى يىللاردىن بۇيان، ئىككى دۆلەت ئوتتۇرىسىدىكى مۇناسىۋەتلەر سىياسىي، ئىقتىسادىي ۋە مەدەنىيەت ساھەلىرىدە ئىزچىل تۈردە كۈنسېرى كۈچەيمەكتە، بۇنىڭغا ئەگىشىپ ئىككى دۆلەت ئوتتۇرىسىدىكى ھەمكارلىقنىڭ دائىرىسى بارغانسېرى كېڭەيمەكتە.