ياۋروپا ئىتتىپاقى كومىتېتىنىڭ تېخنولوگىيە، خەۋپسىزلىك ۋە دېموكراتىيە ئىشلىرىغا مەسئۇل مۇئاۋىن رەئىسى ھېننا ۋىرككۇنېن سۈنئىي ئەقىلنىڭ ئىنسان كونتروللۇقىدىن چىقىپ كېتىشىنىڭ ئىتتىپاق ئۈچۈن ئەڭ جىددىي خەۋپسىزلىك تەھدىتى ئىكەنلىكىنى ئەسكەرتتى. ۋىرككۇنېن فىنلاندىيە دۆلەتلىك تېلېۋىزىيە قانىلىدا بەرگەن باياناتىدا، سۈنئىي ئەقىل تېخنىكىسىنىڭ تەرەققىيات سۈرئىتى ۋە ئۇنىڭ ئېلىپ كېلىدىغان خەۋپلىرى ھەققىدە توختالدى.
ئۇ سۈنئىي ئەقىل ساھەسىدىكى ئەڭ چوڭ تەھدىتنىڭ ئىنسانلارنىڭ بۇ تېخنولوگىيە ئۈستىدىكى ھۆكۈمرانلىقىنى يوقىتىپ قويۇشى ئىكەنلىكىنى تەكىتلەپ: «بۇ تېخنولوگىيەلەر شۇنچە كۆپ تەرەققىي قىلدىكى، بىز چوقۇم كونتروللۇقنى قولىمىزدا تۇتۇشىمىز ۋە خەۋپسىزلىك تەدبىرلىرىنى ئۈزلۈكسىز يولغا قويۇشىمىز كېرەك» دېدى. ۋىرككۇنېن يەنە بەزى سۈنئىي ئەقىل مودېللىرىنىڭ سىناق مۇھىتىدىن چىقىپ كېتىپ، تور خەۋپسىزلىكىگە زىيان يەتكۈزگەنلىكىنى تىلغا ئالدى.
ياۋروپا ئىتتىپاقى سۈنئىي ئەقىل تەھدىتلىرىگە تاقابىل تۇرۇش ئۈچۈن «ياۋروپا ئىتتىپاقى سۈنئىي ئەقىل قانۇنى» نى ماقۇللىغان بولۇپ، بۇ قانۇن تېخنولوگىيە شىركەتلىرىگە خەۋپ - خەتەرنى دائىم باھالاش مەجبۇرىيىتىنى يۈكلەيدۇ. ۋىرككۇنېن دۇنياۋى تېخنولوگىيە شىركەتلىرى بىلەن خەلقئارالىق ھەمكارلىق ئورنىتىشنىڭ سۈنئىي ئەقلىدىن كېلىدىغان تەھدىتلەرنىڭ ئالدىنى ئېلىشتىكى ئەڭ ئۈنۈملۈك يول ئىكەنلىكىنى سۆزلىرىگە ئىلاۋە قىلدى.
