ئىسرائىلىيە بىلەن ئامېرىكا يادرو سۆھبىتى داۋاملىشىۋاتقان مەزگىلدە ئىرانغا ھۇجۇم باشلىدى، پۈتكۈل ئىسىرائىلىيەدە جىددىي ھالەت ئېلان قىلدى.

ئىسرائىلىيە مۇداپىئە مىنىستىرى ئىسرائىل كاتز (Israel Katz) بۈگۈن (2026-يىلى 28-فېۋرال)، ئېغىر بولغان دۆلەت خەۋپسىزلىكى تەھدىتىنى سەۋەب كۆرسىتىپ، ئىسرائىلىيەنىڭ ئىرانغا قارىتا «ئالدىنى ئېلىش خاراكتېرلىك ھۇجۇم» قوزغىغانلىقىنى ئېلان قىلدى.

كاتز يەنە پۈتكۈل مەملىكەتتە جىددىي ھالەت ئېلان قىلدى ۋە پۇقرالارنى «ئىچكى فرونت قوماندانلىق مەركىزى» نىڭ كۆرسەتمىلىرىگە ئەمەل قىلىشقا چاقىردى.

مۇداپىئە مىنىستىرلىقى تەرىپىدىن ئېلان قىلىنغان باياناتتا: «ئىسرائىلىيە دۆلىتى ئىرانغا قارىتا <ئالدىنى ئېلىش خاراكتېرلىك زەربە> بېرىشنى باشلىدى. مۇداپىئە مىنىستىرى ئىسرائىل كاتز پۈتكۈل مەملىكەت مىقياسىدا ئالاھىدە ۋە دەرھال كۈچكە ئىگە بولىدىغان جىددىي ھالەت ئېلان قىلدى» دېيىلدى.

گۇۋاھچىلار تېھران شەھەر مەركىزىدە كۈچلۈك پارتلاش بولغانلىقىنى ۋە قويۇق تۈتۈننىڭ ئاسمانغا ئۆرلەۋاتقانلىقىنى ئېيتتى؛ ئىران ھۆكۈمىتى تېخى بۇ ھەقتە ھېچقانداق بايانات ئېلان قىلمىدى.

پارس خەۋەر ئاگېنتلىقىنىڭ خەۋىرىگە قارىغاندا، ئىسپاھان، قۇم، كەرەج ۋە كېرمانشاھ قاتارلىق شەھەرلەردىمۇ پارتلاش ئاۋازى ئاڭلانغان.

بۇ ھۇجۇم، ئامېرىكا بىلەن سۆھبەت داۋاملىشىۋاتقان ۋە ئىراننىڭ يادرو پىروگراممىسى رامكىسىدا جىددىيچىلىك كۈچىيىۋاتقان بىر پەيتتە يۈز بەردى.

ئىسرائىلىيە ئارمىيەسى ئالدىنى ئېلىش تەدبىرى سۈپىتىدە ھاۋا ھۇجۇمى سىگنالى چالدى ۋە يۈز بېرىش ئېھتىمالى بولغان باشقۇرۇلىدىغان بومبا تەھدىتىدىن ئاگاھلاندۇردى. شۇنداقلا «تەلىم-تەربىيە پائالىيەتلىرى، يىغىلىشلار ۋە خىزمەت ئورۇنلىرى» غا چەكلىمە قويۇلىدىغانلىقىنى ئېلان قىلدى.

ھەربىي دائىرىلەر «ئاساسىي ساھەلەر» نىڭ بۇ چەكلىمىدىن مۇستەسنا ئىكەنلىكىنى بىلدۈردى.

بارلىق ئىران رەھبەرلىكىنىڭ نىشان قىلىنىشى

ئامېرىكانىڭ ئىرانغا قارشى ھۇجۇمغا قاتناشقانلىقى قەيت قىلىنماقتا، ئەمما بۇنىڭ كۆلىمى تېخى ئېنىق ئەمەس. ھەرىكەتتىن خەۋەردار بولغان بىر ئامېرىكا ئەمەلدارى سەزگۈر ھەربىي ھەرىكەتلەرنى مۇزاكىرە قىلىش ئۈچۈن نام-شەرىپىنى ئاشكارىلىماسلىق شەرتى بىلەن بۇ ئۇچۇرنى ئاشكارىلىدى.

رويتېرس ئاگېنتلىقىنىڭ زىيارىتىنى قوبۇل قىلغان يەنە بىر ئامېرىكا ئەمەلدارى بولسا، ھۇجۇمنىڭ ھاۋا ۋە دېڭىزدىن ئېلىپ بېرىلغانلىقىنى ئېيتتى.

ئىران ۋە ئىسرائىلىيە ئۆز ھاۋا تەۋەلىكىنى تاقىغانلىقىنى ئېلان قىلدى.

تۇنجى مەلۇم قىلىنغان ھۇجۇم، ئىراننىڭ ئالىي رەھبىرى ئايەتۇللاھ ئەلى ھامەنىينىڭ ئىشخانا بىناسىغا يېقىن بىر رايوندا يۈز بەردى.

86  ياشلىق ھامەنىينىڭ شۇ ۋاقىتتا ئۇ يەردە ياكى ئەمەسلىكى ئېنىق ئەمەس. ئىرانلىق بىر ئەمەلدار رويتېرس ئاگېنتلىقىغا ئۇنىڭ تېھران سىرتىدىكى بىخەتەر جايغا يۆتكەلگەنلىكىنى ئېيتتى.

ئىران ئىسنا (ISNA) خەۋەر ئاگېنتلىقىنىڭ خەۋىرىگە قارىغاندا، ئىسرائىلىيەنىڭ تۇنجى ھۇجۇمىدا ئىنقىلابىي مۇھاپىزەتچىلەر قىسمىنىڭ نۇرغۇن خادىمى، جۈملىدىن بىر قىسىم مۇھىم خادىملىرى جېنىدىن ئايرىلغان ۋە يارىلانغان.

ئەسكەرتىش: خەۋىرىمىز داۋاملىق يېڭىلىنىدۇ....