رۇسىيە تاشقى ئىشلار مىنىستىرلىقى باياناتچىسى مارىيا زاخاروۋا، ئامېرىكا ھاۋا ئارمىيەسى باش كاتىپى تروي مېينكنىڭ ئىلگىرى قىلغان «ئالەم بوشلۇقىنى كونترول قىلىش ئۈچۈن زۆرۈر بولغان قوراللارغا ئىگە ئىكەنلىكى» ھەققىدىكى سۆزلىرىگە باھا بەردى ۋە ئالەم بوشلۇقىدىكى قوراللىنىش رىقابىتىنىڭ ئالدىنى ئېلىش ئۈچۈن كونكرېت قەدەملەرنى تاشلاشنىڭ تەخىرسىز ئىكەنلىكىنى بىلدۈردى.
زاخاروۋا ئامېرىكانىڭ بۇ مەسىلىدە بۇزغۇنچىلىق خاراكتېرلىك بىر لىنىيەدە مېڭىۋاتقانلىقى ھەققىدە ئاگاھلاندۇرۇپ، بۇنىڭ سەلبىي ئاقىۋەتلەرنى كەلتۈرۈپ چىقىرىشى مۇمكىنلىكىنى تەكىتلىدى ۋە مۇنداق دېدى: «ۋاشىنگتون ئۆزىنىڭ تار مەنپەئەتىنى دەپ، ئالەم بوشلۇقىدا يۈز بېرىش ئېھتىمالى بولغان ھەرقانداق بىر قوراللىق توقۇنۇشنىڭ ئىنسانىيەتكە ئېلىپ كېلىدىغان ھالاكەت خاراكتېرلىك ئاقىۋەتلىرىگە پۈتۈنلەي پەرۋا قىلماسلىققا تەييار تۇرماقتا. بۇ ئەھۋال ئالەم بوشلۇقىغا ئائىت تەتقىقاتلار ۋە دۆلەتلەرنىڭ ئالەم بوشلۇقىدىكى ئىزدىنىش ئىمكانىيىتىگە خەۋپ يەتكۈزۈپلا قالماي، يەر شارىدىكى نۇرغۇنلىغان ئىجتىمائىي ۋە ئىقتىسادىي جەريانلار ئۈچۈنمۇ خەتەر پەيدا قىلماقتا.»
شۇنىڭ بىلەن بىللە، باياناتچى زاخاروۋا ئالەم بوشلۇقىغا قورال ئورۇنلاشتۇرۇشنى چەكلەش توغرىسىدىكى سۆھبەتلەرنىڭ دەرھال باشلىنىشى كېرەكلىكىنى ئوتتۇرىغا قويدى.
