بۇ سۆھبەتلەر ئامېرىكا پىرېزىدېنتى ترامپ ئوتتۇرىغا قويغان، ئىسرائىلىيە ۋە ھاماسمۇ ئىجابىي ئىنكاس قايتۇرغان 20 ماددىلىق ئۇرۇش توختىتىش تەكلىپىنى يولغا قويۇش پىلانىنى تۈزۈشنى مەقسەت قىلىدۇ.

ھاماس غەززەدىكى ئىرقىي قىرغىنچىلىق خاراكتېرىدىكى ئۇرۇشنى ئاخىرلاشتۇرۇشنى مەقسەت قىلغان ئىسرائىلىيە بىلەن بولغان ۋاسىتىلىق سۆھبەتلەردە «ئۈمىدۋارلىق» كەيپىياتىنىڭ ھۆكۈم سۈرۈۋاتقانلىقىنى بىلدۈردى. پەلەستىن قارشىلىق كۆرسىتىش تەشكىلاتى كېلىشىم دائىرىسىدە ئىسرائىلىيەلىك تۇتقۇنلارنى قويۇپ بېرىش بەدىلىگە قويۇپ بېرىلىشىنى تەلەپ قىلغان مەھبۇسلارنىڭ تىزىملىكىنى سۇندى.

ھاماس ئەمەلدارى تاھىر ئەل-نۇنۇ شەرمۇل شەيختىن AFP ئاگېنتلىقىغا بەرگەن باياناتىدا: «ۋاسىتىچىلەر ئۇرۇش توختىتىشنى يولغا قويۇشتىكى توسالغۇلارنى تۈگىتىش ئۈچۈن زور تىرىشچانلىق كۆرسىتىۋاتىدۇ، بارلىق تەرەپلەر ئارىسىدا ئۈمىدۋار كەيپىيات ھۆكۈم سۈرمەكتە» دېدى.

نۇنۇ پەلەستىن قارشىلىق كۆرسىتىش تەشكىلاتىنىڭ «كېلىشىم قىلىنغان ئۆلچەم ۋە سانلارغا ئاساسەن» ئۇرۇش توختىتىشنىڭ بىرىنچى باسقۇچىدا قويۇپ بېرىلىشىنى تەلەپ قىلغان مەھبۇسلارنىڭ تىزىملىكىنى سۇنغانلىقىنى سۆزىگە قوشۇمچە قىلدى.

بۇنىڭغا قارىتا ھاماس 2023-يىلى 7-ئۆكتەبىردە ئىسرائىلىيەگە قىلغان چېگرا ھالقىغان ھۇجۇمىدا قولغا چۈشۈرگەن ھايات ۋە ئۆلۈك 47 تۇتقۇننى قويۇپ بېرىشكە تەييارلانماقتا.

‹ئىنتايىن ئىلھامبەخش›

مىسىر پىرېزىدېنتى ئابدۇلفەتتاھ سىسى ترامپنىڭ ئوتتۇرا شەرق ئالاھىدە ئەلچىسى ستىۋ ۋىتكوف ۋە كۈيئوغلى جارېد كۇشنېرنىڭ ھازىر شەرمۇل شەيختە ئىكەنلىكىنى ۋە ئۇلار كەلگەندىن بۇيان تاپشۇرۇۋالغان ئۇچۇرلارنىڭ «ئىنتايىن ئىلھامبەخش» ئىكەنلىكىنى ئېيتتى.

سىسى ئامېرىكا ئەلچىلىرىنىڭ «كۈچلۈك ئىرادە، كۈچلۈك ئۇچۇر ۋە پىرېزىدېنت ترامپتىن بۇ سۆھبەتلەر جەريانىدا ئۇرۇشنى ئاخىرلاشتۇرۇش ئۈچۈن كۈچلۈك ھوقۇق» بىلەن كەلگەنلىكىنى بىلدۈردى.

سىسى يەنە كېلىشىم ھاسىل قىلىنغان ئەھۋالدا ترامپنى مىسىرغا كېلىپ ئىمزا قويۇش مۇراسىمىغا قاتنىشىشقا تەكلىپ قىلدى.

سەيشەنبە كۈنى ئوۋال ئىشخانىسىدا مۇخبىرلارغا سۆز قىلغان ترامپ: «ئەگەر ھاماس ۋە ئىسرائىلىيە ئۇرۇش توختىتىش توغرىسىدا كېلىشىم ھاسىل قىلسا، ئوتتۇرا شەرقتە تىنچلىقنى ئىشقا ئاشۇرۇش ئېھتىماللىقىمىز بار» دېدى.

قاتار باش مىنىستىرى شەيخ مۇھەممەد بىن ئابدۇراھمان ئەل سانى ۋە تۈركىيە جۇمھۇرىيىتى مىللىي ئىستىخبارات ئىدارىسى (MİT) باشلىقى ئىبراھىم كالىننىڭمۇ چارشەنبە كۈنى ئۆتكۈزۈلىدىغان سۆھبەتكە قاتنىشىشى كۈتۈلمەكتە.

مۇناسىۋەتلىك ئۇچۇرلارTRT World - What’s the latest on the high-stakes Egypt talks for a Gaza ceasefire?

ئىسرائىلىيەنىڭ ئۈزلۈكسىز ھۇجۇملىرى

پەلەستىن سەھىيە مىنىستىرلىقىنىڭ بىلدۈرۈشىچە، 2023-يىلى ئۆكتەبىردىن بۇيان غەززەدە ئىسرائىلىيەنىڭ ھۇجۇملىرىدا كەم دېگەندە 67 مىڭ 183 پەلەستىنلىك ھاياتىدىن ئايرىلغان.

مىنىستىرلىق يېقىنقى 24 سائەت ئىچىدە دوختۇرخانىلارغا 10 جەسەت ۋە 61 يارىدارنىڭ ئېلىپ كېلىنگەنلىكىنى، يارىدارلارنىڭ ئومۇمىي سانىنىڭ 169 مىڭ 841 گە يەتكەنلىكىنى خەۋەر قىلدى.

ئىسرائىلىيە ئارمىيەسى يانۋاردىن بۇيان يولغا قويۇلۇۋاتقان ئۇرۇش توختىتىش ۋە مەھبۇس ئالماشتۇرۇش كېلىشىمىگە خىلاپلىق قىلىپ، 18-مارت ئىرقىي قىرغىنچىلىق خاراكتېرىدىكى ئۇرۇشنى قايتا باشلىدى. شۇ ۋاقىتتىن بۇيان 13 مىڭ 588 كىشى ھاياتىدىن ئايرىلدى، 57 مىڭ 800 كىشى يارىلاندى. بۇلاردىن كەم دېگەندە 2613 كىشى ياردەمگە ئېرىشىشكە ئۇرۇنۇۋاتقاندا زىيانكەشلىككە ئۇچرىغان.

مۇناسىۋەتلىك ئۇچۇرلارGaza’s Amputee Children: “NOT like any other children”